ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓂᑦ ᐃᓄᒃᑎᑐᑦ

• ᒐᕙᒪᑐᖃᓄᑦ ᑲᑎᖃᑎᖃᕐᓂᖏᓐᓂᑦ ᐅᓂᒃᑳᖅ ᑐᓴᖅᑕᖅᑕᑦᑎᓐᓂᑦ
• ᐋᖅᑭᒃᓯᒪᓂᖏᑦ
• ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᖅ
• ᐃᓄᐃᑦ ᐃᓱᒪᒋᔭᖏᑦ ᐊᑐᕈᓐᓇᕐᓂᖏᓐᓄᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓄᑦ ᐃᓄᒃᑎᑐᑦ
• ᓯᕗᒧᐊᖅᓯᒪᓂᖏᑦ ᐅᓪᓗᒥᒧᑦ
• 2024-2025 ᒐᕙᒪᑐᖃᒃᑯᑦ ᖃᑎᖃᑎᖃᕐᓂᖏᑦ ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓄᑦ ᐃᓄᒃᑎᑐᑦ ᓄᓇᕘᒥ
• ᐱᓕᕆᓂᐅᑉ ᐳᖅᑐᓂᖓᓄᑦ ᑲᑎᒪᔨᖏᑕ ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ
• ᑐᓴᖅᑕᕗᑦ
• ᐱᓕᕆᐊᒃᓴᖏᑦ ᑐᓵᔨᓄᑦ ᑎᑎᕋᕐᕕᖓᑕ
• ᖃᓄᐃᑦᑐᑦ ᐱᔨᑦᑎᕋᕐᓃᑦ ᐊᑐᐃᓐᓇᐅᑎᑕᐅᔪᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ
• ᒐᕙᒪᑐᖃᒃᑯᑦ ᐱᕕᖃᕐᓂᖏᑦ : ᐊᒡᕕᐊᕈᑏᑦ ᐊᒃᓱᕉᑏᓪᓗ
• ᐅᖃᐅᓯᐅᔪᑦ ᖃᐅᔨᔭᐅᔪᓂᑦ ᐱᓕᕆᔾᔪᓯᑦᑎᐊᕙᐅᓛᓪᓗ
• ᑭᖑᓪᓕᕐᒥ ᐱᓕᕆᐊᒃᓴᑦ
• ᐃᓚᓕᐅᓯᒪᔪᖅ A : PCH ᑮᓇᒧᑦ ᑲᑎᓐᓂᕐᒧᑦ ᐊᐱᖅᑯᑏᑦ
• ᐃᓚᓕᐅᓯᒪᔪᖅ B : ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᑎᒥᖏᓪᓗ ᓄᓇᕘᒥ
• ᐃᓚᓕᐅᓯᒪᔪᖅ C : ᖃᐅᔨᒪᔾᔪᑎᒃᓴᑦ : ᓄᓇᖃᖅᑳᖅᑐᑦ ᐃᓄᐃᑦ.
• ᐃᓚᓕᐅᓯᒪᔪᖅ D : ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥ ᓇᓗᓇᐃᖅᓯᔪᑦ ᐃᓄᒃᑎᑐᑦ
• ᐃᓚᓕᐅᓯᒪᔪᖅ E : ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᓂᕿᓄᑦ ᑐᕌᕈᑎᖏᑕ ᐊᔾᔨᖏᑦ ᐃᓄᒃᑎᑐᑦ
• ᐃᓚᓕᐅᓯᒪᔪᖅ F : ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᖃᐅᔨᒪᔾᔪᑎᒃᓴᖏᑦ ᓱᕈᓰᑦ ᐄᔭᕐᓗᒡᓂᖏᓐᓄᑦ

ᒐᕙᒪᑐᖃᓄᑦ ᑲᑎᖃᑎᖃᕐᓂᖏᓐᓂᑦ ᐅᓂᒃᑳᖅ ᑐᓴᖅᑕᖅᑕᑦᑎᓐᓂᑦ

ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓂᑦ ᐃᓄᒃᑎᑐᑦ [PDF version - 7.11 MB]

ᐋᖅᑭᒃᓯᒪᓂᖏᑦ

ᓄᓇᖃᖅᑳᖅᑐᑦ ᐅᖃᐅᓯᖏᑦ ᐊᑑᑎᖃᑦᑎᐊᖅᖢᑎᒃ ᐃᓚᒋᖕᒪᒋᑦ ᑭᓇᐅᓂᖏᓐᓄᑦ ᓄᓇᖃᖅᑳᖅᑐᑦ, ᐃᓄᐃᑦ ᒪᐃᑏᓪᓗ ᑲᓇᑕᒥ, ᐊᑑᑎᖃᑦᑎᐊᖅᖢᑎᒡᓗ ᖃᓄᖅ ᐃᓕᖅᑯᓯᑐᖃᑦ ᐊᑐᓚᐅᖅᑐᓪᓗ ᓇᓗᓇᐃᖅᑕᐅᖕᒪᖔᑕ, ᐅᖃᐅᓯᐅᓂᖏᓐᓄᑦ ᐊᓯᐅᔾᔭᐃᖅᑕᐅᓂᖏᓐᓄᓪᓗ. ᐊᑕᖏᖅᖢᑎᒃ ᓄᓇᖃᖅᑳᖅᑐᑦ ᐅᖃᐅᓯᖏᑦ ᐅᖃᓪᓚᒃᑕᐅᔪᑦ ᑲᓇᑕᒥ ᐊᓯᐅᑐᐃᓐᓇᕆᐊᖃᕋᓱᒋᔭᐅᔪᑦ, ᐊᕕᒃᑐᖅᓯᒪᓪᓗᑎᒃ “ᓂᑲᓇᖅᑐᑐᑦ” “ᐊᓯᐅᓕᒑᑦᑎᐊᓕᖅᑐᓄᑦ”.

ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᖅ

ᔫᓂ 2019ᒥ, ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᖅ (the Act) ᑯᐃᓐᒧᑦ ᐊᖏᖅᑕᐅᓚᐅᖅᑐᖅ, ᐃᓗᐃᑦᑐᒃᑯᑦ ᐊᑑᑎᖃᖅᖢᓂ ᐃᑲᔫᑕᐅᓂᐊᕋᒥ ᓄᓇᖃᖅᑳᖅᑐᓄᑦ ᐃᓄᖕᓄᑦ ᐅᑎᖅᑎᓪᓗᒋᑦ, ᐆᒻᒪᖅᑎᒃᑲᓐᓂᕐᓗᒋᑦ, ᐸᖅᑭᓗᒋᑦ ᓴᙱᒃᑎᒋᐊᕐᓗᒋᓪᓗ ᐅᖃᐅᓯᓂ.

ᐱᖁᔭᕐᔪᐊᖅ ᒪᓕᒋᐊᖃᖏᑦᑐᖅ ᐱᕕᓕᐅᖅᓯᒪᔪᓄᑦ ᒐᕙᒪᑐᖃᒃᑯᑦ ᐱᔨᑦᑎᕋᖅᑕᖏᓐᓄᑦᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ, ᐱᓕᕆᔾᔪᓯᓕᐅᖅᑐᖅ ᐊᑐᐃᓐᓇᐅᓂᖏᓐᓄᑦ ᐱᔨᑦᑎᕋᕐᓃᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᐱᔭᐅᔪᓐᓇᖅᑐᑦ ᐃᓕᓴᕆᔭᐅᓯᒪᔪᑎᒍᑦ ᐸᕐᓇᒃᑕᒃᑯᑦ.

ᐱᔨᑦᑎᕋᕐᓃᑦ ᐊᑐᐃᓐᓇᐅᑎᑕᐅᔪᓐᓇᖅᑐᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᒐᕙᒪᑐᖃᒃᑯᑦ ᑎᒥᖓ “ᐊᔪᖏᒃᑯᓂ ᓈᒻᒪᒃᑐᓄᓪᓗ ᐱᔪᒪᒍᑎᒃ ᑖᒃᑯᓄᖓ ᐱᔨᑦᑎᕋᕐᓂᕐᓄᑦ ᑖᔅᓱᒧᖓ ᐅᖃᐅᓯᕐᒧᑦ.” ᐱᖁᔭᕐᔪᐊᖅ ᐱᕕᖃᖅᑎᑦᑎᖕᒥᔪᖅ ᐱᔨᑦᑎᕋᕐᓂᕐᓂᒃ ᐊᑐᐃᓐᓇᐅᑎᑕᐅᓗᑎᒃ ᐊᖏᖃᑎᒌᒍᑎᑎᒍᑦ ᐊᓯᓄᑦ ᐳᖅᑐᓂᕐᓄᑦ ᒐᕙᒪᓄᑦ, ᓄᓇᖃᖅᑳᖅᑐᓄᑦ ᒐᕙᒪᓄᑦ ᓄᓇᖃᖅᑳᖅᑐᓄᑦ ᑎᒥᓄᓪᓘᓐᓃᑦ, ᐱᖃᓯᐅᖦᖢᒋᑦ ᐊᒃᓱᕉᑕᐅᔪᑦ ᓲᕐᓗᑐᑦ ᐃᓕᓐᓂᐊᕐᓃᑦ, ᖃᓄᐃᖏᓐᓂᖅ ᐊᐅᓚᑕᐅᓂᖏᓐᓄᓪᓗ ᐃᖅᑲᖅᑐᐃᓕᕆᓃᑦ

ᐱᖁᔭᕐᔪᐊᖅ ᐱᔪᓐᓇᖅᑎᑦᑎᔪᖅ ᒪᓕᒐᑦ ᓴᓇᔭᐅᓂᖏᓐᓄᑦ ᐊᐅᓚᑦᑎᔪᓄᑦ ᐊᑐᐃᓐᓇᐅᑎᑦᑎᓂᕐᓂᒃ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᐋᖅᑭᒋᐊᖅᑕᐅᔪᓐᓇᖅᑐᓄᑦ ᐃᒪᓐᓇ :

ᐃᓄᐃᑦ ᐃᓱᒪᒋᔭᖏᑦ ᐊᑐᕈᓐᓇᕐᓂᖏᓐᓄᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓄᑦ ᐃᓄᒃᑎᑐᑦ

ᐱᔪᒪᓂᖅᓴᐅᕙᓪᓕᐊᖕᒪᑕ ᐊᑐᕈᒪᔪᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ, ᐱᓗᐊᖅᑐᒥᒃ ᐃᓄᐃᑦ ᓄᓇᖓᓂ (ᓲᕐᓗᑐᑦ, ᑲᑎᖦᖢᑎᒃ ᐃᓄᐃᑦ ᓄᓇᖏᑦ ᑲᓇᑕᒥ ᐱᖃᓯᐅᖦᖢᒋᑦ ᐃᓄᕕᐊᓗᐃᑦ, ᓄᓇᑦᑎᐊᕗᑦ, ᓄᓇᕕᒃ ᓄᓇᕘᓪᓗ).

ᑖᓐᓇ ᓴᖅᑭᔮᖅᑎᑕᐅᔪᖅ ᑲᑐᔾᔨᔪᑦ ᒐᕙᒪᖃᑎᒌᖏᑦᑐᑦ ᐅᖃᖅᑕᖓᓂᒃ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᖅᑐᑦ ᐃᓄᐃᑦ ᐱᖁᔭᕐᔪᐊᑉ ᖃᓄᐃᒋᐊᕐᓂᕐᓄᑦ ᐸᕐᓇᐅᑎᖓᓂ, ᐱᖃᓯᐅᔾᔨᓪᓗᓂ ᐊᖏᖅᓯᒪᓂᕐᒥᒃ ᑲᓇᑕᒥ ᐃᑦᑕᕐᓂᓴᓕᕆᔨᑦ (PCH) ᐱᓕᕆᓗᒋᑦ ᓴᓇᔭᐅᖃᑎᒌᖕᓂᖏᑦ ᒪᓕᒋᐊᓖᑦ ᐃᓄᐃᑦ ᐊᖏᖅᑕᓄᑦ ᑎᒥᓄᑦ ᐃᑲᔪᕐᓗᒋᑦ ᐱᕕᓕᐅᖅᓯᒪᔪᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓄᑦ ᐃᓄᒃᑎᑐᑦ ᐃᓄᐃᑦ ᓄᓇᖓᓂ, ᐱᒋᐊᕈᑎᒋᓗᒍ ᓄᓇᕗᑦ.

ᐃᓄᐃᑦ ᓄᓇᖓᓂ ᐊᑐᐊᒐᖓ (INP) ᐊᒃᓱᕉᑎᖃᕆᕗᑦ ᐊᑐᕈᒪᔪᓄᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᐃᓄᒃᑎᑐᑦ ᐊᒃᓱᕉᑕᐅᓗᓂ ᓇᓗᓇᐃᖅᖢᒋᓪᓗ ᓴᓇᔭᐅᖃᑎᒌᖕᓂᖏᑦ ᒪᓕᒋᐊᓖᑦ, ᐊᖏᖃᑎᒌᑦ ᐋᖅᑭᒃᓯᒪᔪᓪᓗ, ᐊᑐᐃᓐᓇᐅᓗᑎᒃ ᐊᐅᓚᔾᔪᓯᖅᑎᑐᑦ ᐃᑲᔪᕈᑎᒋᓗᒋᑦ ᑖᔅᓱᒧᖓ ᖃᓄᐃᓐᓇᓱᒃᑐᒧᑦ.

60 ᐳᓴᓐᑦᐸᓗᐃᑦ ᐃᓄᖕᓂᑦ (ᑕᒪᒃᑮᒃ ᐃᓗᐊᓂ ᓯᓚᑖᓂᓗ ᐃᓄᐃᑦ ᓄᓇᖓᑕ) ᐅᖃᓚᐅᖅᑐᑦ ᐅᖃᓪᓚᒍᓐᓇᖅᖢᑎᒃ ᐃᓄᒃᑎᑐᑦ ᐅᖃᐅᓯᓂᒃ. ᐃᓄᒃᑎᑐᑦ ᐊᑕᖏᖅᑐᓂᒃ ᐅᖃᐅᓯᓕᒃ ᐅᖃᐅᓯᓕᒫᓄᑦ ᐃᓄᒃᑎᑐᑦ ᐅᖃᐅᓯᖃᑎᒌᓂ ᐱᖃᓯᐅᖦᖢᒋᑦ ᐃᓄᒃᑎᑐᑦ, ᐃᓄᐃᓐᓇᖅᑐᑦ ᐃᓄᕕᐊᓗᐃᓪᓗ.

ᐃᓄᒃᑎᑐᑦ ᐅᖃᓪᓚᐅᓯᐅᓛᖑᔪᖅ ᐅᖃᐅᓯᖅ 39,620 ᐅᖃᓪᓚᒍᓐᓇᖅᖢᑎᒃ, ᑭᖑᓂᖓᓂ ᐃᓄᐃᓐᓇᖅᑐᑎᑐᑦ (735 ᐅᖃᓪᓚᒍᓐᓇᖅᑐᑦ) ᐃᓄᕕᐊᓗᒃᑎᑐᓪᓗ (330 ᐅᖃᓪᓚᒍᓐᓇᖅᑐᑦ).

ᓯᕗᒧᐊᖅᓯᒪᓂᖏᑦ ᐅᓪᓗᒥᒧᑦ

ᐃᑲᔪᖅᑎ ᑐᖓᓕᕐᒧᑦ ᒥᓂᔅᑕᐅᑉ ᐊᐅᓚᑦᑎᔨᖏᑦ ᑲᑎᒪᔩᑦ ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ

ᑐᕌᖅᑎᓪᓗᒍ ᓯᕗᒧᐊᕐᓂᖓᑦ ᐊᑐᕈᒪᔪᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᐃᓄᒃᑎᑐᑦ, PCH ᐊᐅᓚᔾᔭᐃᓚᐅᖅᑐᑦ ᐱᓕᕆᕝᕕᐅᖃᑎᒌᖏᑦᑐᓄᑦ ᐃᑲᔪᖅᑎ ᑐᖓᓕᕐᒧᑦ ᒥᓂᔅᑕᒧᑦ ᐊᐅᓚᑦᑎᔩᑦ ᑲᑎᒪᔨᖏᓐᓂᒃ ᐊᑐᐃᓐᓇᐅᑎᑎᓂᕐᓄᑦ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ (the Committee) 2022ᒥ, ᐅᓪᓗᒥ ᐃᓄᖃᓕᖅᖢᓂ 21ᓂᒃ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᑎᒥᓂᒡᓗ ᐱᔨᑦᑎᕋᕐᓂᕐᓄᑦ ᐱᕕᓕᐅᖅᓯᒪᔪᓄᑦ ᐱᓕᕆᔭᒃᓴᓕᖕᓄᑦ.

ᐊᐅᓚᔾᔭᓚᐅᖅᑎᓪᓗᒋᑦ ᑲᑎᒪᔩᑦ, PCH ᑲᑎᖃᑎᖃᒐᔪᒃᑐᑦ ᓄᓇᕗᑦ ᑐᙵᕕᒃᑯᓐᓂᒃ (NTI) ᐸᕐᓇᒋᐊᓕᖅᖢᑎᒃ ᑭᖑᓕᕇᖓᔪᓂᒃ ᐱᓕᕆᔾᔪᓯᕐᒥᒃ ᐅᓄᕐᓂᖅᓴᓄᑦ ᐊᑐᕈᒪᔪᓄᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᐃᓄᒃᑎᑐᑦ. ᐱᒋᐊᕈᑏᑦ ᐅᖃᖃᑎᒌᖕᓃᑦ ᑐᕌᖓᓚᐅᖅᑐᑦ ᓴᓇᔭᐅᓂᖓᓄᑦ ᓇᐃᓴᖅᑕᐅᓂᖏᑦ ᓇᓗᓇᐃᕈᑎᒋᓗᒋᑦ ᑕᕝᕙᐅᕙᒌᖅᑐᓂᒃ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᐊᑐᐃᓐᓇᐅᔪᓄᑦ ᐃᓄᒃᑎᑐᑦ ᓄᓇᕘᒥ ᖃᐅᔨᓇᓱᒡᓗᓂᓗ ᐱᒋᐊᕈᑎᐅᔪᓐᓇᑐᐃᓐᓇᕆᐊᓕᖕᓂᒃ ᐱᓕᕆᓂᕐᓂᒃ ᐊᖏᒡᓕᒋᐊᕈᑕᐅᓗᑎᒃ ᑕᒪᑐᒧᖓ.

ᓇᐃᓴᖅᑕᐅᓂᖏᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᑦ ᐃᓄᒃᑎᑐᑦ

ᓇᐃᓴᖅᑕᐅᓂᖏᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᑦ ᐊᐅᓚᔾᔭᓚᐅᖅᑐᑦ ᓯᑎᐱᕆᒥ 2022 ᑐᓂᔭᐅᓪᓗᑎᒡᓗ 14 ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓄᑦ, ᐅᓄᕐᓂᖅᓴᑦ ᑮᓇᒧᑦ ᑕᕝᕙᐅᓪᓗᑎᒃ ᓄᓇᕘᒥ. ᖃᐅᔨᔭᐅᔪᑦ ᐅᖃᖅᐳᑦ ᐳᖅᑐᓂᖏᑦ ᐊᑐᕈᓐᓇᕐᓂᕐᓄᑦ ᖃᐅᔨᔭᐅᔪᓂᑦ ᖃᐅᔨᓚᐅᖅᑐᑦ ᐳᖅᑐᓂᖏᑕ ᐊᑐᐃᓐᓇᐅᓂᖏᑦ ᐊᔾᔨᒌᖏᓪᓚᖕᒪᑕ ᐱᓕᕆᕝᕕᖏᓐᓂ, ᐱᔨᑦᑎᕋᕐᓂᕐᓄᑦ ᐱᕕᓕᐅᖅᓯᒪᔪᑦ ᐱᕕᑭᑎᑕᐅᓪᓗᑎᒃ ᑐᑭᓯᔭᐅᓂᖏᓐᓄᑦ ᐃᓄᓕᒫᓂ ᑲᑎᒪᔪᓂ, ᐃᓄᒃᑎᑑᓕᖅᑎᑕᐅᓂᖏᓐᓄᑦ ᐊᐃᖅᑮᕕᖕᓂ ᖃᐅᔨᒪᔭᐅᔪᑦ, ᑮᓇᒧᓪᓘᓐᓃᑦ ᐱᔨᑦᑎᕋᕐᓂᕐᓂᒃ ᑐᓂᓯᓗᓂ ᐃᓄᒃᑎᑐᑦ-ᐅᖃᓪᓚᓲᓂᑦ ᐃᖅᑲᓇᐃᔭᖅᑏᑦ ᐊᑐᐃᓐᓇᐅᔭᕌᖓᑕ.

ᐱᔭᕇᓚᐅᖅᑎᓪᓗᒍ ᓇᐃᓴᐃᓂᖅ, PCH ᖃᐅᔨᓇᓱᓪᓚᓚᐅᖅᑐᑦ ᓇᓕᐊᓪᓗᐊᓂᒃ ᐱᓕᕆᕝᕕᖕᓂᒃ ᐊᑐᐃᓐᓇᐅᑎᑦᑎᔪᓂᒃ ᐸᕐᓇᒃᓯᒪᔪᓂᒃ ᐱᔨᑦᑎᕋᕐᓂᕐᓂᒃ ᐃᓄᒃᑎᑐᑦ ᑐᑭᓯᑦᑎᐊᒃᑲᓐᓂᕋᓱᒃᖢᒋᑦ ᐊᑐᖅᑐᑦ ᐱᓕᕆᔾᔪᓯᓂᒃ.

ᐱᒋᐊᕈᑏᑦ ᐱᓕᕆᔭᑦ

ᐱᓕᕆᕝᕕᒃᑯᑦ ᑲᑎᖃᑎᒋᓪᓗᒋᑦ ᐅᓄᖅᑐᓂᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᑦ, ᓄᓇᕗᑦ ᑐᙵᕕᒃᑯᓐᓂᒡᓗ, ᓇᓗᓇᐃᕋᓱᒃᖢᒋᑦ ᐱᒋᐊᕈᑏᑦ ᐱᓕᕆᔭᑦᑎᓐᓂ ᖃᐅᔨᒪᔾᔪᑕᐅᔪᓐᓇᖅᑐᑦ ᓴᓇᔭᐅᓂᖏᓐᓄᑦ ᐊᖏᖃᑎᒌᒍᑏᑦ ᐊᒻᒪᓗ ᐅᕝᕙᓘᓐᓃᑦ ᒪᓕᒋᐊᓖᑦ. ᑕᐃᒪᐃᒻᒪᑦ ᑖᒃᑯᓇᙵᑦ ᐱᓕᕆᔭᓂᑦ, ᖃᔅᓯᑲᓪᓚᑦ ᐱᒋᐊᕈᑏᑦ ᐱᓕᕆᔭᑦ ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓄᑦ ᐃᓄᒃᑎᑐᑦ ᐱᕕᖃᖅᐳᑦ ᐊᐅᓚᔾᔭᐃᔾᔪᑕᐅᓗᑎᒃ 2025-26ᒥ, ᑭᓯᐊᓂ ᑮᓇᐅᔭᑎᒍᑦ ᐊᔪᕈᑏᑦ ᐊᑐᐃᓐᓇᖅᐳᑦ ᓯᕗᒧᐊᕐᓂᖏᓐᓄᑦ ᐃᓚᖏᓐᓄᑦ ᐱᓕᕆᕝᕖᑦ.

2024-2025 ᒐᕙᒪᑐᖃᒃᑯᑦ ᖃᑎᖃᑎᖃᕐᓂᖏᑦ ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓄᑦ ᐃᓄᒃᑎᑐᑦ ᓄᓇᕘᒥ

2024-2025ᒥ, PCH ᐱᓕᕆᓚᐅᖅᑐᑦ ᐱᓕᕆᑦᑎᐊᖅᓯᒪᔪᓂᒃ ᑲᑎᓐᓂᕐᓄᑦ ᖃᓄᖅᑑᖅᓯᒪᔪᓂᒃ ᐊᖏᒡᓕᒋᐊᕈᑎᒋᓪᓗᒋᑦ ᖃᓄᐃᑕᐅᓇᓱᒃᑐᓄᑦ ᑐᑭᓯᑦᑎᐊᕐᓂᖅᓴᕆᔪᒪᓪᓗᒋᑦ ᐱᕕᖃᕐᓂᖏᑦ ᒐᕙᒪᑐᖃᒃᑯᑦ ᐊᑐᐃᓐᓇᐅᑎᑕᖏᓐᓄᑦ ᐱᔨᑦᑎᕋᕐᓂᕐᓂᒃ ᐃᓄᒃᑎᑐᑦ ᓄᓇᕘᒥ. ᑖᓐᓇ ᐱᓕᕆᓂᖅ ᖃᐅᔨᒪᔾᔪᑎᒋᓗᒍ ᐱᕕᓄᑦ ᓴᓇᔭᐅᓂᖏᓐᓄᑦ ᐊᖏᖃᑎᒌᑦ ᐊᒻᒪᓗ ᐅᕝᕙᓘᓐᓃᑦ ᒪᓕᒋᐊᓖᑦ ᐃᑲᔪᕈᑎᒋᓗᒋᑦ ᐱᖁᔭᕐᔪᐊᕐᒧᑦ.

ᐱᓕᕆᓂᐅᑉ ᐳᖅᑐᓂᖓᓄᑦ ᑲᑎᒪᔨᖏᑕ ᐊᑐᐃᓐᓇᐅᔪᓄᑦ ᐱᔨᑦᑎᕋᕐᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ

ᑐᓴᕋᓱᒡᕕᒋᓪᓗᒋᑦ ᐃᑲᔪᖅᑎ ᑐᖓᓕᕐᒧᑦ ᒥᓂᔅᑕᐊᐅᓚᑦᑎᔩᑦ ᑲᑎᒪᔨᖏᑦ, PCH ᐊᐅᓚᔾᔭᐃᓚᐅᖅᑐᑦ ᐱᓕᕆᓂᕐᒧᑦ ᐳᖅᑐᓂᕐᓄᑦ ᑲᑎᒪᔨᓂᒃ ᐅᑭᐊᒃᓵᒥ 19ᓂᑦ ᐱᓕᕆᕝᕕᖕᓂᑦ 2024ᒥ, ᑲᑎᒪᔨᖃᖅᖢᑎᒃ ᑎᒥᓂᓪᓗ (ᓇᓗᓇᐃᖅᓯᔪᑦ 1 - ᑲᑎᒪᔨᐅᔪᓄᑦ ᐱᓕᕆᓂᕐᒧᑦ ᐳᖅᑐᓂᕐᓄᑦ ᑲᑎᒪᔨᓄᑦ). ᑐᕌᖅᑕᖓᑦ ᑲᑎᒪᔩᑦ ᑐᑭᓯᑦᑎᐊᕐᓂᖅᓴᐅᓗᒋᑦ ᐅᓪᓗᒥᐅᔪᖅ ᐱᓕᕆᔭᐅᓯᒪᔪᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᑦ ᑎᒥᖏᓐᓂᓪᓗ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᐃᓄᒃᑎᑐᑦ ᓄᓇᕘᒥ.

ᓇᓗᓇᐃᖅᓯᒪᔪᑦ ᐅᖃᐅᓯᓖᑦ ᑲᑎᒪᔨᖏᓐᓂᒃ ᐱᓕᕆᓂᐅᑉ ᐳᖅᑐᓂᖓᓄᑦ ᑲᑎᒪᔨᖏᑕ

ᓯᑎᐱᕆ 2024ᒥᑦ ᐋᒡᒌᓯ 2025ᒧᑦ, PCH ᐊᐅᓚᑦᑎᓚᐅᖅᑐᑦ ᒪᕐᕉᖕᓂᒃ ᐱᓕᕆᓂᐅᑉ ᐳᖅᑐᓂᖓᓄᑦ ᑲᑎᒪᔨᖏᑕ ᑲᑎᒪᔪᓂᒃ 19ᓂᒡᓗ ᐊᑐᓂᓄᑦ ᐃᓄᖕᓄᑦ ᑲᑎᒪᓂᕐᓂᒃ ᐱᓕᕆᕝᕕᖕᓂ ᑎᒥᓂᓗ ᓇᓗᓇᐃᕋᓱᒃᖢᒋᑦ ᐱᕕᖃᕐᓃᑦ ᐊᑐᐃᓐᓇᐅᑎᑦᑎᓂᕐᓂᒃ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᐃᓄᒃᑎᑐᑦ ᓄᓇᕘᒥ ᐱᕕᒃᓴᓂᒡᓗ ᓱᓕᓄᑦ ᐊᖏᒡᓕᒋᐊᕐᓂᕐᓄᑦ ᑕᒪᑐᒪᓂ (ᓇᓗᓇᐃᖅᓯᔪᑦ 2 – 2024-2025 ᑲᑎᓐᓂᕐᒧᑦ ᐱᓕᕆᔭᑦ).

ᑲᑎᓐᓃᑦ ᑐᕌᖓᓚᐅᖅᑐᑦ ᐅᑯᓄᖓ :

• ᐃᖅᑲᓇᐃᔭᖅᑎᓄᑦ ᐱᕕᖃᕐᓂᖅ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᐃᓄᒃᑎᑐᑦ (ᓲᕐᓗᑐᑦ ᐃᖅᑲᓇᐃᔮᖃᕐᓂᖅ ᓄᖅᑲᑎᑦᑎᖏᓐᓂᕐᓗ);
• ᐱᖃᕆᐊᖃᕐᓂᖅ ᓇᓕᐊᓪᓗᐊᑕᓄᑦ ᐊᔪᙱᓗᐊᖅᑕᒥᓂᒃ (ᓲᕐᓗᑐᑦ ᑐᓵᔨᐅᓂᖅ, ᖃᕋᓴᐅᔭᓕᕆᔨᐅᓂᖅ);
• ᐊᑐᐃᓐᓇᐅᔪᑦ ᑲᑎᓯᒪᔪᑦ ᐅᖃᓪᓚᒃᑏᑦ ᓇᓕᐊᓪᓗᐊᑕᓄᑦ ᑭᓱᓕᕆᔪᓄᑦ; ᐊᒻᒪᓗ
• ᑮᓇᐅᔭᑎᒍᑦ ᒪᓕᒋᐊᓖᑦ.

ᑮᓇᒧᑦ ᑲᑎᓐᓂᕐᒧᑦ ᑲᑎᒪᓂᖅᑎᒍᑦ, PCH ᖃᐅᔨᓇᓱᓚᐅᖅᑐᑦ ᐃᓕᓐᓇᓱᒃᖢᑎᒃ ᐱᔨᑦᑎᕋᕐᓂᕐᓂᒃ ᒐᕙᒪᑐᖃᒃᑯᑦ ᐱᓕᕆᕝᕕᖏᑕ ᑎᒥᖏᑕᓗ ᐊᑐᐃᓐᓇᐅᑎᑕᖏᓐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ, ᐱᓗᐊᖅᑐᒥᒃ ᐃᓄᒃᑎᑐᑦ ᓄᓇᕘᒥ. ᑖᒃᑯᐊ ᐱᖃᓯᐅᔾᔨᓚᐅᖅᑐᑦ ᑐᑭᓯᓂᖅᓴᐅᓗᑎᒃ ᐅᑯᓂᖓ :

• ᐅᓪᓗᒥᐅᔪᖅ ᐱᓕᕆᔭᐅᔪᑦ ᐱᓕᕆᕝᕕᖏᓐᓂ ᐊᑐᐃᓐᓇᐅᑎᑦᑎᓗᑎᒃ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ. ᑖᒃᑯᐊ ᐱᖃᓯᐅᔾᔨᔪᓐᓇᖅᑐᑦ ᒥᑭᑦᑐᓂᒃ ᐱᒋᐊᕈᑎᓂᒃ ᐱᒋᐊᕈᑎᓂᒡᓗ ᐱᓕᕆᔭᓄᑦ;
• ᓯᕗᓂᕐᒥ ᐸᕐᓇᒃᑕᑦ ᐱᓕᕆᔭᑦ (ᐱᑕᖃᕈᓂ);
• ᐅᓪᓗᒥᐅᔪᖅ ᐱᕕᖃᕐᓂᖅ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᐊᑐᖅᐸᒌᖅᑐᓄᑦ ᐃᓗᐊᓂ ᐱᓕᕆᕝᕖᑦ ᐱᑕᖃᖏᑦᑐᓪᓗ ᐊᒃᑐᐊᔪᓄᑦ ᐱᓕᕆᕝᕖᑦ ᐱᕕᖃᕐᓂᖏᓐᓄᑦ ᐱᔭᐅᔪᒪᓂᖏᓐᓄᓪᓗ ᐱᔨᑦᑎᕋᕐᓃᑦ; ᐊᒻᒪᓗ
• ᐃᓱᒪᒋᔭᑦ ᐊᒃᑐᐊᔪᓄᑦ ᐊᒡᕕᐊᕈᑎᓗᑦ. ᐊᒃᓱᕈᕐᓇᖅᑐᓄᑦ, ᐃᓕᑕᓄᓪᓗ.

ᑲᑎᓐᓂᕐᒧᑦ ᐊᐱᖅᑯᑏᑦ ᓴᓇᔭᐅᓪᓗᑎᒃ ᓇᓕᐊᓪᓗᐊᑕᓄᑦ ᐊᐱᖅᑯᑎᖃᖅᖢᑎᒃ ᐃᑲᔫᑕᐅᓂᐊᕋᒥᒃ ᐅᖃᖃᑎᒌᖕᓂᕐᓄᑦ ᑲᑎᓐᓂᕐᒧᑦ ᑲᑎᒪᓂᖅᑎᒍᑦ. ᑕᑯᒍᒃ : ᐃᓚᓕᐅᓯᒪᔪᖅ A : PCH ᑮᓇᒧᑦ ᑲᑎᓐᓂᕐᒧᑦ ᐊᐱᖅᑯᑏᑦ

ᑐᓴᖅᑕᕗᑦ

ᐱᓕᕆᕝᕖᑦ ᑎᒦᓪᓗ ᑕᕝᕙᐅᔪᑦ ᓄᓇᕘᒥ

ᐅᓄᕐᓂᖏᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᑎᒥᖏᓪᓗ ᑕᕝᕙᐅᓗᓂ ᑎᑎᕋᕐᕕᓖᑦ ᓄᓇᕘᒥ ᐊᔾᔨᒌᖃᑦᑕᖏᒻᒪᑕ ᖃᐅᔨᔭᐅᓪᓗᑎᒡᓗ ᐱᓕᕆᔭᑦ ᖃᓄᐃᑦᑑᓂᖏᓐᓄᑦ ᐱᓕᕆᔭᓄᑦ. ᐱᓕᕆᕝᕖᑦ ᐱᔨᑦᑎᕋᕐᓂᕐᓂᒃ ᑐᓂᓯᓂᕐᓂᒃ ᐱᓕᕆᐊᒃᓴᓖᑦ ᐅᓄᓛᓂᑦ ᑎᑎᕋᕐᕕᖃᖅᐳᑦ ᓄᓇᕘᒥ. ᑲᓇᓂ ᑎᑎᕋᖅᓯᒪᕗᑦ ᐃᓚᖏᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᑎᒥᖏᓪᓗ ᑕᕝᕙᐅᓪᓗᑎᒃ ᑎᑎᕋᕐᕕᓖᑦ ᓄᓇᕘᒥ. ᓇᓗᓇᐃᖅᓯᓯᒪᔪᖅ ᓄᓇᙳᐊᖅ ᑕᑯᔭᐅᔪᓐᓇᖅᐳᖅ ᓱᓕᓂᒃ ᐃᒡᓗᓂᒃ ᓇᓗᓇᐃᖅᓯᓪᓗᑎᒃ ᐃᓗᐊᓂ ᐃᓚᓕᐅᓯᒪᔪᑦ. ᑕᑯᒍᒃ : ᐃᓚᓕᐅᓯᒪᔪᖅ B : ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᑎᒥᖏᓪᓗ ᓄᓇᕘᒥ.

ᐱᓕᕆᐊᒃᓴᖏᑦ ᑐᓵᔨᓄᑦ ᑎᑎᕋᕐᕕᖓᑕ

ᑐᓵᔨᓄᑦ ᑎᑎᕋᕐᕕᖓ ᐃᑲᔪᖅᑐᖅ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᑎᒥᖏᓐᓂᒡᓗ ᐊᑐᐃᓐᓇᐅᑎᑦᑎᓪᓗᑎᒃ ᑐᓵᔨᓂᑦ ᐱᔨᑦᑎᕋᕐᓂᕐᓂᒃ 59 ᐸᓗᖕᓄᑦ ᓄᓇᖃᖅᑳᖅᑐᓄᑦ ᐅᖃᐅᓯᓄᑦ. ᐅᓪᓗᒥᐅᔪᕐᓕ, ᑲᙳᒋᔭᐅᖏᑦᑐᑐᐊᑦ ᑎᑎᕋᑦ ᑐᒃᓯᕋᖅᑕᐅᔪᓐᓇᖅᐳᑦ ᐊᓯᐊᓄᑦ ᐅᖃᐅᓯᐅᓕᖁᔭᐅᓗᒋᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ (ᑲᙳᓇᖅᑐᑦ ᓴᐳᔾᔭᓪᓘᓐᓃᑦ B ᐊᓯᐊᓄᑦ ᐅᖃᐅᓯᕈᖅᑕᐅᔪᓐᓇᖏᑦᑐᑦ).

44 ᐸᓗᐃ ᐃᒻᒥᓄᑦ ᑐᓵᔩᑦ ᐅᓪᓗᒥᐅᔪᖅ ᐊᑎᓕᐅᖅᓯᒪᕗᑦ ᐊᑐᐃᓐᓇᐅᓪᓗᑎᒡᓗ ᐊᑐᐃᓐᓇᐅᑎᑦᑎᓪᓗᑎᒡᓗ ᑐᓵᔨᓂᑦ ᐱᔨᑦᑎᕋᕐᓂᕐᓂᒃ ᐃᓄᒃᑎᑐᑦ. ᑐᓵᔨᓄᑦ ᑎᑎᕋᕐᕕᖓ ᐱᕕᖃᖅᑐᖅ ᐊᓯᐊᓄᑦ ᐅᖃᐅᓯᙳᖅᑎᓪᓗᒋᑦ ᐅᑯᐊ ᐃᓄᒃᑎᑐᑦ ᐅᖃᐅᓰᑦ :

• ᐃᓄᐃᓐᓇᖅᑐᑎᑐᑦ (11 ᐃᒻᒥᓄᑦ ᑐᓵᔩᑦ);
• ᐃᓄᒃᑎᑐᑦ (19 ᐃᒻᒥᓄᑦ ᑐᓵᔩᑦ);
• ᐃᓄᕕᐊᓗᒃᑎᑐᑦ (7 ᐃᒻᒥᓄᑦ ᑐᓵᔩᑦ);
• ᕿᑭᖅᑖᓘᑉ ᐅᐊᖕᓇᖓ (3 ᐃᒻᒥᓄᑦ ᑐᓵᔩᑦ);
• ᓄᓇᕕᒃ (4 ᐃᒻᒥᓄᑦ ᑐᓵᔩᑦ); ᐊᒻᒪᓗ
• ᕿᑭᖅᑖᓘᑉ ᓂᒋᐊ (2 ᐃᒻᒥᓄᑦ ᑐᓵᔩᑦ).

ᑐᓵᔨᓄᑦ ᑎᑎᕋᕐᕕᖓ ᐱᓕᕆᖃᑎᖃᑲᐅᑎᒋᓲᑦ ᐱᓕᕆᖃᑎᓂᒃ ᐱᕈᖅᓴᐃᓂᐊᕋᒥᒃ ᐱᓕᕆᖃᑎᒌᖕᓂᕐᓂᒃ ᐃᓕᓴᕆᓗᒋᓪᓗ ᑐᓵᔨᓄᑦ ᑲᓐᑐᕌᑦ ᐃᓄᒃᑎᑐᑦ ᐃᒻᒥᓄᑦ ᑐᓵᔨᓄᑦ.

ᓱᓕᓗ, ᑐᓵᔨᓄᑦ ᑎᑎᕋᕐᕕᖓ ᐊᐅᓚᑦᑎᑲᑕᒃᓯᒪᔪᖅ ᑐᓵᔨᓄᑦ ᐊᔪᕈᓐᓃᖅᓴᓂᕐᓂᒃ ᐃᑲᔫᑎᒋᓗᒋᑦ ᐃᓄᒃᑎᑐᑦ ᑐᓵᔨᓄᑦ ᐱᓕᕆᔭᓄᑦ.

2023-2024ᒥ, ᑐᓵᔨᓄᑦ ᑎᑎᕋᕐᕕᖓ ᐃᓄᒃᑎᑑᓕᖅᑎᑦᑎᓚᐅᖅᑐᑦ ᐅᖓᑖᓂ 880,000 ᐅᖃᐅᓰᑦ ᖃᓪᓗᓈᑎᑐᓂᑦ ᐅᖓᑖᓂᓗ 3,500 ᑕᐅᒎᓰᑦ ᐅᐃᕖᓂᑦ ᐃᓄᒃᑎᑐᒧᑦ.

ᖃᓄᐃᑦᑐᑦ ᐱᔨᑦᑎᕋᕐᓃᑦ ᐊᑐᐃᓐᓇᐅᑎᑕᐅᔪᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ

ᐃᓗᐊᓂ ᑲᑎᓐᓂᕐᒧᑦ ᑲᑎᒪᓂᖅᑎᒍᑦ, ᐱᓕᕆᕝᕖᑦ ᑎᒦᓪᓗ ᐅᖃᐅᓯᖃᖃᑦᑕᓚᐅᖅᑐᑦ ᖃᓄᐃᑦᑐᓄᑦ ᐱᔨᑦᑎᕋᕐᓂᕐᓂ ᐅᓪᓗᒥᐅᔪᖅ ᐊᑐᐃᓐᓇᐅᑎᑕᐅᔪᓄᑦ ᐃᓄᒃᑎᑐᑦ. ᐊᑕᖏᑲᓴᒃᑐᑦ ᐱᔨᑦᑎᕋᕐᓃᑦ ᐊᑐᐃᓐᓇᐅᑎᑕᐅᔪᑦ ᐊᕕᒃᓯᒪᔪᕐᓄᐊᖅᑕᐅᔪᓐᓇᖅᑐᑦ ᑎᑎᕋᖅᓯᒪᔪᑎᑐᑦ ᑮᓇᒧᓪᓘᓪᓃᑦ ᐱᔨᑦᑎᕋᕐᓂᕐᓂᑦ ᐱᕕᓕᐅᖅᓯᒪᔪᓄᑦ.

ᑎᑎᕋᑦ ᐃᓄᒃᑎᑑᓕᖅᑎᑕᐅᔪᑦ

ᐱᓕᕆᕝᕖᑦ ᑎᒦᓪᓗ ᐊᔾᔨᒌᖏᑦᑐᓂᒃ ᐊᔪᕆᖅᓱᐃᓚᐅᖅᑐᑦ ᐱᓕᕆᔾᔪᓯᕐᒥᓄᑦ ᑎᑎᕋᖅᓯᒪᔪᑦ ᐃᓄᒃᑎᑑᓕᖅᑎᓐᓇᓱᒃᑐᓄᑦ. ᐃᓚᖏᑦ ᑎᑎᕋᐅᒐᔪᒃᑐᑦ ᐱᖃᓯᐅᔾᔨᓪᓗᑎᒃ ᑎᑎᕋᖅᓯᒪᔪᓂᒃ ᐃᓄᒃᑎᑑᓕᖅᑕᓂᒃ ᐱᓕᕆᕝᕕᖕᓂᑦ ᓇᓗᓇᐃᓯᔪᓂᒃ, ᐊᑭᓐᓇᒥᐅᑕᓂᒃ ᑎᑎᕋᓂᒃ, ᐊᐃᖅᑮᕕᖕᓄᓪᓘᓐᓃᑦ ᑎᑎᕋᓂᒃ. ᐱᓕᕆᕝᕖᑦ ᐃᓄᒃᑎᑑᓕᖅᑎᑦᑎᒐᔪᒃᐳᑦ ᐱᔭᕆᐊᖃᓕᕌᖓᒥᒃ ᑕᒪᒃᑮᖕᓄᓪᓘᓐᓃᑦ ᐊᑐᖅᑕᐅᔪᒪᓂᖏᑦ ᒪᓕᒃᖢᒋᑦ ᐱᔨᑦᑎᕋᕐᓂᐅᑉ.

ᑕᐃᒪᐃᖏᓐᓇᖅᑐᓂᒃ ᑐᓵᔨᖃᕐᓂᖅ

ᐅᖃᖅᑐᒧᑦ ᑲᓇᑕᒥ ᑖᒃᓯᓕᕆᔨᓂᑦ ᑭᐅᔪᒥᑦ, ᐱᓕᕆᕝᕕᒃ ᐊᑐᖅᑐᑦ ᑭᖑᓕᕇᖓᔪᒥᒃ ᐱᖅᑯᓯᕐᒥᒃ ᐃᓄᒃᑎᑑᓕᖅᑎᑦᑎᓂᕐᓄᑦ ᐃᓄᒃᑎᑑᓕᖅᑎᑦᑎᓲᖑᓪᓗᑎᒡᓗ ᑎᑎᕋᓂᒃ ᐊᒃᑐᐊᔪᓄᑦ ᑖᒃᓯᓄᑦ ᐃᑲᔫᑎᓄᓪᓗ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ. ᑖᓐᓇ ᐱᖃᓯᐅᔾᔨᔪᖅ ᑕᒪᒃᑮᖕᓂᒃ ᐊᐃᖅᑮᕕᖕᓂᒃ ᑎᑎᕋᓂᒡᓗ ᓴᓇᓯᒪᔪᓂᒃ ᐅᖃᐅᓯᖃᖅᑐᓂᒃ ᑖᒃᓯᓂᑦ ᐃᑲᔫᑎᓂᒃ ᓄᓇᖃᖅᑳᖅᑐᓄᑦ ᓄᓇᓕᖕᓄᑦ. ᑲᓇᑕᒥ ᑖᒃᓯᓕᕆᔩᑦ ᐃᓚᓕᐅᑎᓯᒪᔪᑦ ᓄᓇᖃᖅᑳᖅᑐᓄᑦ ᐱᖃᖅᑎᑦᑎᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᐃᓄᒃᑎᑑᓕᖅᑎᑦᑎᓂᕐᓄᑦ ᐊᑐᕐᓗᑎᒃ ᓯᓚᑎᒥᓂᑦ ᓄᓇᖃᖅᑳᖅᑐᓄᑦ ᐃᓄᒃᑎᑑᓕᖅᑎᑦᑎᓂᕐᓄᑦ ᐱᔨᑦᑎᕋᕐᓂᕐᓂᒃ.

ᑐᒃᓯᕋᖅᑐᑦ ᐃᓄᒃᑎᑑᓕᖅᑎᓪᓗᒋᑦ ᐊᐃᖅᑮᕕᒃ ᑎᑎᕋᓪᓗ ᑎᓕᐅᕈᑕᐅᓚᐅᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂᑦ (ITK) ᐃᓄᖕᓄᑦ ᐃᑲᔫᑕᐅᓂᐊᕋᒥᒃ ᑖᒃᓯᓕᕆᓇᕐᒥ. ᑐᓴᕋᓱᒡᕕᒋᓪᓗᒋᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᒐᕙᒪᖓᓗ ᓄᓇᕘᑉ, ᑲᓇᑕᒥ ᑖᒃᓯᓕᕆᔩᑦ ᓂᕈᐊᓚᐅᖅᑐᑦ ᕿᑭᖅᑖᓘᑉ ᐅᐊᖕᓇᖓᑕ ᐅᖃᐅᓯᖓᓂᒃ ᐃᓄᒃᑎᑑᓕᖅᑎᑦᑎᓂᕐᓄᑦ ᐸᕐᓇᐅᑎᖏᓐᓄᑦ ᐅᓄᖅᓯᒋᐊᕈᑎᒋᓪᓗᒍ ᑎᑎᕋᖅᓯᒪᔪᓄᑦ ᐃᓄᒃᑎᑑᓕᖅᑎᑦᑎᔨᒪᔪᓄᑦ ᐊᐃᖅᑮᕕᖕᒥ.

ᑲᓇᑕᒥ ᑖᒃᓯᓕᕆᔩᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᑦ ᖃᐅᔨᒪᔾᔪᑎᒃᓴᓂᒃ : ᓄᓇᖃᖅᑳᖅᑐᑦ ᐃᓄᐃᑦ Canada.ca ᒥ 17 ᓄᓇᖃᖅᑳᖅᑐᓄᑦ ᐅᖃᐅᓯᖏᓐᓄᑦ, ᐱᖃᓯᐅᖦᖢᒋᑦ ᐃᓄᒃᑎᑐᑦ. ᑕᑯᒍᒃ ᐃᓚᓕᐅᓯᒪᔪᖅ C: ᖃᐅᔨᒪᔾᔪᑎᒃᓴᑦ : ᓄᓇᖃᖅᑳᖅᑐᑦ ᐃᓄᐃᑦ. ᐃᓕᓴᕆᓪᓗᒋᑦ ᐅᓄᖅᑐᑦ ᐳᓴᓐᑦᖏᑦ ᐃᓄᒃᑎᑐᑦ ᐅᖃᐅᓯᕆᔭᐅᔪᑦ ᐃᓄᖕᓄᑦ ᑲᓇᑕᒥ, ᑎᒥᖓ ᐃᓄᒃᑎᑑᓕᖅᑎᑦᑎᓯᒪᔪᑦᑕᐅᖅ ᐃᑲᔪᓚᐅᖅᑕ ᐃᓕᖕᓂᒃ ᐃᑲᔫᑎᑎᑦ ᐱᓗᒋᑦ (LUHYGYB) ᐊᔪᕆᖅᓱᐃᔪᓂᒃ ᐃᓄᒃᑎᑐᓄᑦ (ᐅᐊᖕᓇᖓ ᕿᑭᖅᑖᓘᑉ) ᐊᑐᐃᓐᓇᐅᑎᖦᖢᒍᓗ ᐊᑐᒐᒃᓴᖅ ᑲᓇᑕᒥ ᑖᒃᓯᓕᕆᔨᓄᑦ, ᐱᔨᑦᑎᕋᕐᓃᑦ ᑲᓇᑕᒥᒃᑯᓐᓄᑦ ᓄᓇᖃᖅᑳᖅᑐᓄᑦ ᐱᔨᑦᑎᕋᕐᓃᑦ ᑲᓇᑕᒥᒃᑯᓐᓄᓪᓗ, ᐱᖃᓯᐅᖦᖢᒋᑦ ᑲᓇᑕᒥ ᑖᒃᓯᓕᕆᓂᕐᓄᑦ ᐅᑭᐅᖅᑕᖅᑐᓂ ᐱᔨᑦᑎᕋᕐᕕᖓ ᐃᖃᓗᖕᓂ.

ᑲᓇᑕᒥ ᑖᒃᓯᓕᕆᔩᑦ ᑐᓴᕋᓱᒃᑐᓕᕆᔨᓖᑦ ᐱᓕᕆᖃᑎᖃᑦᑎᐊᓲᑦ ᓄᓇᖃᖅᑳᖅᑐᑦ ᓄᓇᓕᖕᓂᒃ ᐃᑲᔪᓲᖑᓪᓗᑎᒡᓗ ᑖᒃᓯᓄᑦ ᐊᒃᑐᐊᔪᓄᑦ ᐊᐱᖅᑯᑎᓄᑦ. ᑕᐃᒪᓐᓇ ᐊᑑᑎᖃᑦᑎᐊᖅᓯᒪᕗᖅ ᑐᓴᕌᖓᑦᑕ ᓄᓇᖃᖅᑳᖅᑐᓂᑦ ᓄᓇᓕᖕᓂᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐊᑐᕆᐊᓕᖕᓄᑦ ᑖᒃᓯᓕᕆᓂᕐᓄᑦ ᐊᑲᔫᑎᓄᓪᓗ ᐊᐱᖅᑯᑎᓄᑦ.

ᑲᓇᑕᒥ ᑭᖕᒧᑦ ᐃᑭᒪᔪᑦ ᐸᓖᓰᑦ (RCMP) ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᑦ ᐅᓄᖅᓯᕙᓪᓕᐊᔪᑦ ᐃᓄᓕᒫᓅᖓᔪᑦ ᓇᓗᓇᐃᖅᓯᔪᓂᒃ ᑎᑎᕋᖅᓯᒪᔪᓂᒡᓗ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᐸᓖᓯᒃᑯᕕᖕᓂ ᐱᔨᑦᑎᕋᖅᑐᓄᑦᓄᓇᖃᖅᑳᖅᑐᑦ ᓄᓇᓕᖏᓐᓂ ᑲᓇᑕᐅᑉ ᐃᓗᐊᓂ. ᐃᓚᖏᓐᓂ ᑖᒃᑯᐊ ᐱᖃᐅᓯᔾᔨᓲᑦ ᑎᓕᐅᕆᔪᓂᒃ ᖃᐅᔨᓴᕐᓂᕐᓄᑦ ᐱᕋᔭᒃᓯᒪᓂᕐᒪᖔᑕ ᐱᖁᔭᓕᕆᔨᒥᒡᓘᓐᓃᑦ ᐅᖃᖃᑎᖃᕐᓗᓂ ᑎᒍᔭᐅᓯᒪᔪᒧᑦ. ᐸᓖᓯᒃᑯᑦ ᓴᓇᓯᒪᖕᒥᔪᑦ ᑎᑎᕋᓂᒃ ᐃᖅᑲᓇᐃᔭᖅᑎᖏᓐᓄᑦ ᐃᑲᔫᑕᐅᓂᐊᖅᑐᓂᒃ ᐅᖃᐅᓯᐅᒐᔪᒃᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᓄᓇᓕᖕᒥᐅᓂᒃ ᐅᖃᖃᑎᖃᓕᕌᖓᒥᒃ ᐱᔨᑦᑎᕋᕐᕕᒋᔭᕐᒥᓂ.

ᐱᔨᑦᑎᕋᕐᓃᑦ ᑲᓇᑕᒥ ᐱᓕᕆᔨᖏᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᓲᑦ ᐊᒃᑐᐊᔪᓄᑦ ᐱᔨᑦᑎᕋᕐᓂᕐᓄᑦ ᐃᑲᔫᑎᓄᓪᓗ ᑲᓇᑕᒥᐅᓄᑦ, ᓲᕐᓗᑐᑦ ᐊᒃᑐᐊᔪᓄᑦ ᑲᓇᑕᒥ ᐃᓐᓇᖅᓯᐅᑏᑦ ᐸᕐᓇᐅᑎᖏᓐᓄᑦ ᐃᑲᔫᑎᓄᓪᓗ. ᑐᓴᖅᑎᓐᓇᓱᒃᖢᒋᑦ ᑐᓴᖅᑎᑦᑐᒪᔭᓂ, ᑐᓴᕋᓱᒃᑐᓄᑦ ᑐᓴᐅᒪᔭᐅᔾᔪᑎᓄᓪᓗ ᐱᖁᑎᓄᑦ, ᐱᖃᓯᐅᖦᖢᒋᑦ ᐃᓅᖃᑎᒌᓄᑦ ᑐᓴᒐᒃᓴᑦ ᕙᐃᔅᐳᒃᑯᑦ ᐊᓯᓄᑦ ᐅᖃᐅᓯᓅᓕᖅᑎᑕᐅᒐᔪᒃᑐᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ.

ᐅᑭᐅᖅᑕᖅᑐᓄᑦ ᑐᓴᐅᒪᔭᐅᓂᕐᓄᑦ ᖃᓄᖅᑑᖅᓯᒪᔪᓄᑦ ᑲᑎᒪᔨᑕᓕᒃ ᐃᓗᐊᓂ ᐱᔨᑦᑎᕋᕐᓃᑦ ᑲᓇᑕᒃᑯᓐᓂ ᖃᐅᔨᒪᑎᑦᑎᔪᓂᒃ ᑲᓇᑕᒥᐅᓂᒃ ᐅᑭᐅᖅᑕᖅᑐᓂ ᐃᓅᖃᑎᒌᓄᑦ ᑐᓴᕈᑎᑎᒍᑦ (ᓲᕐᓗᑐᑦ, ᕙᐃᔅᐳᒃ). ᐅᓄᖅᑐᑦ ᐃᓄᐃᑦ ᓄᓇᕘᒥ ᐊᑐᒐᔪᖕᒪᑕ ᐃᓅᖃᑎᒌᓄᑦ ᑐᓴᐅᒪᔾᔪᑎᓂᒃ, ᑕᐃᒃᑯᑎᒍᑦ ᐱᓕᕆᑦᑎᐊᕈᑕᐅᓯᒪᕗᑦ ᐃᓄᖕᓂᒃ ᑐᓴᖅᑎᑦᑎᓇᓱᒃᖢᓂ.

ᑭᖕᒧᑦᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᑐᓕᕆᔩᓪᓗ ᑲᓇᑕᒥᒃᑯᑦ (CIRNAC) ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥᒃᑯᓪᓗ ᑭᒡᒐᖅᑐᖅᑎᖏᑦ ᐅᖃᖅᓯᒪᕗᑦ ᑎᑎᕋᕐᕖᑦ ᓄᓇᕘᒥ ᐃᓄᒃᑎᑑᓕᖅᑎᑦᑎᖃᑦᑕᕐᓂᕋᐃᓪᓗᑎᒃ. ᑕᑯᒃᓴᐅᑎᑦᑎᔪᓄᑦ ᓇᓗᓇᐃᖅᓯᔪᓄᑦ ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᓐᓄᑦ, ᑕᑯᒍᒃ ᐃᓚᓕᐅᓯᒪᔪᖅ D : ᑭᖕᒧᑦᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᑦ ᓇᓗᓇᐃᖅᓯᔪᑦ ᐃᓄᒃᑎᑐᑦ.

ᑭᖕᒧᑦᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥ ᐃᓄᒃᑎᑑᓕᖅᑎᑦᑎᓲᑦᑕᐅᖅ ᑐᓴᒐᒃᓴᓂᒃ ᑲᑎᒪᔨᓄᑦ ᑎᒃᑯᐊᖅᑕᐅᔪᓄᑦ ᐅᑯᓄᖓ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ (ᐃᓄᐃᓐᓇᖅᑐᓐ, ᐃᓄᒃᑎᑐᑦ ᖁᕆᓗ) ᑲᑎᒪᔨᖃᕐᕕᖕᓂ ᐊᕙᑎᖏᓐᓂᓗ ᓄᓇᕘᑖᕈᑎᒥ.

ᐃᖅᑲᓇᐃᔭᖅᑏᑦ ᖃᓄᐃᖏᓐᓂᕐᓄᑦ ᑲᓇᑕᒥᒃᑯᓐᓂ ᑭᓱᓕᐅᓲᑦ ᖃᓄᐃᖏᓐᓂᕐᓄᑦ ᖃᐅᔨᒪᔾᔪᑎᓂᒃ ᓄᓇᖃᖅᑳᖅᑐᓄᑦ ᑲᑎᙵᔪᓄᑦ ᐅᖃᐅᓯᖏᓐᓅᓕᖓᒐᔪᒃᖢᑎᒃ. ᑖᓐᓇ ᐱᖃᓯᐅᔾᔨᔪᖅ ᖃᐅᔨᒪᔾᔪᑎᒃᓴᓂᒃ ᓱᕈᓯᓄᑦ ᑲᐱᔭᐅᓂᕐᓄᑦ, ᒥᓗᖕᓄᑦ, ᐃᓱᒪᒃᑯᓪᓗ ᖃᓄᐃᖏᓐᓂᕐᓄᑦ. ᑲᓇᑕᒥ ᓂᕿᓄᑦ ᑐᕌᕈᑎᖏᑉ ᐊᔾᔨᖏᓐᓂᒃ ᖃᐅᔨᒪᔾᔪᑎᒃᓴᓂᒡᓗ ᓱᕈᓯᓄᑦ ᐄᔭᕐᓗᖕᓂᕐᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᑦ ᖃᔅᓯᑲᓪᓚᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ, ᐱᖃᓯᐅᖦᖢᒋᑦ ᐃᓄᒃᑎᑐᑦ. ᑕᑯᒍᒃ: ᐃᓚᓕᐅᓯᒪᔪᖅ E : ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᓂᕿᓄᑦ ᑐᕌᕈᑎᖏᑕ ᐊᔾᔨᖏᑦ ᐃᓄᒃᑎᑐᑦ ᐊᒻᒪᓗ ᐃᓚᓕᐅᓯᒪᔪᖅ F : ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᖃᐅᔨᒪᔾᔪᑎᒃᓴᑦ ᓱᕈᓯᓄᑦ ᐄᔭᕐᓗᖕᓂᕐᓄᑦ.

ᐊᓰᑦ ᑎᑎᕋᖅᑕᐅᔪᑦ ᑲᑉᐱᐊᓇᖅᑐᒦᑦᑐᓄᑦ ᑲᑎᙵᔪᓄᑦ ᑐᙵᔪᓄᑦ ᓄᓇᓂ ᓇᓃᑦᑐᓄᑦ ᓴᓇᔭᐅᖕᒥᔪᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ. ᓲᕐᓗᑐᑦ, ᑯᒪᐃᑦ ᓇᓂᔭᐅᒐᒥᒃ ᓇᓂᓪᓗᐊᑕᕐᒥ, ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᓴᓇᓚᐅᖅᑐᑦ ᖃᐅᔨᒪᔾᔪᑎᒃᓴᓂᒃ ᐊᑐᖅᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᑕᐅᕙᓂ.

ᓱᓕᓗ, ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᓴᓇᓚᐅᖅᑐᑦ ᑯᕕᑦ-19ᒧᑦ ᖃᐅᔨᓴᐅᑎᒥᒃ ᓄᓇᓕᖕᓄᑦ ᐅᖃᖃᑎᒋᔾᔪᑕᐅᔪᓐᓇᖅᖢᓂ ᑯᕕᑦ-19 ᖃᖅᑐᕕᓂᕐᓄᑦ. ᐊᔪᕆᖅᓱᐃᔪᖅ ᑕᕐᕆᔭᖅ ᐊᒃᑐᐊᔪᒧᑦ ᐱᓕᕆᔾᔪᑎᒧᑦ ᓴᓇᔭᐅᓪᓗᓂ ᐊᓯᓄᑦ ᐅᖃᐅᓯᓅᓕᖅᑎᑕᐅᓪᓗᑎᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐃᑲᔫᑕᐅᓗᑎᒃ ᐊᒃᑐᖅᑕᐅᔪᓄᑦ ᓄᓇᓕᖕᓄᑦ. ᓄᓇᖃᖅᑳᖅᑐᓄᑦ ᑐᕌᕈᑎ ᐊᑯᓐᓂᖅᓱᖅᑎᐅᔪᑦ ᐱᔨᑦᑎᕋᕐᓂᐅᔪᑦ ᐱᓕᕆᖃᑎᓖᑦ ᖃᓄᐃᖏᓐᓂᕐᓄᑦ ᑲᓇᑕᒥᒃᑯᓐᓂᒃ ᑐᓂᓯᓗᑎᒃ ᑖᒃᑯᓂᖓ ᖃᐅᔨᒪᔾᔪᑎᒃᓴᓂᒃ ᑐᕌᖅᑕᓄᑦ ᓄᓇᓕᖕᓄᑦ.

ᑭᒡᒐᖅᑐᐃᔩᑦ ᖃᓄᐃᖏᓐᓂᕐᓄᑦ ᑲᓇᑕᒥᒃᑯᓐᓂᑦ ᐅᖃᓚᐅᖅᑐᑦ ᐱᓕᕆᖃᑎᖃᒐᔪᓲᑦ ᓄᓇᖃᖅᑳᖅᑐᓄᑦ ᐱᔨᑦᑎᕋᕐᓃᑦ ᑲᓇᑕᒥᒃᑯᓐᓂᒃ ᖃᐅᔨᓇᓱᒃᖢᑎᒃ ᓇᓕᐊᖕᓄᑦ ᐅᖃᐅᓯᕐᒧᑦ ᐊᑐᕐᓗᑎᒃ ᑭᓱᓄᑦ ᐊᓯᓄᑦ ᐅᖃᐅᓯᓅᓕᖅᑎᑕᐅᓗᑎᒃ. ᑭᓱᓕᕆᔨᒥᒃ ᓂᕈᐊᖅᑳᖅᖢᑎᒃ ᓇᓕᐊᖕᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᔨᒥᒃ ᐱᓕᕆᕝᕕᖓᑕᓗ ᐅᖃᓕᒫᕐᓗᒋᑦ ᑎᑎᕋᑦ ᐅᖃᐅᓯᐅᔪᓄᑦ ᐱᓕᕆᖃᑎᒋᓗᒋᑦ ᐃᓚᐅᖃᑕᐅᔪᑦ ᑕᑯᓇᒡᓗᒋᑦ ᑎᑎᕋᑦ. ᐊᑭᑐᖏᑦᑐᒥᒃ ᐊᑭᓖᓲᑦ ᐃᓚᐅᖃᑕᐅᔪᑦ ᐱᕕᖃᖅᑎᑦᑎᓂᖏᓐᓄᑦ ᐱᓕᕆᔭᖏᓐᓄᓪᓗ ᓯᕗᒧᑦ ᐱᓕᕆᑎᓪᓗᒋᑦ. ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᐃᓚᓕᐅᑎᑦᑎᓲᑦᑕᐅᖅ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᑕᕐᕈᔭᓄᑦ ᓱᓕᓂᒃ ᐊᑭᖃᒃᑲᓐᓂᕆᓪᓗᑎᒃ. ᐊᑭᓕᒃᓴᓕᐊᑦ ᖃᐅᔨᓴᖅᑕᐅᓪᓗᑎᒃ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓂᑦ ᑭᓱᓕᐊᖑᓂᕐᓂᓪᓗ.

ᐃᒪᕐᒥᐅᑕᓕᕆᔨᒃᑯᑦ ᐱᓕᕆᔨᖏᑦ ᐅᖃᓚᐅᖅᑐᑦ ᓯᓚᑖᓂᑦ ᐅᖃᖃᑎᒌᖕᓃᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒐᔪᒃᑐᑦ ᐊᔾᔨᒌᖏᑦᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ. ᓲᕐᓗᑐᑦ, ᑐᓴᖅᑎᑦᑎᔪᑦ ᓯᑯᓯᐅᕐᓂᐊᖅᑐᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᓂᐊᖅᑐᑦ ᓄᓇᓄᑦ ᓄᓇᕘᒥ ᑲᓇᑕᒥ ᓯᑯᓯᐅᖅᑯᑏᑦ ᐊᐅᓚᕝᕕᒋᔭᖏᓐᓂ.

ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥ ᐃᖅᑲᓇᐃᔭᖅᑎᖏᑦ ᑕᕐᕆᔭᑦ ᐊᒃᑐᐊᔪᑦ ᓄᓇᕘᒧᑦ ᐊᒻᒪᓗ ᐅᕝᕙᓘᓐᓃᑦ ᐃᓄᖕᓄᑦ ᐱᖓᓱᓄᑦ ᐅᖃᐅᓯᓅᓕᖅᑎᑕᐅᓲᑦ ᐱᖃᓯᐅᖦᖢᒍ ᐃᓄᒃᑎᑐᑦ. ᑕᐃᒪᐃᑦᑐᒥᒃ ᓴᖅᑭᔮᖅᑎᑦᑎᔪᖅ ᑕᕝᕙᓂ ᑕᕐᕆᔭᒥ ‘ᖃᐅᔨᓴᖅᓃᑦ ᓯᕐᒥᓂᒃ – ᓯᓚᓄᑦ ᐱᓕᕆᖃᑎᒌᑦ’ ᓴᖅᑭᑕᐅᔪᒧᑦ 2023ᒥ.

ᐊᑐᕆᐊᖃᕌᖓᑕ ᐃᓄᒃᑎᑑᓕᖅᑎᑦᑎᓃᑦ

ᑲᑎᓐᓂᕐᒧᑦ ᑲᑎᒪᓂᖅᑎᒍᑦ, ᐅᖃᖅᑐᖃᓚᐅᖅᑐᖅ ᐱᓕᕆᕝᕕᖏᑦ ᐊᑐᐃᓐᓇᐅᑎᑦᑎᔪᑦ ᐃᓚᖏᓐᓂᒃ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓂᒃ ᓴᖅᑭᑦᑎᒐᔪᒃᑐᑦ, ᐊᓯᖏᑦ ᐱᔭᕆᐊᖃᕌᖓᒥᐅᓪᓗᑎᒃ.

ᑭᒡᒐᖅᑐᐃᔩᑦ ᑭᖕᒧᑦᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᒐᔪᒃᑐᑦ ᐅᓄᖅᑐᓂᒃ ᑎᑎᕋᓂᒃ ᐱᔭᕆᐊᖃᓕᕌᖓᒥᒃ. ᓲᕐᓗᑐᑦ, ᑭᖕᒧᑦᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᑦ ᐃᓄᒃᑎᑑᓕᖅᑎᑦᑎᓲᑦ ᑲᑎᒪᔾᔪᑎᒃᓴᖏᓐᓂᒃ ᐃᑲᔫᑎᒋᓪᓗᒋᑦ ᑐᙳᕕᒃᑯᑦ ᐊᕐᕌᒍᑕᒫᖅᓯᐅᑎᖓᓂᒃ ᑲᑎᒪᓂᖓᓄᑦ. ᑕᒃᑯᐊ ᐱᖃᓯᐅᔾᔨᔪᑦ ᐅᓂᒃᑳᓂᒃ ᐊᓯᓂᒡᓘᓐᓃᑦ ᐃᑯᔫᑎᓂᒃ ᑎᑎᕋᓂᒃ. ᐃᓄᒃᑎᑑᓕᖅᑎᑦᑎᑕᐅᔪᑦ ᑐᓵᔨᓄᑦ ᑎᑎᕋᕐᕕᖓᓄᑦ ᓄᓇᓕᖕᒥᐅᓄᓪᓘᓐᓃᑦ ᐃᓄᒃᑎᑑᓕᖅᑎᑦᑎᓂᕐᓄᑦ ᑲᒻᐸᓂᒧᑦ ᓲᕐᓗᑐᑦ ᐃᓂᓐᓂᕐᕕᒃᑎᑐᑦ. ᑲᒻᐸᓂᑦ ᑕᐃᒪᐃᑦᑐᑦ ᑐᓂᓯᔪᓐᓇᖅᑐᑦ ᓲᕐᓗᑐᑦ ᐃᓄᒃᑎᑑᓕᖅᑎᑦᑎᓂᕐᓄᑦ ᐱᔨᑦᑎᕋᕐᓂᕐᓂᒃ ᐋᖅᑭᒃᓯᒪᔪᓄᑦ ᓇᓕᐊᓪᓗᐊᑕᒧᑦ ᐊᕕᒃᓯᒪᔪᒧᑦ ᑲᑎᙵᔪᓄᑦ.

ᐊᕙᑎᓄᑦ ᓯᓚᐃᓪᓗ ᐊᓯᔾᔨᕐᓂᖏᓐᓄᑦ ᑲᓇᑕᒥᒃᑯᑦ ᐱᓂᕆᔨᖏᑦ ᐊᑐᐃᓐᓇᐅᑎᑦᑎᖕᒥᔪᑦ ᐃᓄᒃᑎᑑᓕᖅᑎᑦᑎᓂᕐᓄᑦ ᐱᔨᑦᑎᕋᕐᓂᕐᓂᒃ ᖃᔅᓯᑲᓪᓚᓄᑦ ᑭᓱᓄᑦ, ᐱᖃᓯᐅᖦᖢᒋᑦ ᑐᓴᐅᔭᔾᔪᑎᓄᑦ ᑎᑎᕋᑎᑐᑦ, ᑐᓴᒐᒃᓴᓄᑦ, ᑎᑎᕋᓄᓪᓗ ᐃᑲᔪᖅᑐᓂᒃ ᐃᖅᑲᓇᐃᔭᖅᑐᓕᕆᔩᑦ ᐱᓕᕆᔭᖏᓐᓂᒃ. ᑖᒃᑯᐊ ᐃᓄᒃᑎᑑᓕᖅᑎᑦᑎᓯᓴᔪᑦ ᐱᖃᓯᐅᔾᔨᖕᒥᔪᑦ ᑭᓱᓂᒃ ᐊᒃᑐᐊᔪᓄᑦ ᐱᓕᕆᔭᓄᑦ, ᐊᑐᐊᒐᓄᑦ, ᐱᔨᑦᑎᕋᕐᓂᕐᓄᓪᓗ ᐃᑲᔪᖅᑐᓄᑦ ᐃᓄᖕᓂᒃ ᓄᓇᓕᖕᓂᒡᓗ ᐃᓄᐃᑦ ᓄᓇᖓᓂ.

ᐃᓄᓕᒫᓄᑦ ᐸᓯᔨᓄᑦ ᐱᔨᑦᑎᕋᖅᑏᑦ ᑲᓇᑕᒥᒃᑯᓐᓂ ᐃᓄᒃᑎᑑᓕᖅᑎᑦᑎᓃᑦ ᑎᑎᕋᓂᒃ ᑐᒃᓯᕋᐅᑕᐅᖏᓐᓂᖅᓴᖅ ᐊᓯᓂᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓂᑦ ᐅᖃᖃᑎᒌᖕᓂᒃᑯᑦ ᑐᓵᔨᖃᕐᓂᕐᒧᓪᓗ. ᓴᖅᑭᔮᖅᑎᑦᑎᔪᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᓂᒃ ᑐᒃᓯᕋᐅᑕᐅᓯᒪᔪᑦ ᑎᑎᕋᖅᓯᒪᔪᓄᑦ ᐱᖃᓯᐅᔾᔨᕗᑦ ᐃᖅᑲᖅᑐᐃᕕᖕᒧᑦ ᐅᐸᖁᔨᔪᓂᒃ ᑐᓴᖅᑎᑦᑎᔪᑦ ᐱᕋᔭᒃᑕᐅᓯᒪᔪᓂᒃ ᑕᑯᔪᕕᓂᕐᓂᒡᓗ ᐅᖃᐅᓯᖃᕈᓯᕐᓄᑦ ᐃᓕᖅᑯᓯᕐᓄᓪᓗ ᑭᖕᒧᑦ ᐸᓯᔨᖏᑕ ᑎᑎᕋᕐᕕᖓᑦ ᓂᐱᓕᐅᖅᓯᓂᐊᖅᑐᑦ ᑕᑯᔪᓂᑦ ᐅᓂᒃᑳᓂᒃ ᐃᓚᙱᓐᓂᒡᓗ ᐃᓄᒃᑎᑑᓕᖅᑎᑦᑎᓗᑎᒃ. ᑖᒃᑯᐊ ᐃᓄᒃᑎᑑᓕᖅᑎᑦᑎᓃᑦ ᐃᓛᓐᓂ ᐱᓕᕆᔭᐅᓲᑦ ᐸᓖᓯᓄᑦ ᑲᑎᒪᔨᐅᔪᓄᑦ ᐱᔭᕇᖅᑕᐅᓂᖅᓴᐅᒐᔪᒃᖢᑎᒃ ᓯᓚᑖᓂᑦ ᑲᓐᑐᕌᒃᑕᓂᑦ ᐊᒃᑐᐊᓗᐊᖅᑐᖃᖁᓇᒋᑦ.

ᐃᒪᕐᒥᐅᑕᓕᕆᔨᒃᑯᑦ ᐱᓕᕆᔨᖏᑦ ᐊᑐᐃᓐᓇᐅᑎᑦᑎᓲᑦ ᐃᖅᑲᓇᐃᔮᓂᒃ ᓇᓗᓇᐃᖅᓯᔪᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᑐᒃᓯᕋᕐᕕᐅᔭᕌᖓᒥᒃ ᐃᓄᖕᓂᑦ. ᑐᒃᓯᕋᐅᑕᐅᒐᔪᓛᑦ ᑎᑎᕋᑦ ᐃᓄᒃᑎᑑᓕᖅᑎᑦᑎᓯᒪᔪᑦ, ᐃᓄᕕᐊᓗᒃᑎᑐᑦ, ᐃᓄᐃᓐᓇᖅᑐᑎᑐᑦ, ᕿᑭᖅᑖᓘᑉ ᐅᐊᖕᓇᖓᑕᓗ ᐅᖃᐅᓯᖏᑎᒍᑦ.

ᓄᓇᒥᐅᑕᓂᑦ ᐊᑐᒐᒃᓴᓕᕆᔩᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᒐᔪᓲᑦ ᑎᑎᕋᓂᒃ ᐊᓯᓂᒡᓗ ᑎᑎᕋᖅᓯᒪᔪᓂᒃ. ᐊᓯᓄᑦ ᐅᖃᐅᓯᓅᓕᖅᑎᑕᐅᕙᒃᖢᑎᒃ ᓯᓚᑖᓂᑦ ᑎᒥᓄᑦ ᑳᓐᑐᕌᒃᑎᓄᑦ.

ᐃᓚᐅᑎᑦᑎᔪᓄᑦ ᐱᔨᑦᑎᕋᕐᓂᕐᓄᑦ ᐱᕕᓕᐅᖅᓯᒪᔪᑦ

ᐊᑕᖏᑲᓴᒃᑐᑦ ᒐᕙᒪᑐᖃᒃᑯᑦ ᐱᓕᕆᕝᕖᑦ ᑎᒦᓪᓗ ᐅᖃᖅᑐᑦ ᐅᓄᖏᑦᑐᑦ ᑮᓇᒧᑦ ᐱᔨᑦᑎᕋᕐᓃᑦ ᐃᓄᒃᑎᑐᑦ ᐊᑐᐃᓐᓇᐅᑎᑕᐅᕗᑦ. ᐃᓛᓂᒃᑯᑦ, ᑭᓯᐊᓂ, ᐱᓕᕆᕝᕖᑦ ᐊᑐᐃᓐᓇᐅᑎᑦᑎᓲᑦ ᑮᓇᒧᑦ ᐃᓄᒃᑎᑑᓕᖅᑎᑦᑎᓂᕐᓂᒃ ᐱᔮᖅᑯᒃᑯᑦ ᐸᕐᓇᒃᓯᒪᔪᖅᑎᒍᓪᓗ ᐱᓕᕆᔪᑎᒍᑦ.

ᐱᔨᑦᑎᕋᕐᓂ ᑲᓇᑕᒥᒃᑯᑦ ᑭᒡᒐᖅᑐᐃᔨᖏᑦ ᑮᓇᒧᑦ ᐱᔨᑦᑎᕋᓲᑦ ᐱᖓᓱᓂ ᓄᓇᓂ ᓄᓇᕘᒥ (ᐃᖃᓗᐃᑦ, ᑲᖏᖅᖠᓂᖅ ᐃᖃᓗᒃᑑᑎᐊᕐᓗ) ᖄᖓᒍᑦ 14 ᐸᕐᓇᒃᓯᒪᔪᑦ ᑐᓴᕋᓱᒡᕕᒃᓴᑦ 22ᓗ ᓄᓇᐃᑦ ᓄᓇᓕᖕᓂᑦ ᑐᓴᕋᓱᖕᓂᕐᓂᑦ. ᑲᑎᓐᓂᕐᒧᑦ ᑲᑎᒪᑎᓪᓗᒋᑦ, ᐱᓕᕆᔩᑦ ᐅᖃᓚᐅᖅᑐᑦ ᖃᔅᓯᑲᓪᓚᓂᒃ ᐃᖅᑲᓇᐃᔭᖅᑎᑕᖃᕐᒪᑦ ᐊᕕᒃᓯᒪᔪᒧᑦ ᑎᑎᕋᕐᕕᖕᓂ ᐅᖃᓪᓚᒍᓐᓇᖅᑐᓄᑦ ᐃᓄᒃᑎᑐᑦ ᐃᓄᐃᓐᓇᖅᑐᑎᓪᓗ. ᑖᒃᑯᐊ ᐃᖅᑲᓇᐃᔭᖅᑏᑦ ᐃᓂᓖᑦ ᐃᓗᐊᓂ ᓄᓇᕘᒧᑦ ᐱᔨᑦᑎᕋᕐᓂᕐᓄᑦ ᐊᐅᓚᑦᑎᓂᕐᓄᑦ ᓄᓇᓂ. ᐃᓚᒃᑲᓐᓃᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔮᒥᓄᑦ ᖃᐅᔨᒪᔪᓖᑦ ᑕᒪᒃᑮᖕᓂᒃ ᐅᖃᐅᓯᖕᓂᒃ ᐊᔪᕈᓐᓂᖅᓯᒪᓪᓗᑎᒡᓗ ᐊᓯᓄᑦ ᐅᖃᐅᓯᖃᓂᕐᓂᒃ ᒐᕙᒪᓂᑦ ᖃᐅᔨᒪᔭᐅᔪᓄᑦ, ᓴᓇᓪᓗᑎᒃ ᑕᐃᒎᓯᓂᒃ ᐅᖃᐅᓯᖃᖅᖢᑎᒡᓗ ᐃᓱᒪᒋᔭᓄᑦ ᐃᓱᒪᒋᔭᐅᓲᖑᖏᑦᑐᓄᑦ ᐃᓄᒃᑎᑐᑦ.

ᐱᔨᑦᑎᕋᕐᓃᑦ ᑲᓇᑕᒥᒃᑯᑦ ᐊᑐᐃᓐᓇᐅᑎᑦᑎᖕᒥᔪᑦ ᑕᓚᕘᒃᑯᑦ ᑐᓵᔨᓂᒃ ᐊᑐᐃᓐᓇᐅᓪᓗᑎᒃ ᓇᓂᓕᒫᓂ ᐱᓕᕝᕕᖕᓂ. ᐃᖅᑲᓇᐃᔭᖅᑏᑦ ᐅᖄᓚᓗᑎᒃ ᑐᓵᔨᓄᑦ ᐱᓕᕆᖃᑎᒋᔭᖓᑦ ᑕᕝᕙᐅᓗᓂ ᑕᓚᕘᒃᑯᓪᓘᓐᓃᑦ ᐱᖓᓱᑦ ᐅᖃᖃᑎᒌᒡᓗᑎᒃ ᑐᓵᔨᖃᑲᐅᑎᒋᓗᑎᒃ. ᑖᓐᓇ ᐱᔨᑦᑎᕋᕐᓂᖅ ᐊᑐᖅᑕᐅᔪᖅ ᑲᓐᑕᒃᑯᓐᓂᑦ ᐊᑐᐃᓐᓇᐅᓪᓗᓂᓗ ᐅᖓᑖᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ (ᑐᓵᔨᑕᖃᕐᓂᖓ ᒪᓕᒃᖢᒍ) ᐱᖃᓯᐅᑎᓪᓗᒋᑦ ᐃᓄᒃᑎᑐᑦ ᐃᓄᐃᓐᓇᖅᑐᓄᓪᓗ.. ᑳᓐᑐᕌᒃᑎᐅᔪᑦ ᐃᖅᑲᓇᐃᔭᖅᑎᖏᑦ ᐃᓕᓴᔭᐅᓲᑦ ᐃᑲᔪᕐᓂᕐᓂᒃ ᐃᓄᑭᑦᑐᓂ ᐅᖓᓯᒃᑐᓂᓗ ᐱᓕᕆᕝᕕᒋᔭᒥᓄᑦ.

ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᓄᓇᕘᒥ ᐊᑐᐃᓐᓇᐅᑎᑦᑎᔪᑦ ᐱᔨᑦᑎᕋᕐᓂᕐᓂᒃ ᐃᓄᓕᒫᓄᑦ ᐃᓄᒃᑎᑐᑦ ᑐᓵᔨᖃᖅᑎᑦᑎᓪᓗᑎᒡᓗ ᐱᔭᕆᐊᖃᕌᖓᒥᒃ ᐊᔪᕐᓇᖏᑦᑕᕌᖓᓪᓗ. ᐊᑕᐅᓯᖅ ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᓐᓄᑦ ᐃᖅᑲᓇᐃᔭᖅᑎ ᐅᖃᓚᐅᖅᑐᖅ ᖃᔅᓯᑲᓪᓚᓂᒃ ᓴᖅᑭᔮᖅᑎᑦᑎᔪᓂᒃ ᖃᓄᖅ ᐃᖅᑲᓇᐃᔭᖅᑏᑦ ᐃᖃᓗᐃᑦ ᐊᕕᒃᓯᒪᔪᒧᑦ ᑎᑎᕋᕐᕕᖓᓂ ᑮᓇᒧᑦ ᑐᓵᔨᐅᓲᑦ ᖃᓪᓗᓇᐅᔭᕈᓐᓇᖏᑦᑐᓄᑦ ᑎᑎᕋᕐᕕᓕᐊᖅᑐᓄᑦ. ᓱᓕᓗ, ᐃᖅᑲᓇᐃᔭᖅᑏᑦ ᐅᖃᖃᑎᖃᓲᑦ ᐃᓄᓕᒫᓂᒃ ᐃᓕᖅᑯᓯᑐᖃᒃᑯᑦ ᐃᒃᐱᒍᓱᒃᑐᓄᑦ. ᓲᕐᓗᑐᑦ, ᐃᖅᑲᓇᐃᔭᖅᑏᑦ ᐅᖃᒐᔪᒃᑐᑦ ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᑦ ᐊᑎᑐᖃᖓᓂᒃ ᐃᓄᒃᑎᑐᑦ ᐃᓐᓇᓂᒃ ᐅᖃᖃᑎᖃᓕᕌᖓᒥᒃ. ᐱᓕᕆᕝᕕᖓ ᐅᓄᖅᑐᓂᒃ ᐊᑎᖃᖅᓯᒪᖕᒪᑦ ᕿᒪᒃᑕᑦᑎᓐᓂ, ᐃᖅᑲᓇᐃᔭᖅᑏᑦ ᐊᑐᕈᒪᓂᐊᖅᐳᑦ ᐱᓕᕆᕝᕕᐅᑉ ᐊᑎᖓᓂᒃ ᑐᑭᖃᕐᓂᖅᓴᒥᒃ ᐃᓱᒪᓂᖅᓴᓂᒡᓗ ᓄᓇᓕᖕᓂ ᑲᑎᒪᔨᐅᔪᓄᑦ.

ᓱᓕᓄᓪᓗ ᑖᒃᑯᓄᖓ ᐱᓕᕆᖃᑎᒌᖕᓂᕐᓄᑦ, ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᑦ ᐊᐅᓚᑦᑎᓲᑦ ᑲᑎᑦᑐᓂᒃ ᐃᓄᒃᑎᑐᑦ-ᐅᖃᓪᓚᓲᑦ ᐃᓄᐃᑦ ᐃᑲᔪᖅᑕᐅᔪᓐᓇᖅᖢᑎᒃ ᐱᓕᕆᔭᕆᐊᓕᖕᓂᒃ ᑎᑎᕋᓂᒃ ᖃᓪᓗᓈᑎᑐᑦ, ᓲᕐᓗᑐᑦ ᑲᓇᑕᒥ ᐃᓐᓇᖅᓯᐅᑎᓄᑦ ᐸᕐᓇᐅᑎ (CPP), ᐃᖅᑲᓇᐃᔭᖏᑦᑐᖅᓯᐅᑎᓄᑦ (EI), ᐱᕋᔭᒃᓯᒪᖏᑦᑐᓄᑦ ᐱᔪᓐᓇᖅᓯᓃᑦ, ᑖᒃᓯᓕᕆᓃᑦ ᐊᓯᖏᓪᓗ. ᐊᓯᖏᑦ ᑐᓵᔨᖃᓲᑦ ᐱᖃᓯᐅᔾᔨᕗᑦ ᐊᐱᖅᓱᖅᑕᓂ ᑐᓵᔨᓖᑦ ᐃᓕᖅᑯᓯᑐᖃᒃᑯᑦ ᐊᒡᕕᐊᕈᑎᑭᓐᓂᐊᕐᒪᑕ ᐃᖅᑲᓇᐃᔭᖅᑎᑖᕋᓱᒃᑐᓂ. ᐃᓄᐃᑦ ᐃᓕᖅᑯᓯᑐᖃᖏᓐᓂ, ᐅᖃᐅᓯᖃᕐᓗᓂ ᐃᒻᒥᓂᒃ ᐊᔪᖏᓐᓂᕐᒥᓂᒃ ᑕᑯᔭᐅᔪᓐᓇᖅᑐᖅ ᐱᐅᖏᑦᑐᑐᑦ ᐊᔪᙱᓗᐊᕋᓱᒋᔭᐅᓗᓂ. ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᐃᑲᔪᖃᑦᑕᕐᓂᐊᖅᑐᑦ ᐊᐱᖅᓱᖅᑕᓄᑦ ᑭᐅᓯᓗᑎᒃ ᐊᐱᖅᑯᑎᓂᒃ ᐃᑲᔪᖏᒃᑲᓗᐊᕐᓗᒋᑦ ᑭᐅᔾᔪᑎᒥᓄᑦ ᓇᐅᒃᑯᑐᐃᓐᓇᖅ.

ᑭᐅᔪᑦ ᐸᓖᓯᓂᑦ ᐅᖃᖅᑐᑦ ᐃᓗᐊᓂ ᐱᕕᖃᕐᓂᖓᑦ ᐊᑐᖅᑕᐅᔪᖅ ᐃᖅᑲᓇᐃᔭᖅᑏᑦ ᑐᓵᔨᐅᔪᒪᔭᕌᖓᑕ ᐃᖅᑲᓇᐃᔭᖃᑎᒥᓄᑦ ᐃᓄᓕᒫᓄᓪᓗ. ᐃᖅᑲᓇᐃᔭᖅᑎᖏᑦ ᑖᒃᑯᓂᖓ ᐱᓕᕆᓲᑦ ᐃᓚᒋᓪᓗᒋᑦ ᐃᖅᑲᓇᐃᔮᒥᓄᑦ ᑐᓴᐅᒪᑎᑦᑎᔨᐅᓪᓗᑎᒃ 911ᒧᑦ ᐅᖄᓚᕕᐅᓲᖑᓪᓗᑎᒃ, ᐱᓕᕆᔨᐅᓪᓗᑎᒡᓗ ᐸᓖᓯᒃᑯᕕᖕᓂ, ᐸᓖᓯᑎᑐᓪᓗ ᐅᐸᒃᑐᑦ ᐃᑲᔪᖅᑕᐅᔪᒪᔪᓄᑦ.

ᓯᑯᓯᐅᖅᑏᑦ ᐃᖅᑲᓇᐃᔭᖅᑎᖏᑦ ᑐᓵᔨᖃᖅᑎᑦᑎᓲᑦ ᐱᔨᑦᑎᕋᕐᓂᕐᓄᑦ ᐱᔭᕆᐊᖃᕌᖓᒥᒃ, ᐱᓗᐊᖅᑐᒥᒃ ᑲᑎᒪᖃᑎᖃᖅᑎᓪᓗᒋᑦ ᓄᓇᖃᖅᑳᖅᑐᓂᒃ ᓄᓇᓕᖕᒥᐅᓂᒃ. ᓯᑯᓯᐅᖅᑏᑦ ᐃᖅᑲᓇᐃᔭᖅᑎᖏᑦ ᐱᕕᖃᖏᒃᑲᓗᐊᖅᖢᑎᒃ ᐊᑐᐃᓐᓇᐅᑎᑦᑎᓗᑎᒃ ᑖᒃᑯᓂᖓ ᐱᔨᑦᑎᕋᕐᓂᕐᓂᒃ ᑎᑎᕋᕐᕕᒥᓂ, ᐃᓄᐃᑦ ᓄᓇᓕᖕᒥᑦ ᐃᖅᑲᓇᐃᔭᖅᑎᑕᐅᒐᔪᒃᑐᑦ ᐃᑲᔪᕐᓂᐊᕐᒪᑕ ᑖᒃᑯᓇᓂ. ᐃᓚᖏᓐᓂ ᓄᓇᓕᖕᒥᐅᑦ ᐃᓐᓇᐃᑦ ᑕᕝᕙᐅᓂᐊᖅᑐᑦ ᑲᑎᒪᔪᓄᑦ ᑐᓵᔨᖃᕐᓗᑎᒡᓗ ᐃᓄᒃᑎᑑᓕᖅᑎᑦᑎᔨᓂᒃ ᐅᖃᐅᓯᓄᑦ.

ᐃᓄᓕᒫᓄᑦ ᐸᓯᔨᓄᑦ ᐱᔨᑦᑎᕋᖅᑏᑦ ᑲᓇᑕᒥᒃᑯᑦ ᐃᓄᖕᓂᒃ ᐱᓕᕆᖃᑎᖃᑲᐅᑎᒋᓲᑦ ᖃᐅᑕᒫᑦ ᐸᓯᔨᐅᓪᓗᑎᒃ ᐱᓕᕆᖃᑦᑕᕋᒥᒃ ᑕᒪᒃᑮᓂᒃ ᓄᓇᓕᖕᓂᒃ ᓄᓇᕘᒥ ᐅᖃᖃᑎᖃᖅᖢᑎᒃ ᑕᑯᔪᕕᓂᕐᓂᒃ, ᐱᕋᔭᒃᑕᓂᒃ ᐊᓯᓄᓪᓗ ᐃᖅᑲᖅᑐᐃᓕᓂᓕᕆᔪᓂ ᐃᓚᐅᔪᓄᑦ ᐃᖅᑲᖅᑐᖅᑕᓄᑦ.

2008ᒥᓂᑦ, ᑭᖕᒧᑦ ᑕᐅᑐᒃᑐᓄᑦ ᐸᕐᓇᒃᑎᒧᑦ (CWC) ᐱᓕᕆᓂᖅ ᓴᖅᑭᑕᐅᓚᐅᖅᑐᖅ (ᓲᕐᓗᑐᑦ, 27-03 ᐱᒋᐊᕈᑎᓄᑦ ᐳᖅᑐᓂᕐᓄᑦ, 27-04 ᐳᖅᑐᓂᖅ ᐱᓕᕆᓂᕐᓄᑦ ᐳᖅᑐᓂᕐᓄᑦ, 27-05ᓗ ᐊᖓᔪᖅᑳᒧᑦ), ᓴᓇᓯᒪᔪᑦ ᐃᑲᔪᕐᓂᖃᐅᕐᓂᐊᕐᒪᑕ ᐱᔨᑦᑎᕋᓂᑦ ᐱᕋᔭᒃᑕᓄᑦ ᑕᒪᒃᑮᓂ ᐱᖓᓱᓂ ᐊᕕᒃᓯᒪᔪᓂ. ᓄᓇᕘᒥ ᐸᓯᔨᓄᑦ ᐃᓃᑦ ᐃᓄᒃᑖᒐᔪᒃᑐᑦ ᐃᓄᖕᓂᒃ ᓄᓇᕘᑕᐅᖏᑦᑐᓂᒃ ᐃᓄᒃᑎᑐᓪᓗ ᐅᖃᓪᓚᒍᓐᓇᖏᖦᖢᑎᒃ. ᔪᓚᐃᒥᓂᑦ 2025 ᑲᑎᓐᓂᕐᓄᑦ ᑲᑎᒪᓂᖅᑎᒍᑦ, ᐱᑕᖃᖅᐳᖅ ᖃᔅᓯᑲᓪᓚᓂᒃ ᑭᖕᒧᑦ ᑕᐅᑐᒃᑐᓄᑦ ᐸᕐᓇᒃᑏᑎᓂᒃ ᐃᖃᓗᖕᓂ, ᐊᑕᖏᖅᖢᑎᒡᓗ ᐃᓄᒃᑎᑐᑦ ᐅᖃᓪᓚᓲᖑᓪᓗᑎᒃ ᓯᕗᓪᓕᖅᑐᑦ ᐅᖃᐅᓯᕆᓪᓗᒍ ᖃᐅᑕᒫᓪᓗ ᐃᓄᒃᑎᑐᑦ ᐅᖃᓪᓚᓲᖑᓪᓗᑎᒃ ᐱᕋᔭᒃᑕᓄᑦ ᑕᐅᑐᒃᑐᓄᓪᓗ ᐱᕋᔭᒃᑐᓄᑦ. ᑭᖕᒧᑦ ᑕᐅᑐᒃᑐᓄᑦ ᐸᕐᓇᒃᑏᑦ ᐃᑲᔪᖅᑐᑦ ᐸᓯᔨᓂᒃ ᑲᑎᖃᑎᒋᓗᒋᑦ ᐱᕋᔭᒃᑕᕕᓃᑦ ᐊᒻᒪᓗ ᐅᕝᕙᓘᓐᓃᑦ ᑕᐅᑐᒃᑐᕕᓂᕐᓂᒃ ᑐᓵᔨᖃᖅᑎᑦᑎᓲᓪᓗ ᐱᔨᑦᑎᕋᕐᓂᕐᓂᒃ ᐃᓕᖅᑯᓯᑐᖃᒃᑯᑦ ᓈᒻᒪᒃᑐᑎᒍᑦ. ᐊᔪᙱᑕᕆᐊᓖᑦ ᐱᖃᓯᐅᔾᔨᕗᑦ ᐃᖅᑲᓇᐃᔭᖅᓯᒪᓗᓂ ᑎᑎᑦᕋᕐᕕᖕᓂ ᐅᖃᖃᑎᖃᑦᑎᐊᕈᓐᓇᕐᓗᓂᓗ ᖃᓪᓗᓈᑎᑐᑦ ᐃᓄᒃᑎᑐᓪᓗ. ᐊᑕᖏᑲᓴᒃᑐᑦ ᑭᖕᒧᑦ ᑕᐅᑐᒃᑐᓄᑦ ᐸᕐᓇᒃᑏᑦ ᐃᖅᑲᓇᐃᔭᕐᓂᖏᑦ ᐃᓱᓕᕝᕕᖃᕋᑎᒃ ᒐᕙᒪᑐᖃᓄᑦ.

ᓄᓇᕘᒥ ᐃᖅᑲᖅᑐᐃᔨᓂ ᑐᓵᔩᑦ ᐊᑐᐃᓐᓇᐅᕗᑦ ᐃᖅᑲᖅᑐᐃᓂᓕᒫᑎᒍᑦ ᐃᓄᐃᑦ ᑐᓵᔪᓐᓇᕐᓂᐊᕐᒪᑕ ᐃᖅᑲᖅᑐᐃᔪᓂᒃ ᐅᖃᐅᓯᒃᑯᑦ ᓂᕈᐊᖅᑕᒥᓄᑦ. ᓂᐱᓕᐅᖅᓯᒪᔪᑦ ᐊᑐᐃᓐᓇᐅᑎᑕᐅᔪᑦ ᓄᓇᕘᒥ ᐃᖅᑲᖅᑐᐃᔨᓕᕆᔨᓂᑦ ᐱᖁᔭᑎᒍᑦ ᐊᑎᓕᐅᖅᓯᒪᔪᓂᑦ ᑐᒃᓯᕋᕐᕕᐅᒍᑎᒃ.

ᐊᑐᖅᖢᓂ ᓄᓇᒥᐅᑕᓂᑦ ᐊᑐᒐᒃᓴᓕᕆᔩᑦ ᑲᓇᑕᒥᒃᑯᑦ GEM-GeoNorth ᐱᓕᕆᓂᖓᓂᒃ, ᓇᒧᙵᐅᓂᕐᓄᑦ ᐃᑲᔪᕐᓃᑦ ᑐᓵᔨᖃᖅᑎᑦᑎᓃᓪᓗ ᐊᑐᐃᓐᓇᐅᑎᑕᐅᔪᑦ ᑕᒪᒃᑮᓄᑦ ᑲᑎᒪᔨᐅᔪᓄᑦ ᐃᓄᓕᒫᓄᑦ, ᓯᓚᑦᑐᖅᓴᕐᕕᖕᓂᓗ ᖃᐅᔨᓴᖅᑎᓂᑦ ᐃᓄᓕᒫᓄᑦ ᓇᖕᒥᓂᓕᖕᓂᓪᓘᓐᓃᑦ ᐱᓕᕆᔨᓂᑦ. ᑐᓵᔨᖃᖅᑎᑕᐅᔪᑦ ᐊᐅᓚᔾᔭᐃᓂᐊᕋᒥᒃ ᐅᖃᖃᑏᖕᓂᕐᓂᒃ ᓄᓇᓕᐅᑉ ᐃᓐᓇᖏᓐᓂᒃ ᐊᒻᒪᓗ ᐅᕝᕙᓘᓐᓃᑦ ᐸᖅᑭᔨᓂᒃ ᐃᓗᐊᓂ ᐊᕕᒃᓯᒪᔫᑉ ᐃᑲᔪᕐᓗᒋᑦ ᐃᓄᐃᑦ ᐱᓕᕆᔭᒥᓂ. ᓱᓕᒃᑲᓐᓃᑦ ᐊᑐᕆᐊᖃᕌᖓᒥᒃ ᐱᒋᐊᕈᑏᑦ ᓯᕗᒧᐊᖅᑎᑕᐅᔪᑦ ᐃᑲᔫᑕᐅᓂᐊᕋᒥᒃ ᓄᓇᖃᖅᑳᖅᑐᓄᑦ ᑐᕌᖓᔪᓄᑦ ᐱᓕᕆᔪᓄᑦ ᐃᖅᑲᓇᐃᔭᖅᑏᑦ ᓂᕆᐅᒃᑯᑎᒃ ᐅᓄᖅᓯᒋᐊᕐᓂᐊᖅᑐᓂᒃ ᓄᓇᖃᖅᑳᖅᑐᓂᑦ ᐃᓚᐅᔪᓂᒃ.

ᒐᕙᒪᑐᖃᒃᑯᑦ ᐱᕕᖃᕐᓂᖏᑦ : ᐊᒡᕕᐊᕈᑏᑦ ᐊᒃᓱᕉᑏᓪᓗ

ᑲᑎᓐᓂᕐᓄᑦ ᑲᑎᒪᓂᕐᓂ ᐅᖃᖃᑎᒌᒃᑐᓂ, ᑖᒃᑯᐊᑦᑕᐃᓐᓇᐃᑦ ᐃᓱᒪᒋᔭᑦ ᑐᕌᖓᔪᓄᑦ ᐊᒡᕕᐊᕈᑎᓄᑦ ᐊᒃᓲᕉᑎᓄᓪᓗ ᓴᖅᑭᓚᐅᖅᑐᑦ ᐊᒃᑐᐃᔪᓄᑦ ᐱᓕᕆᕝᕖᑦ ᑎᒦᓪᓗ ᐊᔪᖏᓐᓂᖏᓐᓄᑦ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ.

ᑮᓇᐅᔭᖃᖅᑎᑦᑎᓂᕐᓄᑦ ᑮᓇᐅᔭᓄᓪᓗ ᐸᕐᓇᒃᑕᓄᑦ ᐱᕕᑭᔾᔪᑏᑦ

ᐅᖃᖃᑎᒌᒃᑐᑎᒍᑦ, ᐊᑕᖏᑲᓴᒃᑐᑦ ᐱᓕᕆᕝᕖᑦ ᑎᒦᓪᓗ ᐅᖃᓚᐅᖅᑐᑦ ᑮᓇᐅᔭᖃᕐᓃᑦ ᐊᒡᕕᐊᕈᑖᖑᓚᐅᖅᑐᑦ ᐱᔨᑦᑎᕋᕐᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ. ᑖᓐᓇ ᐱᖃᓯᐅᔾᔨᔪᖅ ᑮᓇᐅᔭᓂᒃ ᐃᓄᒃᑎᑑᓕᖅᑎᑦᑎᓂᕐᓄᑦ ᐱᔨᑦᑎᕋᕐᓂᕐᓄᑦ ᑲᓐᑐᕌᓄᑦ ᑮᓇᐅᔭᓄᓪᓗ ᐃᖅᑲᓇᐃᔭᖅᑎᒧᑦ ᐃᓄᒃᑎᑑᕈᓐᓇᖅᑐᒧᑦ.

ᐃᓄᒃᑎᑑᓕᖅᑎᑦᑎᓃᑦ ᓴᓇᓯᒪᔪᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐊᑭᑐᓂᖅᓴᐅᔪᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᓂᑦ ᖃᓪᓗᓈᑎᑑᓂᑦ ᐅᐃᕖᑎᑑᓂᓪᓗ. ᑕᐃᒪᐃᒻᒪᑦ ᐱᓕᕆᕝᕖᑦ ᓱᓕᓄᑦ ᑮᓇᐅᔭᓄᑦ ᐊᒃᓱᕈᖅᐳᑦ ᐱᐅᓯᑎᒋᐊᕋᓱᒃᑎᓪᓗᒋᑦ ᐱᔨᑦᑎᕋᕐᓂᕐᓂᒃ ᐊᑐᐃᓐᓇᐅᑎᑕᐅᔪᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ. ᖃᖓᓵᒥᑦ ᓴᖅᑭᔮᖅᑎᑦᑎᔪᖅ PCHᒥ ᑕᑯᒃᓴᐅᑎᑦᑎᕗᖅ ᑖᔅᓱᒥᖓ ᐊᒃᓱᕉᑎᒥᒃ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᒥᒃ 13 ᒪᒃᐱᒐᓄᑦ ᑎᑎᕋᓄᑦ ᐊᑭᖃᕐᓂᖅᓴᐸᓗᒃ 40 ᐳᓴᓐᑦᒥᒃ ᐃᓄᒃᑎᑑᓕᖅᑎᓪᓗᒋᑦ ᐅᐃᕖᓕᖅᑎᑕᓂᓄᑦ.

ᖃᐅᔨᔭᐅᔪᑦ ᖃᐅᔨᓴᖅᑐᓂᑦ ᑲᓇᑕᒥ ᑖᒃᓯᓕᕆᔨᓂᑦ 2022ᒥ, ᑐᕌᖓᓚᐅᖅᑐᑦ ᓄᓇᖃᖅᑳᖅᑐᓄᑦ ᐃᓄᖕᓄᑦ, ᐅᖃᖅᑐᑦ 20-30 ᐳᓴᓐᑦ ᓄᓇᖃᖅᑳᖅᑐᑦ ᑭᐅᔪᑦ ᐱᖃᑦᑕᕈᒪᔪᑦ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ. ᑭᓯᐊᓂ, ᑮᓇᐅᔭᖃᖏᓐᓂᕐᓄᑦ ᐱᕕᑭᑎᑕᐅᕗᑦ ᐱᕕᒃᓴᑦ ᓯᕗᒧᐊᖅᑎᓐᓇᓱᒡᓗᒋᑦ ᑖᒃᑯᓄᖓ ᐱᓕᕆᔭᐅᔪᓄᑦ.

ᑕᐃᒪᓐᓇᐸᓗᒃᑕᐅᖅ ᐊᕙᑎᓄᑦ ᓯᓚᐃᓪᓗ ᐊᓯᔾᔨᕐᓂᖏᓐᓄᑦ ᑲᓇᑕᒥᒃᑯᓂᑦ ᑭᐅᔪᑦ ᐅᖃᓚᐅᖅᑐᑦ ᐃᑲᔪᕈᒪᔪᑦ ᐊᖏᒡᓕᒋᐊᕐᓗᒋᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓂᒃ ᑭᓱᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐊᑐᐃᓐᓇᐅᓂᖅᓴᐅᓂᐊᕐᒪᑕ ᐃᓚᐅᑎᑦᑎᓂᖅᓴᐅᓗᑎᒡᓗ, ᑭᓯᐊᓂ ᑮᓇᐅᔭᓄᑦ ᐃᓱᒪᒋᔭᕆᐊᓖᑦ ᐊᒃᓱᕉᑎᖃᖅᐳᑦ ᐊᑐᒐᒃᓴᑭᑦᑐᓄᑦ ᐃᓗᐊᓂ ᐊᐅᓚᓂᕐᓄᑦ ᐸᖅᑭᔭᐅᓂᕐᓄᓪᓗ ᐸᕐᓇᒃᓯᒪᔪᓂ ᐃᑲᔫᑎᒋᓗᒋᑦ ᑖᒃᑯᓄᖓ ᐱᓕᕆᔭᓄᓗᑦ. ᓄᓇᖃᖅᑳᖅᑐᓄᑦ ᐅᖃᐅᓯᖏᑎᒍᑦᒃ ᐊᓯᓄᑦ ᐅᖃᐅᓯᓅᓕᖅᑎᑦᑎᓃᑦ ᐊᒃᓱᕉᑕᐅᓗᐊᙱᓚᑦ ᐱᓕᕆᓂᕐᒧᑦ ᐸᕐᓇᒃᑎᓄᓪᓗᒋᑦ, ᑮᓇᐅᔭᓄᑦ ᐸᕐᓇᖕᓃᑦ ᑐᕌᒐᔪᖕᒪᑕ ᖃᓪᓗᓈᑎᑐᓄᑦ ᐅᐃᕖᑎᑐᓄᓪᓗ.

ᐱᔨᑦᑎᕋᕐᓃᑦ ᑲᓇᑕᒥ ᑭᒡᒐᖅᑐᐃᔨᖏᑦ ᐅᖃᒃᑲᓐᓂᓚᐅᖅᑐᑦ ᑮᓇᐅᔭᓄᑦ ᐊᒃᓱᕈᕐᓃᑦ ᐊᒡᕕᐊᕈᑕᐅᓚᐅᖅᑐᑦ ᓱᓕᒃᑲᓐᓂᓂᒃ ᐱᔨᑦᑎᕋᕐᓂᖃᖅᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦᑕᐅᖅ. ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᐱᓕᕆᔨᖏᑦ ᐅᖃᓚᐅᖅᑐᑦ ᐃᓛᓐᓂ ᑐᓴᐅᒪᔭᐅᓂᕐᓄᑦ ᐱᓕᕆᔭᐅᔪᑦ ᐊᒃᑐᐊᔪᑦ ᖃᓄᐃᖏᓐᓂᕐᓄᑦ ᐊᑲᐅᙱᓕᐅᕈᑎᓄᑦ ᐱᖃᓯᐅᔾᔨᒐᔭᖅᑐᑦ ᑮᓇᐅᔭᓂᒃ ᐊᓯᓄᑦ ᐅᖃᐅᓯᓅᓕᖅᑎᑎᓂᕐᓄᑦ ᑐᓴᐅᒪᔭᒃᓴᓂ. ᓱᓕᓗ, ᐅᖃᖅᑐᖃᓚᐅᖅᑐᖅ PCO ᐃᓛᓐᓂ ᑮᓇᐅᔭᖃᖃᑦᑕᓚᐅᖅᑐᑦ ᐊᓯᓄᑦ ᓇᓕᐊᓪᓗᐊᑕᓄᑦ ᖃᓄᐃᖏᓐᓂᕐᓄᑦ ᐊᒃᑐᐊᔪᓄᑦ ᐱᓕᕆᔭᓄᑦ (ᓲᕐᓗᑐᑦ ᐃᓕᓯᓗᑎᒃ ᑐᓴᒐᒃᓴᓂᒃ ᐊᐃᖅᑮᕕᖕᓂ ᐊᑐᖅᑐᓄᑦ ᓄᓇᖃᖅᑳᖅᑐᓄᑦ ᐃᓄᖕᓄᑦ).

ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥᒃᑯᑦ ᐊᕙᑎᓄᑦ ᓯᓚᐃᓪᓗ ᐊᓯᔾᔨᕐᓂᖏᓐᓄᑦ ᑲᓇᑕᒥᒃᑯᓐᓄᓪᓗ ᑭᒡᒐᖅᑐᐃᔨᖏᑦ ᐅᖃᐅᓯᖃᓚᐅᕐᒥᔪᑦ ᐊᒃᓱᕉᑎᓂᒃ ᑮᓇᐅᔭᓄᑦ ᓄᓇᖃᖅᑳᖅᑐᓄᑦ ᐅᖃᐅᓯᓅᓕᖅᑎᑦᑎᓂᕐᓄᑦ.

ᑐᑭᓯᓗᒋᑦ ᐱᔪᒪᔭᐅᓂᖏᑦ ᐱᔨᑦᑎᕋᕐᓃᑦ

ᐱᓕᕆᕝᕕᖏᑦ ᐅᖃᐅᓯᖃᓚᐅᖅᑐᑦ ᐊᒃᓱᕈᕐᓇᓪᓚᒃᑐᓂᒃ ᐱᑕᖃᕐᒪᑦ ᖃᐅᔨᓇᓱᒃᖢᓂ ᐱᔪᒪᓂᕐᓂᒃ ᒐᕙᒪᐃᑦ ᐱᔨᑦᑎᕋᕐᓂᖏᓐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ.

ᐊᕙᑎᓄᑦ ᓯᓚᐃᓪᓗ ᐊᓯᔾᔨᕐᓂᖏᓐᓄᑦ ᑲᓇᑕᒥᒃᑯᓐᓄᑦ ᑭᒡᒐᖅᑐᐃᔨᖏᑦ ᐅᖃᓚᐅᖅᑐᑦ ᐱᓕᕆᔪᑦ ᑕᒪᑐᒥᖓ ᐱᔪᒪᓂᖏᑦ ᐱᔨᑦᑎᕋᕐᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᖃᐅᔨᒪᔭᐅᓪᓚᑦᑖᖏᒻᒪᑦ. ᑭᐅᔪᓄᑦ ᑎᑎᕋᕕᖓᓄᑦ ᑲᒥᓴᓇᐅᑉ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐊᕙᑎᓄᑦ ᓯᓚᐃᓪᓗ ᐊᓯᔾᔨᕐᓂᖏᓐᓄᑦ ᑲᓇᑕᒥᒃᑯᓐᓄᑦ ᐱᓕᕆᔪᑦ ᖃᐅᔨᓇᓱᒃᖢᑎᒃ ᐱᔪᒪᔭᐅᓂᖏᓐᓄᑦ ᐱᔨᑦᑎᕋᕐᓃᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᖃᐅᔨᓴᖅᖢᑎᒃ ᓄᓇᓂᒃ ᐃᓗᐊᓃᑦᑐᓄᑦ ᐱᓕᕆᕝᕕᐅᑉ ᐊᖏᖅᑐᓄᑦ ᐱᖃᓯᐅᔾᔨᓂᕐᓄᑦ ᑐᓴᐅᒪᔭᐅᑎᑦᑎᓂᕐᓄᓪᓗ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦᒃ ᐊᔾᔨᖐᖏᑦᑐᑎᒍᑦ ᐱᒋᐊᕈᑎᑎᒍᑦ ᐱᓕᕆᔭᑎᒍᓪᓗ ᐃᑲᔫᑕᐅᓗᑎᒃ ᐊᑐᓕᖅᑎᑕᐅᓂᖏᓐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦᐱᖁᔭᕐᔪᐊᑉ.

ᖃᓄᐃᖏᓐᓂᕐᓄᑦ ᑲᓇᑕᒥᒃᑯᓐᓂᑦ ᑭᐅᔪᑦ ᐅᖃᓚᐅᖅᑐᑦ ᐱᔪᒪᓃᑦ ᐊᓯᓄᑦ ᐅᐊᐅᓯᓅᓕᖅᑎᑦᑎᔪᓄᑦ ᐱᔨᑦᑎᕋᕐᓃᑦ ᖃᐅᔨᓴᒐᕐᓂᖏᒻᒪᑕ ᐃᓚᐅᓂ ᐱᓕᕆᕝᕕᖕᓂ. ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᐊᑐᐃᓐᓇᐅᑎᑦᑎᔪᑦ ᐊᑐᒐᒃᓴᓂᒃ ᓄᓇᖃᖅᑳᖅᑐᓄᑦ ᓄᓇᓕᖕᓄᑦ, ᓲᕐᓗᑐᑦ ᖃᐅᔨᒪᔾᔪᑎᒃᓴᓂᒃ, ᑭᓯᐊᓂ ᓱᖅᑯᐃᓇᒐᔪᖕᓇᑎᒃ ᖃᐅᔨᒪᔾᔪᑎᒃᓴᑦ ᑐᓴᖅᑎᑕᐅᓇᓱᒃᑐᓄᑦ ᑐᓴᖅᑕᐅᖕᒪᖔᑕ ᓈᒻᒪᒃᓯᓕᕈᑎᒋᓪᓗᒋᓪᓗ ᐊᑐᕆᐊᓕᖕᒥᓄᑦ.

ᖃᔅᓯᑲᓪᓚᑦ ᐱᓕᕆᕝᕕᖏᑦ ᐅᖃᓚᐅᖅᑐᑦ ᐊᒃᓱᕉᑎᖃᕐᒪᑕ ᖃᐅᔨᓇᓱᒃᖢᑎᒃ ᓈᒻᒪᒃᑐᒥᒃ ᐅᖃᐅᓯᕐᒥᒃ ᐊᑐᕆᐊᒃᓴᖅ ᓄᓇᖃᖅᑳᖅᑐᓄᑦ ᐃᓄᒃᑎᑑᓕᖅᑎᑦᑎᓂᕐᓄᑦ.

ᐃᖅᑲᓇᐃᔮᖃᕐᓂᖅ ᓄᖅᑲᑎᑦᑎᖏᓐᓂᕐᓗ

ᖃᔅᓯᑲᓪᓚᑦ ᐱᓕᕆᕝᕕᖏᑦ ᐊᒃᓱᕉᑎᖃᓚᐅᕐᒥᔪᑦ ᐃᖅᑲᓇᐃᔭᖅᑎᑖᕋᓱᒃᖢᑎᒃ ᐃᓄᒃᑎᑐᑦ ᐅᖃᓪᓚᓲᓂᒃ ᐃᓄᖕᓂᒃ. ᓇᓕᐊᓪᓗᐊᑕᓄᑦ ᐃᖅᑲᓇᐃᔭᖅᑎᑖᕋᓱᓕᖅᑐᑦ ᑐᓴᐅᒪᑦᑎᐊᕐᓂᖅᓴᐅᓂᐊᕐᒪᑕ ᑐᓴᖅᑎᑕᐅᓇᓱᒃᑐᑦ ᑲᑎᙵᔪᑦ ᐃᖅᑲᓇᐃᔭᖅᑎᑖᕋᓱᒃᑎᓪᓗᒋᑦ.

ᐊᕙᑎᓄᑦ ᓯᓚᐃᓪᓗ ᐊᓯᔾᔨᕐᓂᖏᓐᓄᑦ ᑲᓇᑕᒥᒃᑯᓐᓄᑦ ᐃᓄᖕᓂᒃ ᐃᖅᑲᓇᖅᑲᓇᐃᔭᖅᑎᖃᕐᓂᕐᓄᑦ ᐸᕐᓇᐅᑎᖓ (IEP) ᓴᓇᓯᒪᕗᑦ ᐊᑐᓕᖅᑎᓪᓗᒋᑦ ᐊᖏᖅᓯᒪᔭᐅᔪᑦ ᑎᑎᕋᖅᓯᒪᔪᑦ ᓇᓗᓇᐃᕈᑎ 23ᒥ ᓄᓇᕘᑖᕈᑎᒥ 85 ᐳᓴᓐᓂᒃ ᐃᓄᖕᓂᒃ ᑭᒡᒐᑐᐃᔭᕆᐊᓕᖕᓄᑦ ᐃᖅᑲᓇᐃᔭᖅᑎᓂ ᓄᓇᕘᒥ. ᐃᓄᖕᓂᒃ ᐃᖅᑲᓇᖅᑲᓇᐃᔭᖅᑎᖃᕐᓂᕐᓄᑦ ᐸᕐᓇᐅᑎᖓ ᐱᖃᓯᐅᔾᔨᔪᖅ ᖃᓄᐃᑕᐅᔪᓂᒃ ᐅᓄᖅᓯᒋᐊᖁᓪᓗᒋᑦ ᑭᒡᒐᖅᑐᐃᔪᑦ. ᑖᒃᑯᐊ ᐱᖃᓯᐅᔾᔨᔪᑦ ᖃᓄᐃᒋᐊᕈᑎᓂᒃ ᓇᓕᐊᓪᓗᐊᑕᓄᑦ ᐃᖅᑲᓇᐃᔭᖅᑎᑖᕐᓂᕐᓄᑦ ᒪᓕᒋᐊᓕᖕᓂᒃ, ᓲᕐᓗᑐᑦ ᐊᐅᓚᑦᑎᓗᓂ ᐃᖅᑲᓇᐃᔮᓂᒃ ᓴᖅᑭᔮᖅᑎᑦᑎᔪᓂᒃ, ᐃᖅᑲᓇᐃᔭᓕᖅᑎᓪᓗᒋᑦ ᓄᖅᑲᙱᑎᓪᓗᒋᓪᓗ ᐃᓄᐃᑦ ᐃᖅᑲᓇᐃᔭᖅᑏᑦ.

ᓯᑯᓯᐅᖅᑎᓄᑦ ᑭᒡᒐᖅᑐᖅᑏᑦ ᐅᖃᐅᓯᖃᕆᓪᓗᑎᒃ ᐊᒃᓱᕉᑎᓂᒃ ᐃᖅᑲᓇᐃᔭᖅᑎᑖᕋᓱᓕᕌᖓᒥᒃ ᐃᓄᒃᑎᑑᓕᖅᑎᑦᑎᓂᕐᓄᑦ ᐱᓕᕆᔪᓄᑦ ᐱᓕᕆᕝᕕᐅᑉ ᐃᓗᐊᓂ. ᑮᓇᐅᔭᓂᒃ ᓈᒻᒪᒃᑐᖃᕋᓗᐊᖅᖢᑎᒃ, ᒐᕙᒪᑐᖃᒃᑯᑦ ᐊᑐᐊᒐᖏᑦ ᐱᕕᑭᑦᑐᓕᐅᓚᐅᖅᑐᑦ ᓯᑯᓯᐅᖅᑎᓄᑦ ᐃᖅᑲᓇᐃᔮᒧᑦ ᐱᓕᕆᓇᓱᒃᑕᒥᓄᑦ.

ᐱᔨᑦᑎᕋᕐᓃᑦ ᑲᓇᑕᒥᒃᑯᑦ ᐱᓕᕆᔨᖏᑦ ᐅᖃᖅᑐᑦ ᖃᓄᐃᓕᐅᕋᓱᒃᑐᑦ ᓈᒻᒪᒃᓯᖁᓪᓗᒋᑦ ᖃᓄᐃᑕᐅᓇᓱᒃᑐᑦ ᐃᓗᐊᓂ ᓇᓗᓇᐃᕈᑎ 23 ᓄᓇᕘᑖᕈᑎᒥ. ᕿᓚᒥᒧᑦ ᐊᑯᓐᓂᖅᓱᖅᑐᓄᓪᓗ ᖃᖓᓄᑦ ᑎᑭᑕᐅᓇᓱᒃᑐᓂᒃ ᐋᖅᑭᒃᓯᓯᒪᔪᑦ ᓈᒻᒪᒃᓯᖁᓪᓗᒋᑦ ᐊᖏᖅᑕᐅᓯᒪᔪᑦ ᐃᓗᐊᓂ ᐊᖏᖃᑎᒌᒍᑎᐅᑉ, ᐱᖃᓯᐅᖦᖢᒋᑦ ᐃᖃᓇᐃᔭᖅᑎᑖᕐᓃᑦ ᓯᕗᒧᐊᖅᑎᑦᑎᓃᓪᓗ ᐃᑲᔫᑕᐅᓗᑎᒃ ᐃᓄᖕᓄᑦ ᐃᖅᑲᓇᐃᔭᖅᑎᓄᑦ. ᐃᓐᓇᓂᒃ ᑲᑎᖃᑎᖃᕐᓃᑦ ᐱᓕᕆᔭᐅᓯᒪᕗᑦ ᐃᑲᔫᑕᐅᓗᑎᒃ ᐃᖅᑲᓇᐃᔭᖅᑎᑖᕐᓂᕐᓄᑦ ᐃᓄᖕᓂᒃ ᐃᖅᑲᓇᐃᔭᖅᑎᓂᒃ.

ᓄᓇᖃᖅᑳᖅᑐᓂᑦ ᐃᖅᑲᓇᐃᔭᖅᑎᑖᕐᓂᖅ, ᐃᖅᑲᓇᐃᔭᐃᓐᓇᖅᑎᑦᑎᓂᖅ ᓯᕗᒧᐊᖅᑎᑦᑎᓂᕐᓄᓪᓗ ᐱᓕᕆᖃᑎᒌᑦ (IRRA) ᐱᓕᕆᓂᐅᔪᖅ ᐱᓕᕆᔾᔪᓯᓕᖕᒧᑦ ᐃᑲᔪᕐᓗᒋᑦ ᐃᓄᐃᑦ ᐃᖅᑲᓇᐃᔭᖅᑏᑦ. ᓯᕗᓂᕐᒥ ᐱᓕᕆᔭᑦ ᐸᕐᓇᒃᑕᐅᓪᓗᑎᒃ ᐊᒃᑐᐊᔪᓄᑦ ᓴᓇᔭᐅᓂᖏᓐᓄᑦ ᐊᓯᓄᓪᓗ ᐅᖃᐅᓯᓅᓕᖅᑎᑕᐅᔪᓄᑦ. ᐱᖃᓯᐅᖦᖢᒋᑦ ᖃᕋᓴᐅᔭᑎᒍᑦ ᐅᓂᒃᑳᑦ, ᐱᔨᑦᑎᕋᕐᓃᑦ ᑲᓇᑕᒥᒃᑯᑦ ᐊᔾᔨᖃᖅᐳᑦ 384 ᐸᓗᖕᓂᒃ ᐱᓕᕆᔭᐅᔪᓄᑦ ᓇᓗᓇᐃᖅᓯᔪᓂᒃ ᐊᓯᓄᑦ ᐅᖃᐅᓯᓅᓕᖅᑎᑕᐅᔪᓐᓇᖅᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐃᑲᔫᑕᐅᓂᐊᕋᒥᒃ ᓄᓇᓕᖕᓄᑦ. ᑖᒃᑯᐊ ᐊᓯᓄᑦ ᐅᖃᐅᓯᓅᓕᖅᑎᑕᐅᔪᑦ ᓄᑖᕈᕆᐊᖅᑕᐅᒐᔪᒡᓗᑎᒃ.

ᐃᓚᖓ ᐅᖃᐅᓯᐅᔪᖅ ᐊᒃᓱᕉᑎᐅᔪᖅ ᓱᓕᓂᖏᓐᓄᑦ ᑎᑎᕋᑦ. ᖃᐅᔩᒪᔭᐅᔪᑦ ᑐᕌᕈᑏᓪᓗ ᐊᓯᔾᔨᒐᔪᖕᒪᑕ, ᐊᒃᓱᕈᕐᓇᕋᔭᕐᒪᑦ ᑎᑎᕋᑦ ᓄᑖᕈᕆᐊᖅᓯᒪᓇᓱᒡᓗᒋᑦ ᐊᔾᔨᒌᖏᑦᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ.

ᐃᓚᖓᑦ ᐊᑲᐅᙱᓕᐅᕈᑎ ᖃᐅᔨᔭᐅᔪᖅ ᖃᔅᓯᑲᓪᓚᓄᑦ ᐱᓕᕆᕝᕕᖕᓄᑦ ᐊᒃᓱᕉᑕᐅᔪᓄᑦ ᑐᕌᖓᔪᓄᑦ ᐃᖅᑲᓇᐃᔮᖃᕐᓂᕐᓄᑦ ᓄᖅᑲᑎᑦᑎᖏᓐᓂᕐᓄᓪᓗ, ᐊᑭᓖᓯᔾᔪᑎᑕᖃᖏᒻᒪᑦ ᐊᑐᐃᓐᓇᓄᑦ ᐃᖅᑲᓇᐃᔭᖅᑎᓄᑦ ᐱᔨᑦᑎᕋᖅᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ.

ᑭᐅᔪᑦ ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥᒃᑯᓐᓂᑦ ᐅᖃᓚᐅᖅᑐᑦ ᐱᑕᖃᖏᒻᒪᑦ ᒪᕐᕉᖕᓄᑦ ᐅᖃᕈᓐᓇᖅᑐᓄᑦ ᐃᑲᔫᑎᓂᒃ ᐱᔪᒪᓕᕈᑎᓂᒡᓘᓐᓃᑦ ᐊᒃᑐᐃᔪᓂᒃ ᐱᓕᕆᕝᕕᐅᑉ ᐃᖅᑲᓇᐃᔭᖅᑎᑖᕈᓐᓇᕐᓂᖏᓐᓂᒃ ᐅᖃᓪᓚᓲᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ. ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥᒃᑯᑦ ᓯᕗᒧᐊᓪᓚᓕᕋᓗᐊᖅᑎᓪᓗᐃᑦ ᐃᖅᑲᓇᐃᔭᖅᑎᑖᕐᓂᕐᓄᑦ ᐃᓄᖕᓂᒃ ᐃᓂᓄᑦ ᓄᓇᕘᒥ, ᖃᓄᐃᑕᐅᔪᑦ ᐊᑐᐃᓐᓇᐅᑎᑦᑎᓗᓂ ᑮᓇᐅᔭᓂᒃ ᐃᓄᒃᑎᑐᑦ ᐅᖃᓪᓚᓲᓄᑦ ᓯᕗᒧᐊᖅᑎᒃᑲᓐᓂᕈᓐᓇᖅᐸᐃᑦ ᑖᒃᑯᐊ ᖃᓄᐃᑕᐅᓇᓱᒃᑐᑦ. ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥᒃᑯᑦ ᐅᓄᓛᓂᒃ ᒐᕙᒪᑐᖃᓂᑦ ᐃᖅᑲᓇᐃᔭᖅᑎᓖᑦ ᐃᓄᖕᓂᒃ ᓄᓇᕘᒥ, ᐸᓖᓯᒃᑯᑦ ᑭᖑᓂᐊᓂ.

ᐃᓄᓕᒫᓄᑦ ᐸᓯᔨᓄᑦ ᐱᔨᑦᑎᕋᖅᑏᑦ ᑲᓇᑕᒥᒃᑯᑦ ᑭᒡᒐᖅᑐᐃᔨᖏᑦ ᐅᖃᖅᑐᑦ ᐊᒃᓱᕈᕐᓇᖅᑐᑦ ᐊᒃᑐᐊᔪᓄᑦ ᐃᖅᑲᓇᐃᔮᖃᕐᓂᕐᒧᑦ ᓄᖅᑲᑎᑦᑎᖏᓐᓂᕐᓄᓪᓗ ᑭᖕᒧᑦ ᑕᐅᑐᒃᑐᓄᑦ ᐸᕐᓇᒃᑎᒧᑦ, ᑕᐃᒪᐃᑎᑕᐅᓂᕋᖅᖢᒋᓪᓗ ᐃᓚᖏᑦ ᐊᒃᓱᕈᕐᓇᖅᑐᑦ ᓇᓕᐊᓪᓗᐊᑕᓄᑦ ᐱᓕᕆᔭᓄᑦ ᐃᓄᓕᒫᓄᑦ ᐸᓯᔨᓄᑦ ᐱᔨᑦᑎᕋᖅᑏᑦ ᑲᓇᑕᒥᒃᑯᑦ ᐱᓕᕆᔭᖏᓐᓄᑦ, ᐱᖃᓯᐅᖦᖢᒋᑦ ᑲᙳᓇᖅᑐᑦ ᖁᕕᐊᓇᖏᑦᑐᓪᓗ ᐱᓕᕆᔭᑦ ᐊᓯᓄᑦ ᐋᓐᓂᐊᓕᕈᑕᓄᑦ ᐃᖅᑲᓇᐃᔭᖅᑎᓄᓪᓗ ᓄᖅᑲᕈᑕᓄᑦ. ᐃᓱᒪᒃᑯᑦ ᖃᓄᐃᖏᓐᓂᕐᓄᑦ ᐃᑲᔫᑏᑦ ᐊᑐᐃᓐᓇᐅᑎᑕᐅᒐᓗᐊᖅᖢᑎᒃ ᐃᖅᑲᓇᐃᔭᖅᑎᓄᑦ, ᐊᒃᓱᕈᕐᓇᖅᑐᑦ ᐃᖅᑲᓇᐃᔭᐃᓐᓇᕐᓂᕐᓄᑦ ᐃᖅᑲᓇᐃᔭᖅᑎᑖᕐᓂᕐᓄᓪᓗ ᓱᓕᐅᕗᑦ.

ᓱᓕᓗ, ᑭᖕᒧᑦ ᑕᐅᑐᒃᑐᓄᑦ ᐸᕐᓇᒃᑎᖓ ᐊᐅᓪᓚᖅᓯᒪᔪᓐᓇᖅᐳᖅ ᑎᑭᓪᓗᒍ 20ᓂᑦ 22ᓄᑦ ᐱᓇᓱᐊᕈᓯᓄᑦ ᐊᕐᕌᒍᒥ ᐃᖅᑲᖅᑐᐃᓂᓕᕆᓂᓄᑐᐊᖅ, ᑭᖕᒧᑦ ᑕᐅᑐᒃᑐᓄᑦ ᐸᕐᓇᒃᑎᖏᑦ ᐊᒃᓱᕈᕐᓇᖅᑐᓂᒃ ᐱᓕᕆᐊᒃᓴᓕᓪᓚᖕᓂᒡᓗ ᐱᓕᕆᐊᒃᓴᖃᖅᐳᑦ, ᑲᑎᖦᖢᒋᑦ ᓱᓕᓄᑦ ᐊᒃᓱᕈᕐᓇᖅᑐᓄᑦ ᐊᐅᓪᓚᒐᔪᖕᓂᕐᓂᑦ ᐃᒻᒥᓄᑦ ᐃᓅᓯᕐᒥᓄᑦ ᖃᓄᐃᖏᓐᓂᕐᒥᓄᓪᓗ.

ᑭᖕᒧᑦ ᐃᖅᑲᓇᐃᔭᖅᑎᓄᑦ ᐃᒡᓗᖃᖅᑎᑕᐅᔪᑦ ᓴᓂᐊᓂ ᐅᖓᓯᒃᑐᓄᑦ ᐃᑲᔫᑎᓄᑦ (IPA) ᓄᖅᑲᖓᓐᓇᒥᓗ ᐃᑲᔫᑎᓄᑦ (VTA). ᐃᓄᓕᒫᓄᑦ ᐸᓯᔨᓄᑦ ᐱᔨᑦᑎᕋᖅᑏᑦ ᑲᓇᑕᒥᒃᑯᑦ ᐅᔾᔨᕈᓱᓚᐅᕐᒥᔪᑦ ᐱᑕᖃᖏᓐᓂᖏᓐᓂᒃ ᒪᕐᕉᖕᓄᑦ ᐅᖃᕈᓐᓇᕐᓂᕐᓄᑦ ᑮᓇᐅᔭᑎᒍᓪᓘᓐᓂᑦ ᐃᓕᓴᕆᔭᐅᓂᕐᓄᑦ ᐊᒃᓱᕉᑕᐅᓂᕋᖅᑕᐅᓪᓗᑎᒃ ᐃᖅᑲᓇᐃᔭᖅᑎᑖᕋᓱᖕᓂᕐᓄᑦ, ᐱᕕᑭᓐᓂᖏᓐᓄᓪᓗ ᓇᓗᓇᐃᖅᓯᓃᑦ ᐱᓕᕆᔾᔪᓯᖏᓐᓂ ᒐᕙᒪᑐᖃᒃᑯᑦ ᒐᕙᒪᖓᓂ ᓴᓂᐊᓂ ᐊᓰᑦ ᐃᓃᑦ ᐊᓯᓂ ᑎᒥᓂ ᓲᕐᓗᑐᑦ ᒐᕙᒪᖓᓂ ᓄᓇᕘᑉ.

ᐸᓖᓯᒃᑯᑦ ᓴᓇᓯᒪᕗᑦ ᓄᓇᖃᖅᑳᖅᑐᓄᑦ ᐃᖅᑲᓇᐃᔮᓄᑦ ᐅᓂᒃᑳᓂᒃ ᑭᒡᒐᖅᑐᐃᔪᓂᒃ ᓄᓇᖃᖅᑳᖅᑐᓂᒃ, ᐃᓄᖕᓂᒃ ᒪᐃᑏᓂᒡᓗ ᑕᒪᒃᑮᑎᒍᑦ ᐊᔾᔨᑎᒍᑦ ᑎᑎᕋᑎᒍᓪᓗ. ᑖᒃᑯᐊ ᐅᓂᒃᑳᑦ ᐊᓯᓄᑦ ᐅᖃᐅᓯᓅᓕᖅᑎᓯᒪᔪᑦ ᐅᖃᐅᓯᕆᔭᐅᔪᓄᓪᓗ, ᓄᓇᓕᐅᑉ ᐊᐅᓚᑦᑎᔫᑉ ᑲᑎᒪᓂᕐᒥᒃ ᖃᐅᔨᔭᐅᔪᑎᒋᔭᐅᓪᓗᑎᒡᓗ ᐊᑐᖅᑐᓄᑦ ᓄᓇᖃᖅᑳᖅᑐᓄᑦ ᐃᖅᑲᓇᐃᔭᖅᑎᓄᑦ.

ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓄᑦ ᐱᓕᕆᔾᔪᓰᑦ ᖃᖓᒨᖓᔪᓪᓗ

ᑲᑎᓐᓂᕐᒧᑦ ᑲᑎᑲᑕᒃᑎᓪᓗᒋᑦ, ᒐᕙᒪᑐᖃᒃᑯᑦ ᐱᕕᖃᕐᓂᕐᓄᑦ ᐊᑲᐅᙱᓕᐅᕈᑎᖏᑦ ᐊᒃᑐᐊᔪᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓕᕆᔾᔪᓯᕐᓄᑦ ᖃᖓᓅᖓᔪᓄᓪᓗ ᐅᔾᔨᕆᔭᐅᓚᐅᖅᑐᑦ ᐱᓕᕆᕝᕕᖕᓂᑦ ᑎᒥᓂᓪᓗ ᐅᓄᖅᓯᑎᑦᑎᔪᒪᔪᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ.

ᐅᓄᖅᑐᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᐅᖃᓚᐅᖅᑐᑦ ᐱᕕᖃᕆᐊᖃᕐᓂᖓᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓃᑦ ᑎᑎᕋᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐊᑯᓂᐅᓂᖅᓴᐅᓪᓚᖃᑦᑕᓚᐅᖅᑐᑦ ᑎᑎᕋᓄᑦ ᖃᓪᓗᓈᑎᑑᖅᑐᓄᑦ ᐊᒻᒪᓗ ᐅᕝᕙᓘᓐᓃᑦ ᐅᐃᕖᑎᑑᖅᑐᓄᑦ. ᖃᖓᒨᖓᔪᑦ ᐃᓱᒪᒋᔭᐅᔪᑦ ᐊᑯᓂᐅᔾᔪᑕᐅᑐᐃᓐᓇᕆᐊᓖᓪᓗ ᐱᓕᕆᔭᐅᓂᖏᓐᓄᑦ ᐊᒃᓱᕉᑎᓂᒃ ᓴᖅᑭᔾᔪᑕᐅᔪᓐᓇᖅᐳᑦ ᓇᓕᖅᑯᓐᓇᓱᒡᓗᒋᑦ ᖃᖓᒨᖓᔪᑦ ᑎᓕᐅᕈᑕᐅᔪᑦ ᑎᑎᕋᓄᑦ ᑭᓱᓄᓪᓗ.

ᐃᒪᕐᒥᐅᑕᓕᕆᔨᒃᑯᑦ ᑭᒐᖅᑐᖅᑎᖏᑦ ᐅᖃᓚᐅᖅᑐᑦ ᐊᑐᕆᐊᓖᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓗᓂ ᐊᒃᓱᕈᕐᓇᒃᑲᓐᓂᕐᒪᑕ ᐃᖅᑲᓇᐃᔭᖅᑎᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓗᓂ ᓄᓇᖃᖅᑳᖅᑐᓄᑦ ᐅᖃᐅᓯᓕᖕᓄᑦ ᐃᑲᔪᕈᓐᓇᖅᑐᓄᑦ ᐃᓄᒃᑎᑑᓕᖅᑎᑦᑎᓂᕐᓄᑦ. ᐃᓛᓐᓂ ᐊᓯᓄᑦ ᐅᖃᐅᓯᓅᓕᖅᑎᑦᑎᔭᕆᐊᓖᑦ ᕿᓚᒥᒃᑯᑦ ᑐᓵᔨᓄᑦ ᑎᑎᕋᕐᕕᖓ/ᓯᓚᑖᓂᑦ ᐃᓄᒃᑎᑑᓕᕆᔩᑦ ᐱᓕᕆᔪᓐᓇᖏᒻᒪᑕ ᖃᖓᒨᖓᖁᔭᐅᔪᓄᑦ. ᑕᐃᒪᐃᒻᒪᑦ, ᑎᒥᓄᑦ ᐃᖅᑲᓇᐃᔭᖅᑏᑦ ᐃᓄᒃᑎᑑᓕᖅᑎᑦᑎᓲᑦ ᑐᑭᓯᐅᒪᖃᑎᒌᑦᑎᐊᕐᓂᐊᕐᒪᑕ ᐱᓕᕆᓂᕐᒥᒡᓗ ᑐᓂᓯᓗᑎᒃ, ᓯᓚᑖᓅᖓᓪᓗᓂ ᐃᖅᑲᓇᐃᔮᒥᓄᑦ ᐱᓕᕆᐊᒃᓴᖏᑕ.

ᐊᔾᔨᒌᖏᓐᓃᑦ ᐃᓄᐃᑦ ᐅᖃᐅᓯᖏᓐᓂ ᐃᓛᓐᓂ ᐊᒡᕕᐊᕈᑕᐅᓕᓲᖑᕗᑦ, ᐱᓗᐊᖅᑐᒥᒃ ᑐᓂᔭᓄᑦ ᐅᓄᖅᑐᓄᑦ ᑕᑯᔭᐅᔭᕆᐊᓕᖕᓄᑦ ᓈᒻᒪᒋᔭᐅᓂᕐᓄᓪᓗ ᐱᓕᕆᔾᔪᓯᖅᑎᒍᑦ. ᓇᓕᐊᖕᓄᑦ ᐅᖃᐅᓯᓄᑦ ᐃᓄᒃᑎᑑᓕᖅᑎᑦᑎᓃᑦ ᑐᓵᔨᓄᑦ ᑎᑎᕋᕐᕕᐊᒍᑦ ᐊᑐᐃᓐᓇᐅᖏᓐᓇᖏᒻᒪᑕ, ᓄᓇᒥᐅᑕᓂᑦ ᐊᑐᒐᒃᓴᓕᕆᔩᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᓯᓚᑖᓂᑦ ᐃᓄᒃᑎᑑᓕᖅᑎᑦᑎᔨᓂᒃ ᑎᓕᓯᔪᓐᓇᖅᐳᑦ.

ᑕᒻᒪᖅᓯᒪᖏᓐᓂᖏᑦ ᐃᓄᒃᑎᑑᓕᖅᑎᑦᑎᓯᒪᔪᑦ

ᑕᒻᒪᖅᓯᒪᖏᓐᓂᖏᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᐃᓱᒫᓘᑕᐅᓚᐅᕐᒥᔪᑦ ᑲᑎᓐᓂᕐᒧᑦ ᑲᑎᒪᓂᖅᑎᒍᑦ.

ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᐅᖃᐅᓯᓖᑦ ᐊᒃᓱᕈᕐᓇᖅᑐᓂᒃ ᑐᑭᓯᓇᓱᒃᖢᓂ ᐊᓯᓄᑦ ᐅᖃᐅᓯᓅᓕᖅᑎᓯᒪᔪᑦ ᑕᒻᒪᖅᓯᒪᖏᒻᒪᖔᑕ ᓈᒻᒪᒃᑲᔭᕐᓗᑎᒡᓗ ᓂᕆᐅᒋᔭᐅᔪᓄᑦ ᓄᓇᖃᖅᑳᖅᑐᓄᑦ ᓄᓇᓕᖕᓄᑦ. ᖃᐅᔨᓇᓱᒡᓗᓂ ᖃᓄᖅ ᐱᐅᓛᖑᒐᔭᕐᒪᖔᑦ ᐱᐅᓂᖏᓐᓄᑦ ᑕᑯᓇᒡᓗᒋᑦ ᑎᑎᕋᑦ ᐅᖃᐅᓯᐅᒋᓪᓗᓂ ᐃᓱᒫᓘᑎᑐᑦ.

ᓯᑯᓯᐅᖅᑎᒃᑯᑦ ᐱᓕᕆᔨᖏᑦ ᐅᖃᐅᓯᖃᓚᐅᖅᑐᑦ ᐊᒃᓱᕈᕐᓇᖅᑐᓂᒃ ᐊᓯᓄᑦ ᐅᖃᐅᓯᓅᓕᖅᑎᑦᑎᓇᓱᒃᖢᓂ ᐱᑐᐃᓐᓇᐅᖏᑦᑐᓂᒃ ᑎᑎᕋᓂᒃ ᑕᒻᒪᖅᓯᒪᖏᒃᑲᓗᐊᕐᒪᖔᑕᓗ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᑦ. ᐃᓚᖏᑎᒍᑦ, ᐃᓄᐃᑦ ᐅᖃᐅᓯᖏᑦ ᐃᓱᒪᓂᖃᕆᐊᖃᖅᐳᑦ ᐃᓄᒃᑎᑑᓕᖅᑎᑦᑎᓇᓱᒃᖢᓂ ᓇᓕᐊᓪᓗᐊᑕᓄᑦ ᓄᓇᓕᖕᓄᑦ ᐅᖃᐅᓯᖓᓂᒃ ᐅᖃᐅᓯᐅᔪᒥ. ᑕᐃᒪᐃᑦᑐᕕᓂᕐᒥᒃ ᐅᖃᐅᓯᖃᓚᐅᖅᑐᑦ :

“ᐃᓄᒃᑎᑐᑦ ᐊᑎᑐᖃᕗᑦ ‘ᑲᓇᑕᒥ ᓯᑯᓯᐅᖅᑎᓄᑦ’ ᐅᓇᐅᔪᖅ ‘ᐅᒥᐊᕐᔪᐊᑦ ᓯᑯᓂᒃ ᓱᕋᐃᓲᑦ.’ ᑕᐃᒪᓐᓇ ᐃᓄᐃᑦ ᓄᓇᓕᖏᓐᓂ ᐅᑭᐅᖅᑕᖅᑐᓂ ᐊᕕᒃᓯᒪᔪᓂ ᑕᐃᒎᓯᖃᒐᔪᒃᑐᑦ ᓯᒃᓯᐅᖅᑏᑦ ᐅᒥᐊᕐᔪᐊᖏᑦ ᑕᑯᔭᐅᖃᑦᑕᕋᒥᒃ ᓯᑯᓂ ᓯᖁᒥᑦᑎᔪᑦ ᐊᕐᕌᒎᑉ ᐃᓗᐊᓂ. ᓯᓚᑎᖏᓐᓂ ᑖᒃᑯᐊ ᓄᓇᐃᑦ, ᑕᐃᔭᐅᔾᔪᓯᖏᑦ ‘ᑲᓇᑕᒥ ᓯᑯᓯᐅᖅᑏᑦ’ ᑕᐃᔭᐅᒐᔪᒃᑐᑦ ‘ᓯᒡᔭᓂᒃ ᓴᐳᔾᔨᔩᑦ’ᑎᑐᑦ. “ᑕᐃᒎᓯᖅ ᑐᑭᖃᖏᑦᑐᖅ ᓄᓇᖃᖅᑳᖅᑐᓄᑦ ᓄᓇᓕᖕᓄᑦ ᐃᓱᒪᒋᓇᒍᓗ ᐃᓱᒪᒋᔭᐅᔪᖅ ᐅᖃᐅᓯᐅᑉ ᐊᓯᓄᑦ ᐅᖃᐅᓯᕈᖅᑎᑕᐅᔫᑉ. ᐊᓯᖏᑦ ᐊᒃᓱᕉᑏᑦ ᑕᐃᒎᓰᑦ ᓇᐃᓈᖅᓯᒪᔪᑦ (ᓲᕐᓗᑐᑦ ᐃᒪᕐᒥᐅᑕᓕᕆᔨᒃᑯᑦ ᑕᕆᐅᓂᒃ ᓴᐳᔾᔨᓂᕐᓄᑦ ᐸᕐᓇᐅᑎᖓ ᓴᓂᐊᓂ ᐊᓐᑎᐊᕆᐅᑉ ᐊᕕᒃᓯᒪᔪᓄᑦ ᐸᓖᓯᖏᑦ).”

ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᑕᐃᒪᓐᓇᐸᓗᒃᑕᐅᖅ ᐊᑐᓲᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓄᑦ ᐅᖃᐅᓯᓄᑦ ᖃᓪᓗᓈᑎᑐᑦ ᐃᓄᒃᑎᑐᓪᓗ ᐃᓛᓐᓂ ᑕᐃᒎᓯᖃᑲᐅᑎᒋᖏᒻᒪᑕ. ᐱᔭᕐᓂᖏᑦᑐᖅ ᑖᒃᑯᐊ ᐊᒃᓱᕈᕐᓇᙱᑎᓐᓇᓱᒃᖢᒋᑦ, ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥᒃᑯᑦ ᐃᖅᑲᓇᐃᔭᖅᑎᖏᑦ ᑲᑎᖃᑎᓚᐅᖅᑐᑦ ᑲᑎᒪᔨᓂᒃ ᓄᓇᖃᖅᑳᖅᑐᓄᑦ ᓄᓇᓕᖕᒧᑦ ᐃᓄᒃᑎᑑᓕᖅᑎᖦᖢᒋᑦ ᐅᖃᐅᓯᐅᒐᔪᒃᑐᑦ ᐊᑐᖅᑕᐅᒐᔪᒃᑐᓪᓗ ᖃᐅᔨᒪᔾᔪᒃᓴᖏᑦ ᐱᓕᕆᕝᕕᖕᓄᑦ ᐊᓯᓄᑦ ᑕᑯᔭᐅᓂᐊᕐᒪᑕ ᖃᐅᔨᒪᔾᔪᑕᐅᓗᑎᒃ ᐊᓯᓄᑦ ᑐᓵᔨᓄᑦ ᓯᕗᓂᕐᒥ ᑐᓵᔨᐅᖃᑦᑕᕐᓂᐊᖅᑐᓄᑦ.

ᒥᕐᖑᐃᖅᓯᕐᕕᓕᕆᔩᑦ ᑲᓇᑕᒥᒃᑯᑦ ᑭᒐᖅᑐᖅᑎᖏᑦ ᐅᖃᕆᓪᓗᑎᒃ ᐃᓛᓐᓂ ᑎᑎᕋᑦ ᐃᓄᒃᑎᑑᓕᖅᑎᓯᒪᔪᑦ ᐱᔭᐅᔪᑦ ᑐᓵᔨᓄᑦ ᑎᑎᕋᕐᕕᖓᓂᑦ ᑕᒻᒪᖅᓯᒪᔪᓐᓇᕐᒪᑕ. ᑕᐃᒪᐃᒻᒪᑦ ᐱᓕᕆᕝᕕᖕᒧᑦ ᐃᖅᑲᓇᐃᔭᖅᑏᑦ ᑕᑯᓇᒐᔪᒃᑐᑦ ᑎᑎᕋᓂᒃ ᐃᓄᒃᑎᑑᓕᖅᑎᑦᑎᓯᒪᔪᓂᒃ.

ᐃᒪᕐᒥᐅᑕᓕᕆᔨᒃᑯᑦ ᐱᓕᕆᔨᖏᑦ ᐃᓱᒫᓘᑎᖃᓚᐅᕐᒥᔪᑦ ᑕᒻᒪᖅᓯᒪᔪᓄᑦ ᐃᓗᐊᓂ ᐃᓄᒃᑎᑑᓕᖅᑎᑦᑎᓯᒪᔪᓂ. ᐃᓛᓐᓂ ᑐᓵᔩᑦ ᑐᑭᓯᖃᑦᑕᖏᒻᒪᑕ ᓇᓕᐊᓪᓗᐊᑕᓄᑦ ᐅᖃᕐᒪᖔᑕ ᐊᒻᒪᓗ ᐅᕝᕙᓘᓐᓃᑦ ᐅᖃᓪᓚᒡᕕᐅᔪᑦ. ᑕᐃᒪᓐᓇ ᑕᒻᒪᕐᓗᑎᒃ ᐊᓯᐊᓂᒃ ᐅᖃᕈᓐᓇᕐᒪᑕ. ᑕᐃᒪᐃᑦᑐᕕᓂᕐᒥᒃ ᐅᖃᐅᓯᖃᓚᐅᖅᑐᑦ :

“ᐃᒪᕐᒥᐅᑕᓕᕆᔨᒃᑯᑦ ᕿᓂᓚᐅᖅᑐᑦ ᑎᑎᕋᒥᒃ ᐃᓄᒃᑎᑑᓕᖅᑎᑦᑎᔪᒪᓪᓗᑎᒃ ᖃᓪᓗᓈᑎᑐᒥᑦ ᐊᔾᔨᖃᖅᖢᓂ ᐃᓄᖕᓂᒃ. ᑐᓵᔨ ᐊᑐᓚᐅᕐᒪᑦ ᕿᑭᖅᑖᓘᑉ ᓂᒋᐊᓂᑦ ᐅᖃᐅᓯᕐᒥᒃ ᐃᓄᒃᑎᑑᓕᖅᑎᑕᓄᑦ ᐊᔾᔨᐅᑉ ᐊᔾᔨᓕᐅᖅᑕᐅᓂᕆᓇᓱᒋᔭᖓ ᐊᑐᖅᖢᒍ. ᐃᓄᒃᑎᑑᓕᖅᑎᑕᐅᔪᑦ ᑐᑭᖏᑦ ᓈᒻᒪᒐᑎᒃ ᓄᓇᓕᐅᑉ ᐃᓄᐃᑦ ᓄᓇᒥᖏᓐᓄᑦ, ᕿᑭᖅᑖᓘᑉ ᐅᐊᖕᓇᖓᓂᕐᒥᐅᖑᒐᒥᒃ.”

ᓄᓇᒥᐅᑕᓂᑦ ᐊᑐᒐᒃᓴᓕᕆᔩᑦ ᑲᓇᑕᒥᒃᑯᑦᑭᒐᖅᑐᖅᑎᖏᑦ ᐅᖃᓚᐅᖅᑐᑦ ᐊᒃᓱᕉᑎᓖᑦ ᐊᒃᑐᐊᔪᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓄᑦ ᑭᒡᓕᓯᓂᐊᖅᑎᓂᑦ ᑕᐃᒎᓯᓄᑦ. ᓲᖃᐃᒻᒪ ᑕᐃᒎᓯᓪᓚᑦᑖᖃᖃᑦᑕᖏᒻᒪᑦ ᑭᒡᓕᓯᓂᐊᕐᓂᕐᓄᑦ, ᐃᓱᒪᒋᔭᐅᔭᕆᐊᖃᖅᐳᑦ ᑕᐃᒎᓯᓕᐅᕆᐊᖃᕐᒪᖔᑕ ᐃᓐᓇᒧᑦ ᓱᓕᓂᐊᕐᒪᑦ ᐊᑐᕐᓗᓂ ᓇᓕᐊᖕᓄᑦ ᐅᖃᐅᓯᕆᔭᐅᔪᒧᑦ.

ᓴᓇᓯᒪᔪᓄᑦ ᖃᕋᓴᐅᔭᓕᕆᓂᕐᓄᓪᓗ ᐊᑲᐅᙱᓕᐅᕈᑏᑦ

ᖃᔅᓯᑲᓪᓚᑦ ᐱᓕᕆᕝᕖᑦ ᐅᖃᒃᑲᓐᓂᓚᐅᖅᑐᑦ ᓴᓇᓯᒪᔪᓄᑦ ᐊᑲᐅᙱᓕᐅᕈᑏᑦ ᐊᒃᓱᕈᕐᓇᕐᒪᑕ ᐅᓄᖅᓯᑎᑦᑎᓇᓱᒃᖢᓂ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓂᒃ ᐃᓐᑐᓂᐊᑦᑯᑦ ᓴᖅᑭᔮᕐᓂᐊᖅᑐᓄᑦ. ᐱᓕᕆᕝᕖᑦ ᐅᖃᓚᐅᖅᑐᑦ ᐃᓚᖏᑦ ᐊᐃᖅᑮᕕᖕᓃᑦᑐᓄᑦ ᐊᐅᓚᔾᔪᓰᑦ ᐊᑐᖅᑕᐅᔪᑦ ᐊᐃᖅᑮᕕᓕᐅᕐᓂᕐᓄᑦ ᐃᑲᔪᑐᐃᓐᓇᕐᒪᑕ ᖃᓗᓈᑎᑐᑦ ᐅᐃᕖᑎᑐᓪᓗ.

ᑲᓇᑕᒥ ᑖᒃᓯᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐅᖃᓚᐅᖅᑐᑦ ᓴᓇᓯᒪᔪᓄᑦ ᐱᕕᑭᒻᒪᑕ ᐊᓯᓄᑦ ᐅᖃᐅᓯᓅᓕᖅᑎᑦᑎᓇᓱᒃᖢᓂ ᐃᓄᒃᑎᑐᑦ ᑎᑎᕋᖏᑎᒍᑦ, ᐊᔾᔨᐅᖏᑦᑐᓂᒡᓗ ᐊᒃᓱᕉᑎᖃᖅᖢᑎᒃ.

ᑕᐃᒪᐃᓗᐊᖁᓇᒍ ᑲᓇᑕᒥ ᑖᒃᓯᓕᕆᔨᒃᑯᑦ ᐊᕕᓚᐅᖅᑕᖏᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒻᒪᔪᑦ ᓄᓇᖃᖅᑳᖅᑐᓄᑦ ᑖᒃᓯᓄᑦ ᐊᐃᖅᑮᕕᓂ ᐅᖃᖅᑐᓄᑦ ᑐᙵᔪᓄᑦ ᐅᖃᐅᓯᐅᔪᓄᑦ ᓄᑖᕈᕆᐊᖅᓯᔪᒪᓕᕌᖓᑕ ᐊᓯᔾᔩᓗᑎᒡᓘᓐᓃᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓯᒪᔪᓂᒃ. ᑭᒡᓕᖏᑦ ᐊᑐᕆᐊᓖᑦ ᐃᓗᐃᑦᑐᒧᑦ ᑎᑎᕋᒧᑦ ᐊᓯᓄᑦ ᐅᖃᐅᓯᓅᓕᖅᑎᑕᐅᓂᐊᖅᑐᒧᑦ ᓄᑖᕈᕆᐊᖅᑐᑦ ᐃᓚᓕᐅᑎᓇᓱᒡᓗᒋᑦ, ᑕᒻᒪᖅᓯᒪᖏᓐᓂᖅᓴᐅᑎᓪᓗᒍ ᐊᑐᓂ ᐅᖃᖅᑐᑦ ᓄᑖᕈᖅᑕᐅᓂᐊᕈᑎᒃ. ᑖᒃᑲ ᐊᑐᓗᐊᖅᐳᑦ ᑲᓇᑕᒥ ᑖᒃᓯᓕᕆᔨᓄᑦ ᒪᓕᒐᑦ ᑎᓕᐅᕆᔪᓪᓗ ᑖᒃᓯᓄᑦ ᐃᑲᔫᑎᓄᑦ ᐊᓯᔾᔨᒐᔪᖕᒪᑕ, ᑎᑎᕋᓪᓗ ᓄᑖᕈᕆᐊᖃᖅᐸᒃᖢᑎᒃ.

ᐅᖃᐅᓯᐅᔪᑦ ᖃᐅᔨᔭᐅᔪᓂᑦ ᐱᓕᕆᔾᔪᓯᑦᑎᐊᕙᐅᓛᓪᓗ

ᑲᑎᓐᓂᕐᒧᑦ ᑲᑎᒪᓂᖅᑎᒍᑦ, ᐱᓕᕆᕖᑦ ᐅᖃᐅᓯᖃᖃᑦᑕᓚᐅᖅᑐᑦ ᖃᐅᔨᔭᒥᓂᒃ ᐱᓕᕆᔾᔪᓯᑦᑎᐊᕙᐅᓛᓂᒡᓗ ᐱᓕᕆᔭᒥᓄᑦ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᑲᓇᑕᒥᐅᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ.

ᐃᖅᑲᓇᐃᔭᖅᑎᓄᑦ ᐱᓕᕆᖃᑎᒌᑦ

ᐸᓖᓯᒃᑯᑦ ᓴᓇᓯᒪᕗᑦ ᐱᓕᕆᖃᑎᒌᖕᓂᕐᓂᒃ ᓄᓇᖃᖅᑳᖅᑐᓄᑦ ᐅᖃᐅᓯᖏᓐᓄᑦ ᐊᔪᕈᓐᓃᖅᓴᓂᕐᓄᑦ ᐃᓕᓴᐃᔨᓄᑦ ᐊᑐᐃᓐᓇᐅᑎᑦᑎᓪᓗᑎᒃ ᐅᖃᐅᓯᓄᑦ ᐊᔪᕈᓐᓃᖅᓴᓂᕐᓂᒃ ᐃᖅᑲᓇᐃᔭᖅᑎᒥᓄᑦ ᐃᓂᓕᖕᓄᑦ ᐊᑑᑎᖃᑦᑎᐊᖅᑐᓂ ᐱᔨᑦᑎᕋᕐᓂᕐᓂ. ᐊᔪᕈᓐᓃᖅᓴᓃᑦ ᑐᕌᖓᔪᑦ ᐃᑲᔫᑕᐅᓗᑎᒃ ᐱᐅᔪᒃᑯᑦ ᐱᓕᕆᖃᑎᒌᖕᓂᕐᓄᑦ ᓄᓇᖃᖅᑳᖅᑐᓄᑦ ᓄᓇᓕᖕᒥᐅᓄᑦ, ᐊᔪᕈᓐᓃᖅᑎᓪᓗᒋᓪᓗ ᓄᓇᖃᖅᑳᖅᑐᑦ, ᐃᓄᐃᑦ ᒪᐃᑏᓪᓗ ᐃᖅᑲᓇᐃᔭᖅᑎᖏᑦ ᐅᑎᖅᑎᓪᓗᒋᑦ, ᑲᔪᓯᑎᓪᓗᒋᑦ, ᓴᙱᒃᑎᓪᓗᒋᓪᓘᓐᓃᑦ ᐅᖃᐅᓯᑐᖃᓂ. ᐸᓖᓯᒃᑯᑦ ᐅᓪᓗᒥᐅᔪᖅ ᖃᕋᓴᐅᔭᒃᑯᑦ ᐅᖃᐅᓯᓄᑦ ᐊᔪᕈᓐᓃᖅᓴᓂᕐᓄᑦ ᐱᕕᖃᖅᑎᑦᑎᔪᑦ 8ᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖃᓯᐅᖦᖢᒋᑦ ᐃᓄᒃᑎᑐᑦ. ᓴᓇᖕᒥᔪᑦᑕᐅᖅ ᐃᓕᓴᐃᔨᓄᑦ ᐃᓕᓴᐃᓂᕐᒥᒃ (MAP) ᐊᑐᐃᓐᓇᐅᑎᑕᐅᓪᓗᓂ ᐃᓄᒃᑎᑑᖏᓐᓇᖅ ᐱᕕᒃᓴᒧᑦ ᐃᖅᑲᓇᐃᔭᖅᑎᓄᑦ ᐅᖃᓪᓚᒍᓐᓇᖅᓯᒃᑲᓐᓂᕐᓂᐊᕐᒪᑕ ᐃᓕᖅᑯᓯᑐᖃᓂᒡᓗ ᑐᑭᓯᓗᑎᒃ.

ᑐᕌᕈᑏᑦ ᑎᑎᕋᑦ

ᐅᖃᖅᑐᑦ ᑲᓇᑕᒥ ᑖᒃᓯᓕᕆᔨᓂᑦ ᐅᖃᓚᐅᖅᑐᑦ ᑎᒥᖓᑦ ᓴᓇᖕᒪᑕ ᐃᒻᒥᓄᑦ ᑐᕌᕈᑎᓂᒃ ᑎᑎᕋᓂᒃ ᐃᑲᔫᑕᐅᓗᑎᒃ ᐱᓕᕆᔭᓂᒃ ᐊᕕᒃᑐᖅᓯᒪᔪᓂᒡᓗ ᐊᓯᓄᑦ ᐅᖃᐅᓯᓅᓕᖅᑎᓐᓇᓱᒃᑕᒥᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ. ᑐᕌᕈᑎ ᐱᖃᓯᐅᔾᔨᔪᖅ ᖃᐅᔨᒪᔾᔪᑎᒃᓴᓂᒃ ᐊᓯᓄᑦ ᐅᖃᐅᓯᓅᓕᖅᑎᑕᒃᓴᑦ ᐱᔭᕇᖅᑕᐅᔪᓐᓇᕐᒪᖔᑕ, ᐃᓄᒃᑎᑑᓕᖅᑎᑦᑎᓂᕐᓄᑦ ᖃᐅᔨᒪᔭᐅᔪᓂᒡᓗ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐊᑐᖅᑕᐅᔪᓄᑦ ᑲᓇᑕᒥ ᐊᑐᐊᒐᓂᒡᓗ ᐃᑲᔪᖅᑐᓂᒃ ᐅᖃᐅᓰᑦ ᐊᑐᖅᑕᐅᓂᖏᓐᓄᑦ.

PCH ᓴᓇᓯᒪᕗᑦ ᐃᒻᒥᓄᑦ ᑐᕌᕈᑎᓂᒃ ᑎᑎᕋᓂᒃ ᐃᑲᔪᖅᑕᐅᓪᓗᑎᒃ ᓄᓇᖃᖅᑳᖅᑐᑦ ᐱᓕᕆᖃᑎᒥᓄᑦ ᓇᓗᓇᐃᖅᓯᓪᓗᑎᒃ ᒫᓐᓇᒧᓚᐅᑲᒃ ᐱᓕᕆᔾᔪᓯᕐᒥᒃ ᓇᓕᐊᒃ ᐅᖃᐅᓯᖅ ᐊᑐᖅᑕᐅᓂᐊᕐᒪᒑᑦ ᑐᓴᕋᓱᖕᓂᕐᓄᑦ ᐱᓕᕆᓕᕌᖓᒥᒃ ᓄᓇᖃᖅᑳᖅᑐᓄᑦ ᑲᑎᙵᔪᓄᑦ. ᑐᕌᕈᑎ ᑎᑎᕋᖅ ᐱᖃᓯᐅᔾᔨᔪᖅ ᖃᔅᓯᓂᒃ ᑐᓴᕋᓱᖕᓂᕐᓂᒃ, ᐱᖃᓯᐅᖦᖢᒋᑦ ᓄᓇᖃᖅᑳᖅᑐᑦ ᐱᓕᕆᖃᑎᑦᑕ ᐃᓱᒪᒋᔭᖏᑦ, ᐱᓕᕆᔾᔪᓯᓂᒃ ᑐᕌᕈᑕᐅᓂᐊᖅᑐᓂᒃ ᓇᓕᐊᒃ ᐅᖃᐅᓯᖅ ᐊᑐᖅᑕᐅᓂᐊᕐᒪᖔᑦ ᑐᓴᒐᒃᓴᒧᑦ, ᐱᖃᓯᐅᓪᓗᒋᑦ ᐊᕕᒃᓯᒪᔪᒧᑦ ᐊᑐᖅᑐᑦ ᐃᓱᒪᒋᔭᕆᐊᓖᑦ.

ᐃᖅᑲᓇᐃᔭᖅᑎᖏᑦ ᓯᑯᓯᐅᖅᑎᓂᑦ ᐅᖃᓚᐅᖅᑐᑦ ᑎᒥᖓᑦ ᓴᓇᓯᒪᕗᑦ ᐊᐅᓚᔾᔪᓯᕐᓂᒃ ᓄᓇᓕᖕᓂᒃ ᑐᓴᖅᑎᑦᑎᓂᕐᓄᑦ ᑐᕌᕈᑎᓖᑦ ᓇᓕᐊᒃ ᐅᖃᐅᓰᑦ ᐊᒃᑐᐊᔪᑦ ᐊᔾᔨᒌᖏᑦᑐᓄᑦ ᐅᑭᐅᖅᑕᖅᑐᒥ ᓄᓇᓕᖕᓄᑦ ᐊᕕᒃᓯᒪᔪᓄᓪᓗ ᐊᑐᖅᑕᐅᔪᓐᓇᕐᒪᖔᑕ ᐃᓄᒃᑎᑑᓕᖅᑎᑦᑎᓂᕐᓄᑦ. ᓱᓕᓗ ᓯᑯᓯᐅᖅᑏᑦ ᓴᓇᓚᐅᖅᑐᑦ ᑎᑎᕋᒥᒃ ᐅᖃᖅᑕᐅᒐᔪᒃᑐᓕᖕᓂᒃ ᑐᓵᔨᓄᑦ ᑎᑎᕋᕐᕕᖓᓄᑦ ᐊᑐᖅᑕᐅᓂᐊᕐᒪᑕ ᑐᓵᔨᓂᑦ ᑖᒃᑯᓄᖓᑦᑕᐃᓐᓇᖅ ᑕᐃᓯᓂᕐᓄᑦ ᐃᓄᒃᑎᑑᓕᖅᑎᑕᓄᑦ.

ᐊᑐᕐᓗᒋᑦ ᑕᕝᕙᐅᕙᒌᖅᑐᑦ ᐊᑐᐊᒐᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᓂᕐᓄᑦ

ᓯᑯᓯᐅᖅᑎᒃᑐᑦ ᐃᖅᑲᓇᐃᔭᖅᑎᖏᑦ ᐊᑐᖅᑐᑦ ᐃᓄᐃᑦ ᓄᓇᖓᓂ ᐊᑐᐊᒐᖓᓂᒃ (ᐃᓐᑉ), ᓄᓇᕘᒧᑦ ᐃᓕᓴᕆᔭᐅᓯᒪᔪᓄᑦ ᐅᖃᐅᓯᓄᑦ ᐱᖁᔭᕐᔪᐊᕐᒥᒃ, ᓄᓇᕘᒧᓪᓗ ᐅᖃᐅᓰᑦ ᓴᐳᔾᔭᐅᓂᖏᓐᓄᑦ ᐱᖁᔭᕐᔪᐊᕐᒥᒃ ᐊᑐᕆᐊᓕᒋᓪᓗᒋᑦ ᐊᓯᓄᑦ ᐅᖃᐅᓯᓅᓕᖅᑎᑕᒥᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ. ᓱᓕᓗ, ᓯᑯᓯᐅᖅᑏᑦ ᐊᑐᖅᑐᑦ ᐃᓱᒪᒋᔭᕐᒥᒃ ᐃᓄᐃᑦ ᐱᔪᓐᓇᐅᑎᖃᕐᒪᑕ ᐊᑐᕐᓂᕐᓄᑦ ᑲᑉᐱᐊᓇᖏᑦᑐᒦᓐᓂᕐᓄᑦ ᖃᐅᔨᒪᔭᐅᔪᓂᒃ ᐅᖃᐅᓯᒃᑯᑦ ᑐᑭᓯᔪᓐᓇᖅᑕᒥᓄᑦ ᐊᓯᓄᑦ ᐅᖃᐅᓯᓅᓕᖅᑎᑦᑎᔾᔪᑎᒋᓪᓗᒋᑦ.

ᐃᓄᓕᒫᓄᑦ ᐸᓯᔨᓄᑦ ᐱᔨᑦᑎᕋᖅᑏᑦ ᑲᓇᑕᒥᒃᑯᑦ ᐱᓕᕆᔨᖏᑦ ᐱᔨᑦᑎᕋᕐᓃᑦ ᐱᕋᔭᒃᑕᓄᑦ ᓄᓇᕘᒥ ᐊᑐᐃᓐᓇᐅᑎᑕᐅᔪᑦ ᑲᓇᑕᒥ ᐱᕋᔭᒃᑕᓄᑦ ᐱᖁᔭᕐᔪᐊᖅ ᐱᔪᓐᓇᐅᑎᓄᑦ (CVBR). ᐸᓯᔩᑦᑕᐅᖅ ᒪᓕᒋᐊᓖᑦ ᐃᓄᑦᑎᐊᕙᐅᓂᕐᓄᑦ ᐃᓕᖅᑯᓯᓂᒃ ᐱᖁᔭᓄᑦ ᓴᓴᐃᐊᑎᖓᓄᑦ ᓄᓇᕘᑉ ᐊᑐᓂᓄᑦ ᐃᓄᖕᓄᑦ ᐱᔨᑦᑎᕋᕐᓂᖏᓪᓗ ᐃᓄᓕᒫᑦ ᐊᑐᐃᓐᓇᐅᑎᑕᐅᓗᑎᒃ ᐃᓕᓴᕆᔭᐅᓯᒪᔪᕐᒧᑦ ᐅᖃᐅᓯᕐᒧᑦ ᓂᕈᐊᖅᑕᒧᑦ ᐃᓄᓕᒫᒥᐅᓂᑦ,ᐱᖃᓯᐅᖦᖢᒋᑦ ᐃᓄᒃᑎᑐᑦ ᓄᓇᕘᒥ.

ᖃᕋᓴᐅᔭᑦ ᐃᓱᒪᖏᓐᓄᑦ ᓴᓇᓯᒪᔪᑦ

ᑲᓇᑕᒥ ᑖᒃᓯᓕᕆᔨᒃᑯᓐᓂᑦ ᑭᐅᔪᑦ ᑎᓕᔭᐅᔪᑦ ᑖᔅᓱᒧᖓ ᐅᓂᒃᑳᒧᑦ ᐅᖃᓚᐅᖅᑐᑦ ᐊᑐᓲᑦ ᒪᐃᑯᕈᓴᕝᑦ ᐃᓄᒃᑎᑑᓕᖅᑎᑦᑎᔾᔪᑎᖓᓂᒃ, ᓴᓇᔭᐅᖃᑕᐅᔪᖅ ᒐᕙᒪᖓᓄᑦ ᓄᓇᕘᑉ, ᖃᐅᔨᓴᐅᑕᐅᓪᓗᓂ ᑕᑯᓇᒃᑐᓄᑦ ᐊᓯᓄᑦ ᐅᖃᐅᓯᓅᓕᖅᑎᓐᓇᓱᒃᑕᒥᓄᑦ ᓄᓇᖃᖅᑳᖅᑐᓄᑦ ᑖᒃᓯᓕᕆᓂᕐᓄᑦ ᐊᐃᖅᑮᕕᐊᓂ. ᑲᓇᑕᒥ ᑖᒃᓯᓕᕆᔨᒃᑯᑦ ᖃᐅᔨᓴᐃᓐᓇᖅᑐᑦ ᖃᕋᓴᐅᔭᑦ ᐃᓱᒪᖏᓐᓄᑦ ᑐᓵᔨᓯᐅᑏᑦ ᐱᓕᕆᑦᑎᐊᕐᓂᖏᓐᓂᒃ ᑐᙵᐃᓐᓇᖅᑎᓪᓗᒋᑦ ᐊᔪᙱᓗᐊᖅᑐᓄᑦ ᑐᓈᔨᓄᑦ.

ᑭᖑᓪᓕᕐᒥ ᐱᓕᕆᐊᒃᓴᑦ

ᐱᕈᖅᓴᓪᓗᒋᑦ ᖃᐅᔨᔭᐅᔪᓂᑦ ᑲᑎᓐᓂᕐᒧᑦ ᑲᑎᒪᓂᖅᑎᒍᑦ, PCH ᓯᕗᒧᐊᖅᑎᑦᑎᓂᐊᖅᑐᑦ ᑎᓕᐅᕈᑎᓂᒃ ᐅᓄᖅᓯᑎᑦᑎᓂᕐᓂᒃ ᐊᑐᕈᒪᔪᓄᑦ ᒐᕙᒪᑐᖃᒃᑯᑦ ᐱᔨᑦᑎᕋᕐᓂᖏᓐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ, ᑐᕌᖅᑕᖃᕐᓗᑎᒃ ᐊᑐᖅᑕᐅᓂᖏᓐᓄᑦ ᐃᓄᒃᑎᑐᑦ ᓄᓇᕘᒥ.

ᐱᓕᕆᖃᑎᒋᓪᓗᒋᑦ ᐃᑲᔪᖅᑎ ᑐᖓᓕᕐᒧᑦ ᒥᓂᔅᑕᐅᑉ ᐊᐅᓚᑦᑎᔩᑦ ᑲᑎᒪᔨᖏᑦ, ᐱᓕᕆᓂᕐᒧᑦ ᐳᖅᑐᓂᕐᓄᑦ ᑲᑎᒪᔨᖏᑦ, ᓄᓇᖃᖅᑳᖅᑐᑦ ᐱᓕᕆᖃᑎᕗᑦ ᒐᕙᒪᖓᓪᓗ ᓄᓇᕘᑉ, ᐱᒋᐊᕈᑎᓂᒃ ᑕᑯᓇᒍᓐᓇᓚᐅᖅᑐᒍᑦ (ᓲᕐᓗᑐᑦ, ᓴᓇᔭᐅᔪᑦ ᐱᓕᕆᑦᑎᐊᓛᖑᔾᔪᓯᕐᓄᑦ ᑎᓕᐅᕈᑏᑦ, ᖃᐅᔨᒪᔭᐅᔪᓂᒃ ᐊᓯᓄᑦ ᖃᐅᔨᑎᑦᑎᓃᑦ, ᐱᓕᕆᔪᑦ ᐊᒃᑐᐊᔪᓄᑦ ᖃᕋᓴᐅᔭᑦ ᐃᓱᒪᖏᓐᓄᑦ ᐃᓄᒃᑎᑑᓕᖅᑎᑦᑎᔾᔪᑎᓂᒃ, ᐊᔪᕈᓐᓃᖅᓴᓂᕐᓄᑦ ᐱᕕᒃᓴᑦ, ᐊᓯᓪᓗ).

PCH ᖃᐅᔨᓴᕐᓂᐊᕐᒥᔪᑦ ᐃᓕᓴᕆᔭᐅᓗᑎᒃ ᐱᒋᐊᕈᑕᐅᔪᓐᓇᖅᑐᓂᒃ ᓯᕗᒧᐊᖅᑎᑕᐅᔪᓐᓇᖅᑐᓂᒃ ᐊᒃᑐᐊᔪᓄᑦ ᐊᖏᖃᑎᒌᖕᓂᕐᓄᑦ, ᐋᖅᑭᒃᓯᒪᓂᕐᓄᑦᐊᒻᒪᓗ ᐅᕝᕙᓘᓐᓃᑦ ᒪᓕᒋᐊᓕᖕᓄᑦ.

ᐃᓚᓕᐅᓯᒪᔪᖅ A : PCH ᑮᓇᒧᑦ ᑲᑎᓐᓂᕐᒧᑦ ᐊᐱᖅᑯᑏᑦ

ᐊᑎᖓ ᐱᓕᕆᕝᕕᐅᑉ : (ᑎᑎᕋᕈᒃ ᐱᓕᕆᕝᕕᐅᕐ ᐊᑎᖓ)

ᐊᑎᖓ ᑲᓐᑐᕋᒃᑎᐅᑉ (ᑎᑎᕈᒃ ᑲᓐᑐᕋᒃᑎᐅᑉ ᐊᑎᖓ)

ᑲᓐᑐᕋᒃᑎᐅᑉ ᖃᕋᓴᐅᔭᒃᑯᑦ ᑐᕌᕈᑎᖓ : (ᑎᑎᕈᒃ ᑲᓐᑐᕋᒃᑎᐅᑉ ᖃᕋᓴᐅᔭᒃᑯᑦ ᑐᕌᕈᑎᖓ)

ᓇᓗᓇᐃᖅᓯᓂᖅ

ᒪᓕᒃᖢᒍ ᐅᖃᖅᑕᐅᓂᖓ ᓯᕗᓪᓕᖅᐹᒥᐱᓕᕆᓂᐅᑉ ᐳᖅᑐᓂᖓᓄᑦ ᑲᑎᒪᔨᖏᑕ ᐱᓕᕆᖃᑎᒌᕗᓪᓗ ᑲᑎᒪᓂᑦᑎᓐᓂ, ᐱᓕᕆᖃᑎᒌᕗᑦ ᐱᓕᕆᕗᑦ ᑮᓇᒧᑦ ᑲᑎᓐᓂᕐᒧᑦ ᑲᑎᒪᓂᕐᓂᒃ ᐊᔾᔨᒌᖏᑦᑐᓂᒃ ᐱᓕᕆᕝᕕᓂᒃ ᓴᖅᑭᔮᖅᑎᑦᑎᓯᒪᔪᓄᑦ ᐱᒋᐊᖅᑳᕐᓂᕐᓂᒃ ᐅᓄᖅᓯᒋᐊᕋᓱᒃᖢᒋᑦ ᐱᔨᑦᑎᕋᕐᓂᕐᓂ ᐊᑐᐃᓐᓇᐅᑎᑕᓂ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ. ᑖᒃᑯᐊ ᐱᓕᕆᔭᐅᔪᑦ ᖃᐅᔨᔾᔪᑎᒋᓂᐊᖅᑕᕗᑦ ᐱᕕᖃᕐᒪᖔᑕ ᐃᓗᐊᓂ ᒐᕙᒪᑐᖃᒃᑯᑦ ᑎᒥᖏᓐᓂ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ.

ᖃᓄᐃᑕᐅᓇᓱᒃᑕᖓ ᑕᑯᓇᒡᓗᒋᑦ ᐱᕕᖃᕐᓂᕐᓄᑦ ᒪᓕᒋᐊᓖᑦ ᐊᑑᑎᖃᑦᑎᐊᖅᑐᓄᑦ ᐱᓕᕆᕝᕕᖕᓄᑦ ᑎᒥᓄᓪᓗ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᐃᓄᒃᑎᑐᑦ ᓄᓇᕘᒥ. ᑖᓐᓇ ᐱᖃᓯᐅᔾᔨᔪᖅ ᐊᔾᔨᒌᖏᑦᑐᓂᒃ ᐃᓚᓂᒃ :

• ᐃᖅᑲᓇᐃᔭᖅᑎᓄᑦᐱᕕᖃᕐᓂᖅ (ᓲᕐᓗᑐᑦ, ᐃᖅᑲᓇᐃᔮᖃᕐᓂᖅ ᓄᖅᑲᑎᑦᑎᖏᓐᓂᕐᓗ)
• ᐱᖃᕆᐊᖃᕐᓂᖅ ᓇᓕᐊᓪᓗᐊᑕᓄᑦ ᐊᔪᙱᓗᐊᖅᑕᒥᓄᑦ (ᓲᕐᓗᑐᑦ, ᑐᓵᔨ, ᖃᕋᓴᐅᔭᓕᕆᔨ)
• ᐊᑐᐃᓐᓇᐅᔪᑦ ᐅᖃᓪᓚᒃᑏᑦ ᓇᓕᐊᓪᓗᐊᑕᓂ ᓄᓇᓂ
• ᑮᓇᐅᔭᑎᒍᑦ ᐊᑐᕆᐊᓖᑦ

ᐊᑐᕐᓗᒍ ᑮᓇᒧᑦ ᑲᑎᓐᓂᕐᒧᑦ ᑲᑎᒪᓂᖅᑎᒍᑦ, ᐃᓕᑦᑐᒪᕗᒍᑦ :

• ᐅᓪᓗᒥᐅᔪᖅ ᐱᓕᕆᔭᑦ ᐱᓕᕆᕝᕕᖏᓐᓂ ᐊᑐᐃᓐᓇᐅᑎᑦᑎᓗᑎᒃ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ. ᑖᒃᑯᐊ ᐱᖃᓯᐅᔾᔨᔪᓐᓇᖅᑐᑦ ᒥᑭᑦᑐᓂᒃ ᐱᒋᐊᕈᑎᓂᒃ ᐱᒋᐊᕈᑎᓂᒡᓗ ᐱᓕᕆᔭᓄᑦ.
• ᓯᕗᓂᕐᒥ ᐱᓕᕆᔭᑦ (ᐱᑕᖃᕈᓂ) ᐸᕐᓇᒃᑕᐅᔪᑦ.
• ᐅᓪᓗᒥᐅᔪᖅ ᐱᕕᖃᕐᓂᖅ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᑕᕝᕙᐅᔪᓂ ᐃᓗᐊᓂ ᐱᓕᕆᕝᕕᖕᓂ ᐱᑕᖃᖏᑦᑐᓂᓗ ᐊᒃᑐᐊᔪᓄᑦ ᐱᓕᕆᕝᕕᖕᓂ ᐱᕕᖃᕐᓂᕐᓂ ᐱᔪᒪᔪᓂᓪᓗ ᐱᔨᑦᑎᕋᕐᓂᕐᓂᒃ.
• ᐃᓱᒪᒋᔭᐅᔪᑦ ᐊᒃᑐᐊᔪᓄᑦ ᐊᒡᕕᐊᕈᑎᓄᑦ, ᐊᒃᓱᕉᑎᓄᑦ ᐃᓕᑕᓄᓪᓗ.

ᐱᔨᑦᑎᕋᕐᓃᑦ ᐊᑐᐃᓐᓇᐅᔪᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ – ᑲᔪᓰᓐᓇᖅᑐᖅ

ᑲᔪᓰᓐᓇᖅᑐᖅ ᐱᔨᑦᑎᕋᕐᓂᖅ ᖅ ᐃᓄᒃᑎᑐᑦ ᓄᓇᕘᒥ ᓴᖅᑭᓚᐅᖅᑐᖅ ᐱᓕᕆᔭᕇᓕᖅᑎᓪᓗᒋᑦ 2022-23ᒥ ᐱᓕᕆᖃᑎᒋᓪᓗᒋᑦ ᓄᓇᕗᑦ ᑐᙵᕕᒃᑯᑦ ᒐᕙᒪᑐᖃᒃᑯᓐᓂᓪᓗ ᐱᓕᕆᖃᑎᕗᑦ.

ᑲᔪᓰᓐᓇᕐᓂᖓ ᐊᑐᕈᒪᔪᑦ ᐱᔨᑦᑎᕋᕐᓂᕐᓂᒃ

ᓴᖅᑭᔮᖅᑎᑦᑎᔪᑦ ᐅᖃᐅᓯᐅᔪᓄᑦ ᑕᑉᐱᑲᓂ ᑐᕌᕈᑎᒋᓗᒋᑦ, ᑭᐅᒃᑭᑦ ᐅᑯᐊ ᐊᐱᖅᑯᑏᑦ.

ᐱᕕᖃᕐᓂᖅ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ

• ᑭᓱᒥᒃ ᐱᔨᑦᑎᕋᕐᓂᕐᒥᒃ (ᐱᑕᖃᕈᓂ) ᐱᓕᕆᕝᕖᑦ/ᑎᒥᖓ ᐊᑐᐃᓐᓇᐅᑎᑦᑎᕙᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ? ᓲᕐᓗᑐᑦ, ᐃᓄᒃᑎᑑᓕᖅᑎᑦᑎᓂᕐᓄᑦ ᑎᑎᕋᓂᒃ, ᓇᓗᓇᐃᖅᓯᔪᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ, ᑐᓴᐅᒪᑎᑦᑎᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ, ᑐᓵᔨᖃᖅᑎᑦᑎᔪᑦ ᐱᔨᑦᑎᕋᕐᓂᕐᓄᑦ, ᐊᓯᓪᓗ.
• ᖃᓄᑎᒋᒧᑦ ᐱᓕᕆᕝᕕᓯ ᖃᐅᔨᓴᖃᑦᑕᖅᐸᑦ ᐃᒻᒥᓂᓄᑦ ᐱᕕᖃᕐᓂᕐᓂᒃ ᐊᑐᐃᓐᓇᐅᑎᑦᑕᐅᔪᑦ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ? ᓲᕐᓗᑐᑦ, ᑮᓇᐅᔭᑦ ᑐᕌᖓᔪᑦ ᐃᓄᒃᑎᑑᓕᖅᑎᑦᑎᓂᕐᓄᑦ ᑎᑎᕋᓄᑦ, FTEs ᑐᕌᖓᔪᑦ ᐱᓕᕆᔪᓄᑦ ᐱᖃᖅᑎᑦᑎᔪᓄᑦ ᐱᔨᑦᑎᕋᕐᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ, ᐊᓰᓪᓗ.

ᐱᔭᐅᔪᒪᓂᖏᑦ ᐱᔨᑦᑎᕋᕐᓂᕐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ

• ᖃᓄᖅ ᐱᓕᕆᕝᕕᓯ ᖃᐅᔨᓴᖅᐸᑦ (ᐃᓕᓴᕆᔭᒃᑯᑦ ᐃᓕᓴᕆᔭᐅᖏᑦᑐᒃᑯᓪᓗ) ᐱᔭᒪᔪᓄᑦ ᓄᓇᖃᖅᑳᖅᑐᓂᑦ ᐱᔨᑦᑎᕋᕐᓂᕐᓂᒃ ᐊᑐᐃᓐᓇᐅᑎᓪᓗᒋᑦ ᐱᔨᑦᑎᕋᕐᓂᑎᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ?
• ᑭᓱᓂᒃ ᐱᑕᖃᙱᓚᖅ ᐱᔨᑦᑎᕋᕐᓂᕐᓂᒃ ᐊᑐᐃᓐᓇᐅᑎᑕᐅᔪᓂ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᐱᓕᕆᖃᑎᖕᓄᓪᓗ ᐱᓕᕆᖁᔭᐅᔪᓄᑦ ᐱᓕᕆᕝᕕᖕᓄᑦ?
• ᐱᓕᕆᕝᕕᖕᓄᑦ ᐊᑐᐃᓐᓇᐅᑎᑦᑎᕙᒌᖅᑐᑦ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ - ᑭᓱᒧᑦ ᐱᔪᒪᑎᑕᐅᓚᐅᖅᐱᑦ ᐊᑐᐃᓐᓇᑎᑦᑎᓗᓂ ᑕᒃᑯᓂᖓ ᐱᔨᑦᑎᕋᕐᓂᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ?

ᐊᒡᕕᐊᕈᑏ, ᐊᒃᓱᕈᕐᓇᖅᑐᑦ ᐃᓕᑕᓪᓗ

• ᑭᓲᕙᑦ ᐊᒡᕕᐊᕈᑎᓪᓗᐊᑕᑦ ᐱᓕᕆᕝᕕᖕᓄᑦ ᐊᑐᐃᓐᓇᐅᑎᑦᑎᓇᓱᒃᖢᓂ ᐱᔨᑦᑎᕋᕆᕐᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ? ᓲᕐᓗᑐᑦ, ᑮᓇᐅᔭᓄᑦ ᐊᒃᓱᕉᑏᑦ, ᑭᓱᓕᕆᓪᓗᐊᑕᖅᑐᓄᑦ ᐊᔪᖏᓐᓃᑦ, ᑭᓱᓄᑦ ᐱᕕᑭᓐᓃᑦ.
• ᐱᓕᕆᕝᕕᖕᓄᑦ ᐊᑐᐃᓐᓇᐅᑎᑦᑎᕙᒌᖅᑐᓄᑦ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ - ᑭᓲᕙᑦ ᐃᓚᖏᑦ ᐃᓕᑕᐅᔪᑦ ᓴᓇᑎᓪᓗᒋᑦ ᐊᑐᓕᖅᑎᑎᓪᓗᒋᓪᓗ ᓄᑖᓂᒃ ᐱᓕᕆᔾᔪᓯᕐᓂᒃ/ᐱᖁᑎᓂᒃ/ᐱᔨᑦᑎᕋᕐᓂᕐᓂᒃ?

ᓇᓕᐊᓪᓗᐊᑕᓄᑦ ᐱᓕᕆᕝᕕᖕᓄᑦ ᐊᐱᖅᑯᑏᑦ

• ᑎᒥᓯ ᑕᕝᕙᐅᓪᓗᓂ ᐃᓂᖃᖅᐸᑦ (ᐊᓯᓂᒡᓘᓐᓃᑦ) ᓄᓇᕘᒥ ?
• ᐱᓕᕆᕝᕕᓯ/ᑎᒥᓯ ᐱᓕᕆᖃᑎᖃᓲᖑᕙᑦ ᐃᓄᖕᓂᒃ ᓄᓇᕘᒥ? ᐱᓕᕆᖃᑎᖃᑦᑕᕈᔅᓯ, ᖃᓄᖅ?

ᐅᖃᐅᓯᒃᓴᑦ/ᐊᐱᖅᑯᑏᑦ – ᐃᓱᒪᖅᓱᕆᑦ ᓱᓕᒃᑲᓐᓂᓂᒃ ᐊᑐᐃᓐᓇᐅᑎᑦᑎᓗᑦ ᖃᐅᔨᒪᔭᐅᔪᓂᒃ, ᐊᐱᖅᑯᑎᓂᒃ, ᐅᖃᐅᓯᒃᓴᓂᒡᓘᓐᓃᑦ ᑲᓇᓂ.

ᐃᓚᓕᐅᓯᒪᔪᖅ B : ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᑎᒥᖏᓪᓗ ᓄᓇᕘᒥ

ᐃᓚᓕᐅᓯᒪᔪᖅ C : ᖃᐅᔨᒪᔾᔪᑎᒃᓴᑦ : ᓄᓇᖃᖅᑳᖅᑐᑦ ᐃᓄᐃᑦ.

ᐃᓚᓕᐅᓯᒪᔪᖅ D : ᑭᖕᒧᑦ ᓄᓇᖃᖅᑳᖅᑐᓄᑦ ᐱᓕᕆᖃᑎᒌᖕᓃᑦ ᐅᑭᐅᖅᑕᖅᓗᓕᕆᔩᓪᓗ ᑲᓇᑕᒥ ᓇᓗᓇᐃᖅᓯᔪᑦ ᐃᓄᒃᑎᑐᑦ

ᐃᓚᓕᐅᓯᒪᔪᖅ E : ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᓂᕿᓄᑦ ᑐᕌᕈᑎᖏᑕ ᐊᔾᔨᖏᑦ ᐃᓄᒃᑎᑐᑦ

ᐃᓚᓕᐅᓯᒪᔪᖅ F : ᖃᓄᐃᖏᓐᓂᕐᓄᑦ ᑲᓇᑕᒥᒃᑯᑦ ᖃᐅᔨᒪᔾᔪᑎᒃᓴᖏᑦ ᓱᕈᓰᑦ ᐄᔭᕐᓗᒡᓂᖏᓐᓄᑦ