Canada hobets'ı̨ dëne darı̨lá kuę há k'óldé bası́ dëne ɂesólyá t'ąt'ú bets'edı́ (CSC) Vıctım servıces hulyé
ɂa ediri correctıonal Servıce Canada ts'ı̨ɂané (CSC) k'ı dëne t'ą nake nęnę ɂązı́ bedarı̨lá chu t'ą tını̨deł k'ı́ hodóghełnı́ sı há hoɂą sı ɂeją Canada k'eyaghë.
Ku ɂı̨łąghe ɂëdırı dëne bedarętı̨ hots'ęn ɂësónı̨lá nı̨dé hotıé dëne ɂëłk'esı́ hanónı́ldhën hoɂą. Ku ɂáłų ɂëdırı ghą yatıé horı̨lɂı̨h dé ɂëdırı CSC t'ąt'ú dëne ts'edı́ chu t'ą ɂësonılá bëghą t'á yatı́ hųlı̨ sı kónëts'edı́ horı̨lɂı̨h dé nëbá hoɂą́ sı.
Dëne kuę ɂı̨łaghë harálɂá chu haıyórı̨lá bası sı ɂedırı k'ı
ɂëją Canada nąne hoɂá dëne naradé k'ı́ hotıé ɂı̨łá kuę chu t'á haıyórılá daholá sı dëne xa bët'órëɂá k'ódorı́lyą sı. Dëne t'á ɂësólyá sı, t'á háyëłɂı̨h k'ı́ yëk'ólyą łı́. Ku t'ąhą ɂëdırı dëne ɂësónı̨lá k'ı́ beghą yatı nëghą nı̨łtth'ı́ ghónı horı̨łɂı̨h hutó horı̨łıɂı̨h hılé dekulı́. Nęn t'ánı̨dhen sı nësóraı́dı́ hoɂą.
Nęn t'ánı̨dhęn sı nëba hoɂą sı ɂëdırı ɂasıé hobası́
Nebá ɂëłk'ech'á hoɂą sı neyatıé dıtth'agh há. Ɂerıhtł'ıs horı̨lɂı̨h de CSC bets'ı̨ huto nets'edı́ hoɂą̨ sı t'ą dëne ɂësónı̨lá sı beghą horı̨lɂı̨h dé.
ɂëyı datëdhe ɂedırı dëne Vıctıms' Advısory Commıttee (VAC) dëne ts'eránı̨ xa dëne bel yatı́ nı̨ɂá nëbá hoɂą sı, ɂeyer dé neyatıé chu t'á yatıé ɂëłełyé t'á t'ąt'ú dëne hënarëdı́ ha ɂërıhtł'ıs hołé hoɂą t'ąt'ú dëne hënarëdı́ hu t'ąt'ú bets'edı́ hu xa.
Yatıé t'ąt'ú nëghą nı̨lyé há
Ku t'ą dëne ɂesónı̨lá bëghą yatı́ horı̨lɂı̨h dé CSS hutó PBC bets'ën nayathı̨łtı́ dé nëghą nı̨lyé xá. Ku ɂëdırı ɂërıhtł'ıs t'á t'ąt'ú dëne bëdarı̨lá chu bënarëdı́ k'ı́ ghą nı̨rı̨nı̨ xa. Ku bët'á nëbá sughuá sëhóɂą chu nághı̨dá xa dé nezų há. Ku ɂëłádųnë bëbá tth'ı́ yatı́ bá horı̨ker tth'ı́ nëbá hoɂą chu ɂëłádųné dëne nëbá yatı́ horeker horı̨łɂı̨́h dé nëba hoɂa sı́.
Ku ɂëdłąghë yatı́ bëghą nı̨t'á ɂësǫt'ılé ɂá?
Ku ɂedırı ɂërıhtł'ıs gharé dëne nakë nę̈nę ɂąsı́ bëdarı̨tą hots'ı̨ bënarëdı́ Correctıonal Condıtıonal Release Act (CCRA) hulyé k'ı́ dagharé t'ą dëne bëdarı̨tą ghą yatı́ bëtł'át'á.
- Dëne t'ą dué ɂá ɂësólyá hutó betth'ı́ huto benı̨ ɂá daghëłɂá dé ɂı̨łǫtá dëne t'á hát'ı̨ k'ı́ hats'edı́ sı,
- Dëne gá ts'ëdá huto bël nats'edher hu, dëne helot'ı̨né, ku dëne łeghąldher ha dëne nı̨rı̨łtł'ısı hu (e.g. dëne bá ɂeyá huto sekuı́ hęlı̨ de), dëne t'ą bënerı̨łtł'ıs dëne ts'enı̨ ha ɂësolyá dé hóhá, ɂeyı hutó
- Dënenałtsı́ dëne huto k'ódhere nëdhë ghą nayałtı́ nunı̨ɂą dé
Ku t'ą dëne ɂësónı̨lá bëghą ɂëdłaghé yatıé nëtł'alyá ɂësǫt'ehılé ɂá?
Ku nuhózëker tł'ąghë dé ɂedırı yatıé dëne tł'alyé ɂësǫt'ehılé sı:
- t'ą dëne dué honółther k'ı offender hulyé bezı́,
- t'ąnółther chu t'ok'é bësınıyanı̨tı́ kuę ghą yatı hu,
- t'ohó bëdarętą chu t'anı̨łthá hots'ę̈n bëdarę̈tą, chu
- Ku ɂëdırı dëne t'ą due nółther há badarı̨tą t'oho bënerëdı́ hu ɂëłotsëlë hots'ën tı̨ghá tth'ı́ bá nųt'á hu t'ohó ɂëdóghëlnı̨ hel tı̨dá dëne darı̨lá kuę hots'ı̨.
ɂëyı datëdhë tth'ı ɂëdırı yatıe nëtł'alyé ghonı́ ɂëdırı dëne bëghą:
- t'anëłt'é bëghaıyé;
- ɂałų bëdarı̨tą hutó t'oho bënarëdı́ chu t'ąt'é ɂá bëneredı́ ghą
- ku t'ok'e bëdarı̨tą t'olyé chu t'ok'e bëdarı̨tą sı nël kohodı́ hası̨;
- ku dëne t'ą bëdarı̨tą dı̨ltı́ dé t'ok'e hots'ę̈n dı̨ltı́ sı ghą yatı nëtł'at'á há;
- ku ɂëdırı dëne bëdarı̨tą huk'e bets'édı́ de sughua hots'ën narëghá ha, t'ąt'ú bets'ëdı́ sı ghą nel kohódı́ tth'ı́ hoɂą;
- ku ɂëdırı dëne due ɂá ɂësónołther de, t'anólther sı ghą yatı chu;
- t'oho ɂëdırı dëne ɂëłotsële hots'ën tı̨ghá halyé lá hutó, parole ɂëdoghëlnı́ hel beredı́ hutó t'ohó tı̨dá há;
- ku t'oho tı̨dá há horelker bá nųt'á dzı̨ne Parole Board of Canada hobëheł;
- ku ɂëłëtsële hots'ën tı̨ghá hadé t'ąt'é ɂá bá nųt'ą sı hobası́;
- ku t'ąt'ú ɂëdoghëłnı́ há yatı́ t'á bëtł'át'ą sı lá hu parole hu t'ohó bënarëdı́ sı há;
- ku ɂëdırı dëne ɂëłótsëlë hots'ën bënarëdı́ hadé t'ok'e nadher hu, lá hu, parole hutó bënarëdı́ dé ɂëdırı dëne t'ą dëne dué halá sı ts'ı̨dhılé hoɂı̨h há boghëdı́ sı ɂası́ ts'ën ghëgál dé; chu
- t'oho ɂëdırı dëne Parole Board Canada hots'ı̨ yëhayałtı́ há nųt'á.
T'ąt'ú yatıé nı̨ɂá horı̨łɂı̨h
Ku nę̈n hanı̨dhę̈n hu ɂałų yatı́ nı̨ɂá horı̨łɂı̨h dé nëba hoɂą sı, nel ɂëdırı t'anorëłtth'er ɂá ɂëdųhųn nel t'ahúɂą t'anı̨̨lá nı̨ ɂá ɂeyı chu ɂëdırı dëne ghą yatı́ sı bası́. Ku ɂëdırı yatı k'ı́ ɂëdırı dëne t'ąt'ú bënarëdı́ hadé ghą yatı hołé tth'ı́ há. Ku PBC tth'ı́ yët'á t'ąt'ú bënı́ dałtsı́ sı ghą bets'énenı̨ halá ɂëdırı dëne t'ąt'ú bënarëdı́ ts'ę̈n tth'ú.
Ku t'oho ɂedırı dëne bëghą yatı́ horı̨ker dé kots'edı́hılé sı ɂedırı ghą. Kulı, yatı́ nuhëgharı̨ɂą dé ɂëdırı dëne t'alyé sı ghą yatı́ hołé hıjá dé kóts'ëdı́ hoɂą, CSC kólyëłnı̨ hoɂą. Ku t'ok'e naı̨dher hu nets'ı̨ phone hu kots'ëdı́ ha hılé sı. Hotıe noghëdı́ hoɂą ɂeyı dé.
T'ok'e bets'ę̈n yanëłtı́ horı̨łɂı̨h dé
Ku CSC bets'ę̈n yanëłtı́ horı̨łɂı̨h dé Vıctım Servıces hobası chu yatı́ horı̨łɂ̨ı̨h dé ɂëją sı.
Bëyëyatı́ nanıhılé 1-866-806-2275
E-maıl tsątsąné bënı hųlı̨ k'é: vıctıms-vıctımes@csc-scc.gc.ca
Tsątsąné bënı̨ hųłı̨ k'é: https://www.canada.ca/en/correctional-service/services/you-csc/victims.html
Ku honésı yatı́ horı̨łɂı̨h dé ɂëją nanųtá lá
Canada ha Parole Board dëne dëłtth'ı – dëne ɂësólyá de bets'édı há Servıces for Vıctıms hulyé
Bëyëyatı nanı́hıle 1-866-789-4636
Tsątsąné bënı̨ hųlı̨ k'é www.pbc-clcc.gc.ca
Dënesını̨yanı̨tı́ há k'óldé Department of Justıce – Vıctıms fund dëne ts'édı́ ha tsąmbá
(dëne ts'édı́ Parole Board ɂëłá dëłtth'ı́ ɂëdırı dëne nënalé bëhayatı́ há
Bëyeyatı́ nanı́hılé 1-866-544-1007
Tsątsąné benı̨hųlı̨ k'é www.justıce.gc.ca
Canada nask'adhë ha dëne ts'ëdarenı́ dëne Ombudsman hulyé bets'ı̨ ɂërıhtł'ıs kuę ɂëją
Bëyëyatıı́ nanıhılé 1-866-481-8429
Tsątsąné benı̨hųlı̨ k'é www.victıctımsfırst.gc.ca