Harassment, Conduct Deficiencies of a Sexual Nature, Harassment of a Sexual Nature, and Crimes of a Sexual Nature Prevention, Reporting and Response for Cadets and Junior Canadian Rangers | Denesuline

Dene k’enats’ı̨dher ɂası kaılé, Dene ɂeyı k’e nedołther de hosłı̨ne k’esı ha , Dene k’enats’ı̨dher ɂası kaılé ɂełk’ech’a Hosłı̨ne k’esı ha , chu Hosłı̨ne k’esı ha dene k’enats’ı̨dher dé bebası hoɂą nųt’a, Beghą yatı hołe chu t’ąt’u Dene godhé bąnełt’u Cadets chu Rangers hel nadarełya de bası Cadets chu Junior Canadian Rangers hel

Yatı bek’anota hut’a ha:

CANFORGEN 089/24. T’a yatı begharé CAF dųhų bet’a ɂedırı hoghedı ɂedırı dadı sı “hosłı̨ne ha dene nakoghodı́” detł’ıs k’ı dı̨t’a ha t’oho degodhe nahodłé de. CAF hots’ı̨ k’oldé yatı dųhų t’ahot’ı̨ hadé t’ąt’u dene nedołthı́ t’oho hosłı̨ne k’esı nodhı́ ha; Dene k’enats’ı̨dher ɂası kaılé ɂedırı hosłı̨ne k’esı ha; chu ɂeyı k’esı due nołther dé t’oho hosłı̨ne k’esı ha.

Ku tsątsąne benı̨ hųlı̨ k’e yatı godhé nahodłé ha ɂeyı bası t’oho CAF yatı godhé holı̨ de ɂeją dek’elyé ha.

Kulı kudąne nel due nodher ha nets’edı horı̨lɂı̨h de, ɂeją ts’ęn naıyǫ́łtı nel sughua hoɂąıle huto kudąne nets’edı ha, ɂeją ts’ęn dųłtsı 9-1-1.

Ɂı̨łąghe huto nets’enı̨ huto, nelot’ı̨ne huto, dene bek’orı̨lyą huto dene nı̨h ha dene ts’enı̨ bets’ęn. Kudąne ɂeyer ch’ası ts’ųya t’ok’e nel due noreltth’el ch’ası chu nenakoghodı ka hųya. Nel sughua hoɂą ttheré sı.

Ku nel horena nı̨dhęn huto nets’edı ha nı̨dhęn de, kudąne t’ą nets’ı nı̨ walı sı bets’ęn yawųłtı. Nets’enı̨ huto, nel dene ɂeghalana huto nelot’ı̨ne huto nenaré dene hųlı̨ bets’ęn hųya la kudąne.

Honezı ɂası dene ts’edı ha hųlı̨

• Canadian dene ɂeła nadarełya Dene Hosłı̨ne ha due halyá de t’ok’e bets’edı ha dahola

T’ą dene Cadets chu Dene godhé Canadian Rangers Ɂeła nadarełya (CJCR Gp) chu Canadian Denexal dene (CA) t’ą ɂeghadalana sı dene ts’eranı̨ ha nadarełya ɂeją Dene Godhé Canadian Rangers bel (JCR) t’a hoɂą sı ɂedırı dene t’ok’e bel hoɂąsı hotıe degharé ts’ethı̨yę dene hel hoɂą ha hok’enadé, chu dene ts’eranı̨ t’ok’e Ɂedırı hoɂąsı. Ku ɂeyı t’ahodı hadé dene godhé t’a ɂeyı hel nadé sı chu bettheré ɂedırı ląt’e ɂası ch’ası bel hoɂą dezą, due haldhęn, daghelɂa hu, ɂełtth’ıle ch’a chu due haldhęn ch’a. Ku ɂeyı hel t’ą Cadets, JCRs, chu t’ą yeghą k’oldé sı horelyų ɂedırı dene hel nodhı ch’ası hodoghęłnı̨ hoɂą t’ok’e ɂeła nı̨del sı k’eyaghe ɂedırı Dene k’enats’ı̨dher ɂası kaılé hosłı̨ne ha.

Bech’ası nųt’a, beghą yatı hołé chu t’ąt’u ɂedırı Cadets chu Dene godhé Canadian Rangers hel nadé

Horelyų dene t’ą ɂedırı hel ɂeghadalana ha danı̨dhęn sı Cadets chu JCR dene godhé hotthé hots’ı̨ behonı̨yé honet’ı̨ hoɂą. T’a hadé Denenałtsı dene hel yuné hots’ı̨ ɂesónołther dé hots’ı̨ behonı̨ye kanota hoɂą chu Ɂeyı ląt’e dene godhé hel ɂesónołther dąlı̨ ha chu sǫlah nenę dąłt’u nanet’ı̨ hoɂą.

Ɂeyı hel, horelyų dene godhe chu ɂąłnedhe ɂedırı Cadet chu JCR dene godhé t’ą ɂeją naradé sı hotıe t’ąt’u ɂası hoghedı k’e nedółdé hoɂą t’a yatı CJCR Gp bets’ı̨ k’é chu Canadian Denexal Dene (CAF) yatı k’e chu Canada nąne hoɂá sehoɂą yatı k’é.

Nı̨h dąłt’u horelyų Cadet chu JCR dene godhé t’ą naradé sı chu ɂąłnedhé ɂedırı yatı danełɂı̨h hoɂą, yehadayałtı chu ɂąłnedhe dene hodonełtęn k’ı bel, ɂeyer tł’ąghe de bezı dı̨tł’ıs hoɂą chu t’a ɂełtth’ıle danı̨dhęn sı ghą dı̨tł’ıs hoɂą. Ku ɂeyı t’anodhı sı ɂeją t’ąt’u beghare hołé k’e hoɂą:

• CJCR Gp Helɂá 5019-6: 5019-6 Dene ɂedırı gharé ɂedoghelnı - Canada.ca chu
• CJCR Gp Helɂá 10032 JCR Yatı begharé dene t’anı̨dołthı́ chu t’ahot’ı̨: 10032 JCR Dene t’anı̨dołthı chu t’ahot’ı̨ ghą yatı - Canada.ca.

Ku ɂałų beghą yatı horı̨lɂı̨h de ɂeją tsątsąne benı̨ hųlı̨ k’e nųlɂı̨h Cadets chu dene godhé Canadian Rangers ɂeyı chu  T’a dene nalé ɂası hołé t’ą Hoɂą hobası.

Ku ɂedłesı hesa ha ɂá dene k’oshą ɂedırı ląt’é ɂası ha due halyá de bets’esnı̨ hutó hobası Dene k’enats’ı̨dher ɂası kaılé huto daghelɂa ha? 

Ku nenalé nodher de, konets’edı huto, huto nel nodher dé ɂedırı Dene k’enats’ı̨̨́dher ɂası kaılé huto daghelɂa de, kudąne beghą nųzı hoɂą t’anodher sı ghą ɂı̨łą huto ɂąłnedhe nadher dé nets’edı ha.

Horelyų t’ą dene Cadet hodonełtęn k’ı (CIC) hulyé, CA ha ɂeghadalana, chu ɂąłnedhe dene ts’eranı̨ de t’ą Cadet chu JCR dene godhé hoɂą k’ı́ yatı detł’ıs ha hodonełtą sı chu t’ąt’u ɂedırı ląt’e ghą yatı hołe bası chu t’ąt’u nodhı́ ha. Dene ts’eranı̨ huto t’ą due halya sı ts’enı̨ ha yenı̨darenı̨ sı t’ą Dene k’enats’ı̨dher ɂası kaılé bel nodher de, ɂełtth’ı́ bel nodher huto Hosłı̨ne ha bek’enats’ı̨dher.

Ku ɂeyı datedhé nets’edı ha neba hoɂą t’ok’e beghą detł’ıs sı “Honezı Yatı Hųlı̨ ɂedırı ghą” ɂeją ɂerıhtł’ıs holı̨ k’e thela sı.

T’a Cadet Beghare Hoghedı chu Honeltęn Yatı beghare Hołé ha (CATOs) 13-24, Dene k’enats’ı̨dher ɂası kaılé t’ąt’u ɂeyı ch’ası chu sehulyé ha ɂeją thela sı  gharé ɂedırı hut’a sı t’ąt’u CJCR Gp ts’ı̨ yatı t’ąt’u ɂası k’enats’edé yatı hołe chu t’ąt’u ɂedırı t’oho nodher dé Dene k’enats’ı̨dher ɂası kaılé bası, hosłı̨ne bası due nedołthı́, hosłı̨ne ha Dene k’enats’ı̨dher ɂası kaılé huto due nodher de Hosłı̨ne k’esı ha. Dųhų, DND hots’ı̨ dene ɂeyı yatı godhé daghą sı t’ąt’u begharé ɂełk’esı t’ąt’u ɂası k’enats’edé ke ɂedırı ląt’e Dene k’enats’ı̨dher ɂası kaılé chu daghelɂa de.

Yati hołé chu t’ąt’u ɂedırı beghą t’oho Dene k’enats’ı̨dher ɂası kaılé tł’ąghe, Dene daghelɂa, t’oho Hosłı̨ne k’esı ha hú, Dene k’enats’ı̨dher ɂası kaılé Hosłı̨ne k’esı ha huto due halyá Hosłı̨ne ha:

Ku t’oho ɂedırı ghą hererı̨nı̨ ɂesónodher ghą Dene k’enats’ı̨dher ɂası kaılé de, ɂąłnedhe ɂedırı Cadets chu JCR t’a hoɂą ts’erenı̨ k’ı́ ɂedırı nodher de kudąne yeghą ɂası naıłna hoɂą.

Ku ɂeyı dene ttheré nadarełya k’ı kudąne ɂedırı dałtsı hoɂą:

• T’ą beł nodher sı hotıe sughua ba hoɂą chu honezı dene bel norełtth’er tth’ı́ ba sughua hoɂą.
• Yatı dek’erųtł’ıs t’anodher sı bası t’a nel nołtth’er sı ghą chu benalé t’anodher sı ghą.
• Ku ɂası nodher ghą yatı hełtsı hoɂą huto yeghą nı̨dhęn ɂedırı due nodher sı beghą.
• Ku t’oho t’anodher sı beghą yatı holı̨ de, t’ą yudaghe dełtth’ı́ sı bel k’ohodı hoɂą. T’a nets’ęn k’oldher neba t’ąt’u ɂası hoghedı sı yatı hełtsı hoɂą. Ku t’ą bel thı̨yı̨ sı t’ąt’u Ɂedırı Nodhı beghą yatı hołé k’e ɂası dałtsı hoɂą.
• Ku yatı nı̨t’ą tł’ąghe de, t’a Yeda t’ą K’odher huto t’ą ɂedırı ha K’oldher sı netthı́kuı hel kodı hoɂą. T’ą ɂedırı ɂası k’enadher sı t’a ɂası hoghedı nąderé neghaıyé de t’ok’e naı̨dher k’eyaghe chu t’a yatı holı̨ Ɂası Hoghedı yatı hoghedı gharé.
• Ku ɂeją t’a ɂeghadaladaı horelyų ɂedırı ląt’e ɂasıe danı́lɂı̨h ha nuheba hoɂąıle, kulı nets’ıdı ha nuheba hoɂą t’ąt’u nets’edı walı sı ha. Ku ɂedırı tth’ı ha nets’ıdı ha hoɂą ɂełtth’ıle hanılyą de t’oho ɂedırı DND/CAF hots’ı̨ nets’edı xa. Ɂeją ts’ęn naıyǫłtı DND/CAF Ombudsman bets’ęn. Ɂeją nets’ıdı ha nadarılya sı!

Cadets t’ąt’u honeltęn ha hoɂą

T’a Sughua ɂehena chu ts’ethı̨yę dene hel Nodhı ha (PHASE hulyé) t’ą nųt’ą Canadian Red Cross betł’esé nųt’ą nets’edı ha t’anı̨dhęn hu, t’ą nel naradé hu, t’ą sughua ha nets’enı̨ t’ok’e naı̨dher chu nets’enı̨ dalı̨ hobası. T’a ɂedırı nųt’ą sı bet’a t’ąt’u ɂası ts’ęn hı̨gha dene ts’ęnenı̨ hu, nenalé nodher de dene ts’ı̨nı̨ dąlı̨ ha.

PHASE ɂedırı t’a t’orełɂa hadé dene nı̨h sughua tthé k’e hoɂąsı (i.e. Nı̨łɂı̨h-Horı̨łtth’ągh-Ɂeła-Dųhųn) nets’edı ha t’ąt’u beghą yanełtı chu t’ąt’u ɂedų nųnı̨ɂą walı sı begharé nets’edı walı hųłɂa ha. Ɂedırı honeltęn k’ı hılchu hoɂą ɂedırı t’a Canadian Red Cross Psychological Dene nı̨h Sughua hobası gharé. T’a ɂedırı k’e hołé hadé t’ąt’u nęn chu nenaré dene naradé sı bel sughua ɂası k’enaı̨dher.

PHASE ɂedırı neba nųɂá bet’orı̨łthı́ ha:

• nenaré dene hel sughua hok’enadher,
• t’oho due nųnı̨dher de ts’ethı̨yę hothı̨łɂą,
• ɂası due nodher de kudąne bek’anı̨łta, chu
• nets’edı ha kanı̨ta kudąne t’a ɂası neba hųlı̨ sı hots’ı̨.

ku t’atthé ɂedırı PHASE hots’ı̨ honenełtąn t’oho bonı̨łthır de, nęn xaré Sughua hoɂą ha nunı̨ɂa chu t’ą Nets’enı̨ walı sı ha nunı̨ɂá ha. T’a thı̨łtsı̨ sı ɂedırı hel ha t’ąt’u nets’edı walı sı chu t’ą nets’ı̨nı̨ walı sı ghą yatı nełtsı ha.

T’ą K’oldé hodonełtęn

Horelyų CIC k’oldé, CA chu ɂąłnedhe ɂeghadalana t’a ɂedırı ts’edarenı̨ CJCR Gp dene godhé ha Nųt’ą ɂedırı ha hodonełtąn t’ąt’u yatı daghą chu t’ąt’u yeghą ɂası dałtsı hoɂą. Ku ɂeyı hel t’ąt’u nodhı hoɂą t’oho dene hel due nodher dé Hosłı̨ne bel due halya, Dene k’enats’ı̨dher ɂası kaılé chu Hosłı̨ne bası, t’ą ɂedırı nołther de Hosłı̨ne ha dene haı̨la de, Dene k’enats’ı̨dher ɂası kaılé, huto daghelɂa de.

Ɂeją ɂałų beghą yatı nı̨łɂı̨h he thela sı Dene nabı̨ t’a hoɂą sı hołé ha.

Honezı dene ts’edı ha t’a hųlı̨

• T’ok’e Cadets naradé sı t’a bets’edı ha hųlı̨, Dene godhé Canadian Rangers, chu t’ą Ɂeghadalana sı: Ɂedırı CJCR Gp tsątsąne benı̨ hųlı̨ k’e dene xa hųlı̨ sı Cadets, JCRs chu t’ą ɂeyer ɂası k’enadé t’oho ɂası ha bets’edı walı sı chu ha. https://www.canada.ca/en/department-national-defence/services/cadets-junior-canadian-rangers/support-resources-for-cadets-junior-canadian-rangers-and-adult-staff.html
• Sekuı̨ bets’edı ha t’ok’e ts’ęn dayałtı ha hoɂą horelyų dene ha hoɂąsı t’ą losı ɂedırı hel nadé sı ts’enı̨ 24 sadzıe dzı̨k’etł’a, 7 dzı̨ne dzırata k’etł’a. Ku bets’ęn yawųłtı nı̨dhęn de ɂeją nanı̨le dųłtsı 1-800-668-6868 huto bets’ęn dųtł’ıs ɂeją 686868. Ku neba horena beghą yanełtı, beghą dųtł’ıs. – Sekuı bets’edı ha beyeyatı k’é Help Phone
• T’ą Canadian Forces Denexal dene hobası bets’edı ha hoɂą ɂeją (CFMAP) is a dene nalé hılé, nanı̨le 24 sadzıe dzı̨k’etł’a, 7 dzı̨ne dzırata k’etł’a. CFMAP dene hel yatı tth’ı neba nųt’a ghonı̨ t’ą Cadets chu dene godhé Canadian Rangers hots’ı̨ hel. Ɂeją ɂeyı ha dųłtsı ɂedırı CFMAP ha nanı̨le 1-800-268-7708.
• Dene hosłı̨ne ha bel nodher de bets’edı chu t’a Ɂası hųlı̨ t’ok’e dene xa hoɂą (SMSRC): SMSRC dene ts’enı̨ ha hoɂą Cadets chu dene godhe JCRs 16-18 beghaıyé ts’ęn dųhų t’ą nadarełya chu hotthé Canadian Armed Forces Denexal dene daghı̨le chu National Defence nąne hoɂą dene ɂeghadalana ɂedırı hosłı̨ne ha bel due nodher de. Kulı, horelyų Cadets chu dene godhé JCRs hots’ı̨ ɂeyer ts’ęn hots’ı̨ bets’edı ha hoɂą. Nanı̨le ɂedırı SMSRC bebası ɂeja neba theɂą sı 1-844-750-1648. https://www.canada.ca/en/department-national-defence/services/benefits-military/health-support/sexual-misconduct-response.html
• DND Sı̨łta sehenųt’a chu t’a dene xa hoɂą (CSS): Horelyų ɂedırı dene nadarełya k’ı t’ok’e losı CSS hots’ı̨ dene bel yanełtı ha neba hoɂą nets’edı ha ɂedırı yatı nı̨ɂą de, noghedı chu sehenųt’a ha nel due nodher de. Dene t’ą Cadets chu dene godhé JCRs ts’eranı̨ sı ɂeją ts’ęn t’oho bel due nodher dé ba hoɂą bets’edı ha t’ą CSS hel ɂeghalana yatı chu bets’edı dąlı̨ ha. https://www.canada.ca/en/department-national-defence/services/benefits-military/conflict-misconduct/integrated-conflict-complaint-management.html